La Carta a Los Hebreos
Carta Hebreo Pøngøtoyata'm
1
Diosis tø o'nøtyamu'am ñe 'Yuneji'n
1 Ya'møcpø tiempo'omo Diosis chi'yaj tza'maṉvajcoyajpapø pøn qui'psocuy va'cø 'yo'nøyaj ndø peca jata tzu'ṉgutya'm. Ji'n tum nac 'yo'nøyaju y eyaseta'm 'yo'nøjaju. 2 Pero jøsi'cam yøṉ ultimota'mbø jama'omo Diosis cyø'vej ñe 'Yune va'cø tø o'nøtyamø. Je 'Yuneji'ṉ Diosis jyomejcu mumu ti aunque jut ijtupø, y ndø Janda Diosis chamdzi' aunque tiyø 'Yune. 3 Diosis 'Yune sø'ṉba Diosis myøja'ṉo'majcupit; y ndø Janda Dios jujchete, igual jetseti 'Yuneque't. Diosis 'Yune'is aunque ti chøcpa pyømiji'ṉ va'cø itø; yac itpa auṉque tiyø pømi'øyupø 'yoteji'ṉ. Oyu'cam ndø yac tzu'ṉatyam ndø coja, entonces po'cs aṉgui'mguy po'cscu'yomo tzajpomo, Diosis chø'na'ṉomo, va'cø myøja'ṉ aṉgui'mø.
Diosis 'Yune masti myøja'ṉombø que ji'n angelesta'm
4 Más yac møja'ṉo'maj Diosis yøṉ 'Yune que ni ji'n angelesta'm; y chamdzi'u como erejencha cuenta más møja'ṉombø ñøyi que ji'n angelesta'm. 5 Porque ni jutipø angeles ja ñøjay nunca Diosis:
Øjchøṉ mi Une. Yøti yaj quejpøjtzi que øjchøṉ mi ndø Janda.
Cuando ndø Janda Dios nømu: “Øjchøṉ je'is Jyata”; ja ñømø o'ca angelesis jyatata'm. Y cuando nømu: “Øjchøṉ Une jicø”; ji'ndyet angeles o chame que 'yuneta'm. 6 Pero cuando Diosis cyø'vej vi'napø y myøja'ṉombø 'Yune nascøsi nømu:
Tiene que va'cø cyøna'tzøjayaj ø ⁿUne mumu angelesista'm.
7 Diosis chamque'tu jujcheta'm chøcyaj angeles, nømu:
Ndzøcyajpøjtzi angeles como savasepø;
y angeles yosayajpapø'stzi ndzøcyajpa øjtzi como juctyøc nemase.
8 Pero cuando ndø Janda Diosis chamu jujchete 'Yune, ñøjayu:
Mijtzømete Dios; mitz maṉba mi 'yaṉgui'mi mumu jamacøtoya.
Maṉba mi 'yaṉgui'm vøjø, maṉba mi ndzøc vøjpø aṉgui'mguy.
9 Vøjpø aṉgui'mguy mi sunba aṉcø, y yatzitzoco'yajcuy ji'n mi suni;
jetcøtoya mijchøṉ mi ndø Dios øjtzi.
Øtz mi ⁿyaj casø'yøjtzi más que menos eyata'mbø pøn casøyajpase.
10 Y ndø Janda Diosis ñøjmacye'tu 'Yune:
Mitz mi Ngyomite, chu'ṉgu'yomo mi ndzøctzo'tz myøjase nas,
y mi ṉgø'ji'n mi ndzøc tzap.
11 Tzap y nas maṉba yajyaje, pero mitz mumu jama maṉba mi indi.
Como tucu peca'ajpase, jetse mumu ijtuse tzap y mumu ijtuse nas maṉba peca'ajyajque'te.
12 Como tucu ndø pacsaṉne'cpase, y ndø tzacpa cuando peca'ajpa, jetse maṉba mi ṉgacpø'yaj tzap y nas.
Pero mitz mumu jamase maṉba mi indi,
nunca ji'n ma yaj mi nguenguy.
13 Diosis nunca ja ñøjay ni jutipø angeles:
Po'cs ø ndzø'na'ṉomo va'cø mi 'yaṉgui'mø,
hasta que øtz yac mochquecyajpøjtzi mi ṉgui'sayajpapø'is como si fuera mi ṉgøte'nøyajuse.
14 Nunca ja ñøjay ni jutipø angeles jetse, porque mumu angeles espirituta'mete yosyajpapø. Diosis cyø'vejyajpa angeles va'cø cyotzoṉyaj pøn maṉbapø cotzocyaje.