1 Rman ni ndzin leeyahc, di gylíladzy laꞌd gyre meññ ni ziaad ne nu xiSpirt Dioz lee, mazyg lâ güieꞌ zaꞌgndzi dxu we leeyâme, bâḻ uliu rahp yâme xiSpirt Dioz; porni bidguieññ xtahl profet lo guiedzylie ni risquiee. 2 Mod-rieꞌ beeiy gann laꞌd dxu rahp xiSpirt Dioz: gyre dxu rnii ne Jesucrist biahd me lo guiedzylie no cuerp la, wé we rahp xiSpirt Dioz. 3 No gyre dxu rnii ne Jesucrist nehx biahd me lo guiedzylie no cuerp la, wé we nehx rahp xiSpirt Dioz; no nirieꞌ we xispirt to meññ-rruu contr Crist ni ba bieññ laꞌd guiaad, no naꞌ ba nu spirt-rieꞌ lo guiedzylie.

4 Shiꞌñ, nac laꞌd xmeññ Dioz, no nehx rtzoo laꞌd ni ne meññ-wé yahc ni risquiee; porni xiSpirt Dioz ni nu no laꞌd, ma beeiyu lee que xispirt bêndzab ni nu lo guiedzylie. 5 Nuno yâme guîlrieñ-nahcsy ni nu lo guiedzylie, leewe rnii yâme ni nahcsy ni nu lo guiedzylie, no meññ-ryo ni nahcsy lo guiedzylie, wé rieññ leeyâme. 6 Per nó nac nó xmeññ Dioz; no dxu rzaclo Dioz, wé we rieññ ni runo nó lee; per dxu nehx xmeññ Dioz lee la, wé nehx rieññ ni runo nó lee. No mod-rieꞌ rzaclo nó dxu rahp spirt ni rnii ni uli no dxu rahp spirt ni rnii ni nehx uli.

7 Rman ni ndzin leeyahc, guîntzi dsaꞌ nó; porni guîlndzi, de Dioz‑e ziaadu. Gyre dxu ni ndzi meññ, wé we xiiñ Dioz no rzaclo me Dioz. 8 Dxu nehx ndzi meññ nehx rzaclo me Dioz, porni Dioz guîlndzi we leeme. 9 Dioz mod-rieꞌ bluu me xguîlndzi me no nó dze-pshahl me Xiñ-ngahc me lo guiedzylie lehdy gdee me nó guîlmbahñ ni nehx zluhx. 10 Nirieꞌ we guîlndzi ni ulihb: dac‑e porni nó rzacbeeiy nó Dioz, mazyg Dioz‑e ndzi me nó no pshahl me Xiiñ me guhc beeiy to gun dze-guhty me, lehdy güdix me dguîlquie nó.

11 Rman ni ndzin leeyahc, sca-ze ndzi Dioz nó, racladzyu zegahc guîntzi dsaꞌ nó. 12 Dioz, ndruhty dgueññ güieꞌ leeme; per bâḻ ndzi dsaꞌ nó la, nu Dioz no nó we, no ulihbu xguîlndzi me rtzoou scâsy riuꞌladzy me no nó. 13 No nirieꞌ rdee diidz de ni nu nó no Dioz, no Dioz nu me no nó, de ni leeme bdee me nó xiSpirt me. 14 No noꞌ bwieꞌ noꞌ no rdee noꞌ diidz de ni Dioz ni nac dTad nó pshahl me Xiiñ me lehdy guislaa me meññ ni nu yahc lo guiedzylie de lo guîlnadz ni ziaad. 15 Gyre dxu rnii ne Jesúz, Xiiñ Dioz‑e leeme, wé we nu no Dioz, no nu Dioz no lee.

16 No nó naꞌ, rzaclo nó no rlídadzy nó guîlndzi ni rahp Dioz no nó. Dioz, leeme we guîlndzi, no dxu ndzi meññ, wé we nu no Dioz, no Dioz nu no lee zegahc. 17 No mod-rieꞌ ulihbu xguîlndzi me rtzoou mod-riuꞌladzy me no nó, no mod-wé nehx zguꞌ dihqy nó mbehty dze-gydzihñ guîlnadz; porni mod-nu gahc Jesucrist, modé gahc nu nó lo guiedzylie-rieꞌ. 18 Xguîlndzi Dioz la, nehx nu guîlrdzie no leeu, per ni ulihbu guîlndzi rboou guîlrdzie diby lad, porni guîlrdzie zidnou guîlné. No dxu rdzie la, xguîlndzi Dioz nehx rtzoou no leeme mod-riuꞌladzy Dioz.

19 Nó rzacbeeiy nó Dioz, porni nier leeme bintzi me nó. 20 Bâḻ dxuhch ne: “Naa rzacbeeiyaꞌ Dioz”, per néladzy me xirman me la, meññ-risquiee we leeme; porni dxu nehx ndzi xirman ni rwieꞌ me lee, zegahc‑e nehx rzacbeeiy me Dioz ni nehx rwieꞌ me lee. 21 No ni rtzoo Dioz mdad ctzoo nó la, leeu we nirieꞌ: Dxu rzacbeeiy Dioz, zegahc‑e guîntzi me xirman me.