1 Naa rnabaꞌ laꞌd por xguîlndoo Crist, no por guîlmeññ-tziaawy ni nac me. Ne lahd xmeññ laꞌd hor-nun no laꞌd rnin didz-ndoo no laꞌd, no hor-ba nun ziht rshaalaꞌ guehtzy lo laꞌd were rnin didz-ndush. 2 Rnabaꞌ hor-ba nun no laꞌd, di tzu mód gynin didz-ndush. Bâḻ racladzyu, beeiy ndushnon meññ ni ne rtzoo noꞌ no to guîlrieñ-nahcsy ni nu lo guiedzylie. 3 Nîcze nu noꞌ neꞌ lo guiedzylie mbahñ noꞌ, per nehx rdeḻy noꞌ no to guîlrieñ-nahcsy ni nu lo guiedzylie. 4 Ni rquihñ noꞌ lo ni zidguiahc beeiy guîlrdeḻy ni rtzoo noꞌ, dac‑e beeiy ni rquihñ meññ ni rtzoo ni nahcsy lo guiedzylie; mazyg ni rquihñ noꞌ, de Dioz‑e leeyahcu ni beeiyu lee par gniꞌdy noꞌ fuers ni nu contr Dioz. 5 Rniꞌdy noꞌ guîlriehñ ni nehx uli no gyre guîlnguihdz ni nehx rdee ñahz gzaclo meññ Dioz. Rsaꞌn noꞌ gyre guîlriehñ ladzyña Crist lehdy gactziaawyu, gzoobu xtiidz me. 6 No hor-nann noꞌ rzobdiidz laꞌd, ba nu noꞌ puexd gdee noꞌ guîlné nitisy dxu ni nehx rzobdiidz.

7 Laꞌd rwieꞌ laꞌd nunzy de lguia. Bâḻ dxuhch ba nann xmeññ Crist lee la, racladzyu guitsêlou leeme zegahc‑e xmeññ Crist noꞌ. 8 Nîcze rguguian naa gahc stoozy de mazy no de ni rtzoo noꞌ mdad, nehx rtunonu. Dioz ni rtzoo mdad‑e bdee meu noꞌ lehdy gacno noꞌ laꞌd gyniꞌzy de ni rlíladzy laꞌd, no dac par ctzuné noꞌ laꞌd. 9 Nehx racdadzyaꞌ tedyaꞌ lo laꞌd beeiy ni ntziehbyaꞌ laꞌd no dguehtzy yahcaꞌ ni rshaalaꞌ lo laꞌd. 10 Uliu we nu meññ-ne dguehtzy yahcaꞌ ni rshaalaꞌ lo laꞌd zidnou didz-nahdy no didz-ndip, no ne yâme hor-ba nun lahd laꞌd scâsy ni nehx gyreu beeiyu naa no nehx rsahc ni rnin par ndruhty. 11 Sca meññ-wé ni ne ze nac noꞌ, racdadzyaꞌ gann yâme de ni mod-rnii noꞌ lo guehtzy ni rshahl noꞌ lo laꞌd hor-nu noꞌ ziht de ru nu laꞌd, modé gahc‑e stzoo noꞌ hor-nu noꞌ lahd laꞌd.

12 Nehx gahc nnâbdadzy noꞌ niygahl nsahc noꞌ o ñahc noꞌ tohzy no lahd meññ-wé yahc ni rguguia leegahc. Per neññ nwaty yâme ru rsahc yâme leeyâme mod-ne xguîlriehñ gahc yâme, no rwieꞌ yâme dxu ma rtzoo xñahzû. 13 Per noꞌ nehx rguguia noꞌ noꞌ gahc ndedy noꞌ lo mdid, mazyg Dioz‑e rnii bá glohdy gydzihñ noꞌ no dziiñ ni bdee me noꞌ, no Dioz gahc bdee ñahz bydzihñ noꞌ ru nu laꞌd Corint. 14 No leewe, ryo noꞌ ru nac diidz tzo noꞌ no nehx rdedy noꞌ lo mdid, scâsy ni ba di ño noꞌ ru nu laꞌd. Porni nier noꞌ güyo noꞌ ru nu laꞌd, bigyuno noꞌ laꞌd xtiidz Crist. 15 No nehx rguguia noꞌ noꞌ gahc lguia dziiñ ni ptzoo zrieñ meññ par ndeedyu scâsy noꞌ ptzoo leeu; mazyg rbiaaz noꞌ ma gylíladzy laꞌd Dioz, lehdy ma xtahl meññ guieññ xtiidz Crist por dziiñ ni ntzoo noꞌ ru nu laꞌd, per nunzy leññ ru nac diidz tzo noꞌ. 16 No mod-wé dzigyu noꞌ xtiidz Crist ru ma ziht de ru nu laꞌd, no nehx ziuꞌ noꞌ lo xtziiñ Dioz ni ptzoo zrieñ meññ, no nehx zguguia noꞌ noꞌ gahc no ni ba ptzoo yâme.

17 No mod-ne lo Guehtzy ru queꞌ xtiidz Dioz: “Dxu rguguia leegahc la, zî-cuguia me leeme de ni rtzoo Dioz.” 18 Porni Dioz nehx riuꞌladzy me meññ ni rguguia leegahc, mazyg rxilyno me meññ ni rguguia me lee.