8
Yeézu no Omugabe Omukúlu we endagano eénsha
1 Echigaambo chiháango omuli byóona éebyo tulikwaátula nicho éechi: Íichwe twiináze Omugabe Omukúlu aátyo nyini, óogwo ayikéele olubazu lwo obúlyo lwe echitébe cho obutégeki cho ogwo ali Mukúlu, okwo omu igulu. 2 Okwo naakola emilimo yo omugabe omukúlu ahaantu ahatakatíifu, omu iheéma lya amazima éelyo omuuntu atalalyoómbekile, náho Omukáma weényini akalyoombeka.
3 Buli mugabe omukúlu naateébwáho kuba amusoholeze Múungu engabilano ne echitáambo. Bityo nyini Omugabe Omukúlu wéetu ogwo náwe naayeéndelwa aábe ne echiintu cho kumusoholeza Múungu. 4 Yeézu yaakuzeendeliile kutúula omu nsi ezi, tiyaákubeele omugabe, habwo kuba omu nsi ezi baliho abagabe áabo abalikusohoza ebitáambo kwiingana ne ebilagilo bya Musa. 5 Amagaambo áago abagabe abo balikukola ahaantu ahatakatíifu no omususano kwoónka gwa áago agali omu igulu. Niyo ensoonga obuchilo Musa akaba naayeloónza kwoómbeka iheéma lyo kumulámya Múungu,*8:5 Iheéma lyo kumulámya Múungu: Habwo obusoomboozi bwooli, osome Éenzu ya Múungu omu Obusoomboozi habwa Amagaambo Agagumile. Múungu yaámugaambila aáti, “Okole buli chiintu kwiingana no omususano óogwo nkakwoóleka omu ibaanga éelyo lya Sinai.”8:5 Osome Okuluga 25:40. 6 Náho Múungu amuheéle Yeézu omulimo gwo obugabe óogwo guli muluunzi bwooli kuchila ogwo gwa abo bagabe ba mbele. Yeézu niwe alikubakwaátanisa abaantu na Múungu omu ndagano éezo eli nduunzi kuchila ezo eyo kubaanza. Káandi endagano ezo eyoombekilwe omu luhazo luluunzi, nikwo kugaamba atuheéle emilago miluunzi bwooli kuchila emilago ze endagano ya kala.
7 Bityo endagano yo kutaándika yaakwiihikiiliize, omugaso gwe endagano ya kábili tigwaákuloondiilwe. 8 Náho obuchilo Múungu yaabweene obuzilwa bwa abaantu boómwe, akagaamba,
“Muhuliilíze, íinye Omukáma niingaámba, obuchilo nibwiíza,
óobwo ndaakola endagano eénsha na abaantu be éensi ya Iziraeli na be éensi ya Yuda.
9 Endagano eénsha ezo teliba nke ezo eya kala éezo nkakola na beesabo enkúlu,
obuchilo nkabeébeembelela kuzima kuluga omu nsi ya Miísiri.
Boónyini tibalabeele abeésigwa omu kweékomya endagano yaanze ya kala.
Ezi niyo ensoonga nkabaleka óokwo bali.
Bityo nikwo íinye Omukáma ndikugaamba.
10 Ezi niyo endagano eénsha
ezo ndaakola na Abaiziraeli omu bilo éebyo ebilikwiiza,
bityo nikwo íinye Omukáma ndikugaamba.
Ndyaátamo ebilagilo byaanze omu biteékuzo byáabo,
niimbyaandika omu miganya yáabo.
Íinye niímba Múungu wáabo,
nábo baláaba abaantu baanze.
11 Talibaho omuuntu weéna wéena óogwo aliba naayegesa muzeenzíwe,
nali omuuntu wo kumugaambila mudugu woómwe nka nikwo, ‘Musoomboókelwe Omukáma Múungu.’
Bóona kubaandiza aha muyaánda kuhika aha mukúlu balaánsoombookelwa.
12 Habwo kuba ndaábaganyila obuzilwa bwáabo,
mala tiíndibiízuka káandi ebiheno byáabo.”8:8-12 Osome Yeremia 31:31-34.
13 Múungu akazéeta ezi ne endagano eénsha, bityo azikozile endagano yo obutaándiko kuba eya kala. Na choóna chóona echaakusuukile no kuba echikokolo chili héehi kuhwáho.