1 Ru dxuhch de laꞌd rdeḻyno xirman, nehx nu bia nacu tziyno meu lo guxtisy ni nehx rzacbeeiy Dioz, mazyg lâ gyo xmeññ Dioz lehdy gynii yâme ni gac lguia ni rdeḻyno yâme. 2 ¿Dâs‑e nann laꞌd xmeññ Dioz ctzoo guîlguxtisy lguia gyre meññ-nu lo guiedzylie la? No bâḻ ctzoo laꞌd guîlguxtisy lguia gyre meññ-nu lo guiedzylie, ¿di zaḻ dxi gynii laꞌd ni gac lguia ni-gydile la? 3 ¿No dâs‑e nann laꞌd ctzoo nó guîlguxtisy lguia ángel la? ¡Dxiclé ni rahc lo guiedzylie-rieꞌ! 4 No leewe, bâḻ rdeḻy laꞌd por behch ni nu lo guiedzylie-rieꞌ la, ¿bia nacu ryo laꞌd meññ-nehx nu lo xtiidz Crist gynii ni gac lguia ni rdeḻyno laꞌd? 5 Ren ze lehdy qytuꞌ laꞌd. ¿Nehx dxi nu ni to laꞌd ni rahp guîlriehñ par gynii ni gac lguia ni rdeḻyno xirman la? 6 ¡Nehx nunzy rdeḻyno saꞌ meññ-rman, mazyg xtâ no riuꞌ yâme lo guxtisy ni nehx rlíladzy Dioz lehdy ctzoo guîlguxtisy lguia ni rdeḻyno yâme!

7 No ba to guîl-di rieññ‑e leeu rdeḻyno saꞌ laꞌd. ¿Bia nacu di ctibladzy laꞌd ni rtzuné yâme laꞌd? ¿Bia nacu di gdee laꞌd ñahz zî-cuan yâme laꞌd? 8 ¡Per laꞌd aaḻ rtzohd ni nehx xñahzû, no rban laꞌd xtâ ni nac xchieñ xirman gahc laꞌd!

9 ¿Dâs‑e nann laꞌd meññ-rtzoo ni dirquihñ nehx beeiy tzu ru rtzoo Dioz mdad la? Di guisquiee laꞌd laꞌd gahc, sca meññ ni rzeno ni nehx tziahl, o meññ ni rzacbeeiy cuentz figur, o meññ ni rzeno tziahl meññ, o mpyquie ni rahc beeiy ngünaa lehdy seno mpyquie lee, o mpyquie ni rzeno zâ-mpyquie, 10 o meññ-gübaan, meññ-rzîbyladzy medy, meññ-ngüee, meññ-rniwaty, o meññ ni risquiee par ycaꞌ xmedy meññ zehzy; gyre zâ meññ-wé yahc nehx beeiy tzu ru rtzoo Dioz mdad. 11 Ba xtze mod-wé guhc lahd laꞌd; per naꞌ ba biar xguîlmbahñ laꞌd, no ba ptzoo me laꞌd nunzy par leeme, no ba pteedy me laꞌd beeiy ni nehx nzahby guîlquie por Jesucrist ni rtzoo mdad no por xiSpirt tDioz nó.

12 Nu to diidz ni ne: “Ndruhty nehx beeiy nca naa nitisy ni ntzon.” Ni uli we leeu, per dac‑e gyreu ni ntzoo mu mos. No nîcze ndruhty nehx beeiy nca naa nitisy ntzon, per nehx zdedyaꞌ ñahz ctzoo behch mdad naa. 13 Zegahc nu sto diidz ni ne: “Guîlroo par leññ mu we leeu, no leññ mu par guîlroo we leeu.” No ze rahcu, per Dioz zniꞌdy me gyropu. Per dcuerp nó nehx biaꞌnu par seno nó meññ-nehx dtziahl nó lee, mazyg par Crist‑e leeu, no Crist nac xbixwaan dcuerp nó. 14 No Dioz, mod-bispahñ me Crist, zegahc‑e zispahñ me nó porni beeiyu leeme.

15 ¿Dâs‑e nann laꞌd xcuerp laꞌd zidguiahcu beeiy gahc xcuerp Crist la? ¿Nehxni ncan xcuerp Crist, ntzonu tohzy no xcuerp to ngünaa ni rtzoo guîlquie no xtahl mpyquie la? ¡Yac, dac‑e ze leeu! 16 ¿No dâs‑e nann laꞌd ru to mpyquie rzeno me to ngünaa ni rtzoo guîlquie no xtahl mpyquie, ba tohzy cuerp we gyrop yâme la? Lo Guehtzy ru queꞌ xtiidz Dioz ne: “Gyrop yâme zidguiahc beeiy gahc tohzy meññ.” 17 Per dxu nu tohzy no Crist, tohzy Spirt‑e nuno gyrop yâme.

18 Di seno laꞌd meññ ni nehx tziahl laꞌd lee. Zrieñ guîlquie ni rtzoo meññ, nehx rdibylganou xcuerp yâme; per dxu rzeno ni nehx tziahl la, xcuerp yâme we rdibylgano leeu. 19 ¿Dâs‑e nann laꞌd xcuerp laꞌd xiydoo Spirt-Sant‑e leeu, no Dioz bdee me Spirt ni nu no laꞌd la? Were cuerp ni rahp nó, dac‑e dixchieñ nó leeu, 20 porni Crist, xroꞌ we güdix me por laꞌd. No leewe, lâ gzacbeeiy Dioz no xcuerp laꞌd no xispirt laꞌd, porni xchieñ Dioz‑e leeyahcu.