Echitabu cho
Okusuululilwa kwa Yohana
Obweébeembezi
Omwaandiki we echitabu echi naayesoomboola nka nikwo ni Yohana, káandi naayegaámba nka nikwo weényini no omuhálila wa Múungu (1:1, 9). Abamanyi béenzi nibazila nka nikwo Yohana óogwo akaba ali omuheémba wa Yeézu (Matayo 10:2; Mariko 3:17). Akaandika káandi Empola Nzima ezo elikwéetwa ahi izíina lyoómwe hamo ne enyaandiko isatu za Yohana.
Echitabu chikaandikwa nke emyáaka makúmi ataanu ha muheleeluko gwa Yeézu kufwa no kuzooka. Obuchilo obwo, Kaizáari oómo óogwo akaba naayétwa Domitiani akaba ali omutwáale okwo Rúumi. Akaba ali enduluhe na akaba naayagalaza kubi Abakristu.
Yohana akabaandikila echitabu echi Abakristu bo omu makelezia musaanzu omuli Asia Eénche, ezo omu buchilo obu nibazeéta Buturuki. Abakristu abo bakaba beene ebyaágalalo biháango bwooli éebyo byaaleteliilwe no ogwo Domitiani. Bakaágalala habwo kuchiíkiliza echigaambo cha Múungu na habwo kumukulaatila Yeézu Kristu.
Yohana akabaándikila abo abone kubatiimbya. Akagaamba nka nikwo begumisilize omu byaágalalo kuhicha aha muhélo (2:7, 11, 17, 26; 3:5, 12, 21). Yaábagaambila nka nikwo beemele habwo kuba ebyaágalalo ebyo ne byo obuchilo buche kwoónka, káandi ha muheleeluko Múungu alaábachwaáziika ababisa báabo bóona (22:10-15). Kweégumisiliza nikubaha emigisa miháango.
Yohana akabona amagaambo aga omu meezaho nke ebilóoto butúnu ha meesóge. Amagaambo méenzi omu chitabu echi nigagaámbwa aha luméenko. Nko okususanisa, omulyaango gwo kubaanza (1:12) Yohana naabona otukóondo musaanzu twe ezaháabu two kutelekamo omwo emuli. Ahaakulaatiile, nitugaambilwa nka nikwo ensoonga ye ebiintu nyini ni buli eémo neeyemeelelela ekelezia eémo. Ahali ezi méenko zo okubaanza nituboneswa kuzunwa tubone kusoombookelwa kuzima ahaleéza omu chitabu echi.
1
Yohana naasoomboola empola ze echitabu echi
1 Oku no okusuululilwa habwa Yeézu Kristu óokwo akahaabwa na Múungu, abone kwoóleka abazáana boómwe amagaambo áago galikweendelwa kubaho no kubonwa obu zuba zuba. Yeézu náwe akasiindika maléeka*1:1 Maléeka: Habwo obusoomboozi bwooli osome Obusoomboozi habwa Amagaambo Agagumile. woómwe aleéte okusuululilwa okwo hali íinye Yohana, omuzáana woómwe. 2 Íinye niinyatula buli chiintu éecho nkabona habwe echigaambo cha Múungu no obwaátuzi bwa amazima habwa Yeézu Kristu.
3 Múungu naabafúuha abaantu bóona áabo abalaasomela bazeenzi báabo amagaambo go obubáasi obu. Káandi naabafúuha áabo abaleékomya no kuchikoondookela éecho echaayaandikilwe omwo, habwo kuba obuchilo bwa amagaambo ago kubaho buli héehi.
Empola aha makelezia musaanzu
4 Íinye Yohana niimbaandikila olwaandiko olu íimwe abaheémba ba Yeézu ba makelezia musaanzu áago agali omuli Asia Eénche.†1:4 Asia Eénche: Echaalo echi chikaba chili omu nsi éezo ebilo ebi niheétwa Buturuki.
Niimbeendeza embabazi no obuhóolo kuluga hali Múungu óogwo aliho, akaba abáho, na alyaábaho, no kuluga ha Myooyo musaanzu ezili omu méeso ge chitébe cho obutégeki cha Múungu, 5 no kuluga hali Yeézu Kristu. Ogwo niwe lubona omweésigwa. Akaba ali omutábani wo obuzigeezo ha kuzoolwa kuluga omu bafwiile no omutégeki wa abakáma bóona abo omu nsi.
Yeézu naatweénda no kutuchuúngula kuluga omu biheno byéetu, omu kulabila aha kufwa kwoómwe ha bwéetu. 6 Atukozile tube obukáma bwa abagabe, tubone kumukolela Múungu, óogwo ali Iíse. Yeézu aábe ni ikuzo no obuhicha, obucha no obuchiile. Amina.‡1:6 Amina: Eyina ensoonga ya amazima no obweétegeelezi.
7 Muléebe! Alyéeza ali omu bwíile!1:7 Osome Danyéeli 7:13.
Abaantu bóona balyaámubona,
no obu abo abaamuchumisile ichúmu.1:7 Osome Zakaria 12:10.
Endími zóona omu nsi zilyaáyalama habwa weényini.
Amazima, bilyáaba bityo. Amina.
8 Omukáma Múungu naagaámba aáti, “Íinye níinye Alufa na Omega.§1:8 Alufa na Omega: Omu Chiyunani, Alufa ne enyuguta yo kutaándika omu nyúguta ze Chiyunani. Omega ne enyuguta yo omuhélo. Íinye ndiho, nkaba mbaho, na ndyaábaho. Íinye ndi Omuzizi wa Byóona.”
Yohana naamubona Kristu omu meezaho
9 Íinye Yohana ndi omwiikiliza muzeenzi wáanyu omu kukwaátaangana na Yeézu. Niinkoba hamo neemwe omu byaágalazo no omu bukáma bwoómwe no okweégumisiliza. Íinye nkaba ntweelwe omu iziinga éelyo lilikwéetwa Patimo, habwo kulaanga echigaambo cha Múungu no kwaátula amazima habwa Yeézu. 10 Echilo chimo cho kumulámya Omukáma Yeézu, Omwooyo gwa Múungu gwaánhanaantukila. Ahonyini, enyuma yaanze naahulila iláka liháango nke lye echikuli. 11 Iláka elyo likagaamba, “Yaandika omu chitabu amagaambo góona áago olaabona. Niho ochisíindike echitabu echo aha makelezia musaanzu ago agali omu maboma ga Efeso, Simurina, Pergamumu, Thiatira, Saridi, Filadelifia, na Laodisia.”
12 Mbwéenu, naáhiinduka mbone kuleeba iláka elyo elilikuhooya neenye. Obuchilo bu naáhiindukile, naábona otukóondo musaanzu twe ezaháabu two kutelekaho emuli. 13 Ahagáti yo otwo tukóondo, naábona omuuntu nka Mutábani wo Omuuntu.*1:13 Mutábani wo Omuuntu: Habwo obusoomboozi bwooli osome Obusoomboozi habwa Amagaambo Agagumile na Danyéeli 7:13. Azweele enkaanzu ndeehi no kweéboha omusipi gwe ezaháabu omu kalezi. 14 Omútwe gwoómwe ni isóke lyoómwe bikaba nibyeéla nka amooya galikwéela, káandi nibyeéla pee! Améeso goómwe gakeengelela nke echeengéezi cho omulilo. 15 Amagulu goómwe gakaba gali nke emiliinga éezo ekuusilwe bwooli, nko oóti eyokizwe no kwéezwa omu luhiiza lwo omulilo. Iláka lyoómwe likaba ni nka améenzi agali méenzi áago galikuzela omu iholoola. 16 Akaba ayina enyenyéezi musaanzu omu ngalo yoómwe eyo obúlyo. Olubaadi lwo obwóozi enkási zóona ibili lukaba niluluga omu kanwa koómwe. Obuso bwoómwe bukaba nibweengelela ha magala nko omusana gwi izóoba lyo omu iháangwe.
17 Obuchilo naámubwéene, naámugwa omu magulu goómwe nko omuuntu afwíile. Náho yaantáho omukóno gwoómwe gwo obúlyo, yaángaambila aáti, “Otatiina! Íinye níinye Obutaándiko no Omuhélo. 18 Íinye níinye obulami! Nkaba nfwiile, náho léeba, ndi omulame wo obucha no obuchiile! Káandi nnyina enchiínguzo zo Olufu na Kuzimu.†1:18 Kuzimu: Habwo obusoomboozi bwooli osome Obusoomboozi habwa Amagaambo Agagumile.
19 “Mbwéenu, ogaandike amagaambo áago waábona, áago agaliho óobu nyini na áago agaliíza obuchilo obuliheleeluka. 20 Okabona enyenyéezi musaanzu omu ngalo yaanze yo obúlyo, no otukóondo musaanzu twe ezaháabu two kutelekaho emuli. Mbwéenu, ensoonga ye echihwe echi niyo ezi, otukóondo musaanzu óotwo okabona na amakelezia musaanzu, ne ezo enyenyéezi musaanzu ni bamaléeka baázo.”
*1:1 1:1 Maléeka: Habwo obusoomboozi bwooli osome Obusoomboozi habwa Amagaambo Agagumile.
†1:4 1:4 Asia Eénche: Echaalo echi chikaba chili omu nsi éezo ebilo ebi niheétwa Buturuki.
‡1:6 1:6 Amina: Eyina ensoonga ya amazima no obweétegeelezi.
1:7 1:7 Osome Danyéeli 7:13.
1:7 1:7 Osome Zakaria 12:10.
§1:8 1:8 Alufa na Omega: Omu Chiyunani, Alufa ne enyuguta yo kutaándika omu nyúguta ze Chiyunani. Omega ne enyuguta yo omuhélo.
*1:13 1:13 Mutábani wo Omuuntu: Habwo obusoomboozi bwooli osome Obusoomboozi habwa Amagaambo Agagumile na Danyéeli 7:13.
†1:18 1:18 Kuzimu: Habwo obusoomboozi bwooli osome Obusoomboozi habwa Amagaambo Agagumile.