1 Dirmanaꞌ ni ndzin leeyahc, nirieꞌ we ni byrohp guehtzy ni gashaalaꞌ lo laꞌd; no lo gyropu gagun xguîlriehñ laꞌd di guiaaḻladzy laꞌd gyre nirieꞌ, lehdy gap laꞌd guîlrieñ-nye. 2 Lâ guitsêlou laꞌd ni günii xprofet yahc Dioz ba xtze, no ni ptzoo Crist mdad ctzoo meññ, leeme guislaa meññ, mod-bluu apóstl laꞌd.

3 No lâ gann nier gahc nirieꞌ: dze-ba gadziñgahsh gyluhx guiedzylie ziuꞌ meññ ni gyxidzyno laꞌd no ctzoo ni nahcsy ni rquee ihqy yâme, 4 no ga yâme: “¿Bucs‑e gac ni bdee Crist xtiidz me guibyguiat me sto la? Ba guhty dtadgul yahc nó ni güyuꞌ ba xtze, no dgueññ gydzee mbehty glo dze-güyaa guiedzylie.” 5 Meññ-wé yahc rtzoo yâme beeiy ni dgann, nîcze ba gahc nann yâme, de ni ba xtze Dioz günii me güyaa leññ gybaa, no güyaa guiedzylie de lo nzeꞌ, no ziaadu de nzeꞌ. 6 No por nzeꞌ gahc guhc guio-ro, bynihty guiedzylie tzcaḻ. 7 Per leññ gybaa naꞌ no guiedzylie ni nu ni naꞌ, ziaad dzé ni tzuw lo gue por diidz gahc ni gynii Dioz. Yqueꞌ gue leeyahcu dze-gac xguîlnadz me, no gynihty meññ-rtzoo ni dirquihñ.

8 Rman ni ndzin leeyahc, di guiaaḻladzy laꞌd, par Dioz la, to dzé zidguiahcu beeiy diymily ihz, no diymily ihz zidguiahcu beeiy diby dzé. 9 Dioz dac‑e galee me de ni ctzoo me ni ba bdee xtiidz me, beeiy mod-ne lahd meññ, mazyg nehx rshacladzy me de nó; porni nehx racladzy me gynihty ndruhty, mazyg gyre meññ csaan ni nahcsy ni nac.

10 Per dze-guiaad Crist naꞌ, gacu beeiy rdzihñ gübaan hor-nehx nann meññ; no leññ gybaa gynihtyu no to ṟid-ro ni ndzieeby, no gyre ni nunou gynihtyu lo gue, no guiedzylie no gyre ni nu lou, yqueꞌ gue leeyahcu.

11 Gumm gyreu gynihty mod-wé la, ¡bia modé naꞌ di gac laꞌd nunzy par Dioz no gzacbeeiy laꞌd leeme! 12 Leewe lâ cuiahz gydzihñ dze-guiaad Dioz, no lâ guiob gydzihñ laaḻu. Dze-wé znihty leññ gybaa lo gue, no gyre ni nunou ziuꞌu lo bial; 13 per nó gabiaaz nó to leññ gyba-coby no to guiedzylie-coby ni ba bdee Dioz xtiidz gdee me nó ru gyreu gac xñahzû.

14 No leewe, rman ni ndzin leeyahc, lóni gabiahz laꞌd gac gyre nirieꞌ yahc, lâ gnâbladzy laꞌd zaꞌgndzi de ni gydzial me laꞌd nyar xguîlmbahñ laꞌd, no di zdzial mbehty ni nahcsy chehsh laꞌd, no nu laꞌd dzie tziaawy. 15 Lâ guitsêlou laꞌd de ni Dioz ni rtzoo mdad nó gabiahz me lehdy gylaa meññ. No mod-wé zegahc dirman nó Pabl ni ndzi nó lee, bzaa me no guîlnann ni bdee Dioz leeme no pshahl meu lo laꞌd. 16 Gyre lo xguehtzy me rnii me nirieꞌ, nîcze lahdu ngann par guieññ nó, no meññ ni nehx nann no ni nehx nu zaꞌgndzi lo xtiidz Crist, rtzee yâme ni ganiiu, mod-rtzoo gahc yâme no zrieñ ni queꞌ lo xtiidz Dioz, ba par gniꞌdyz Dioz leeyâme.

17 Per laꞌd ni ndzin leeyahc, gumm ba nann laꞌdu la, na di gynityxñahz laꞌd por xguîlrisquiee meññ-nehx rzobdiidz no nsaꞌn laꞌd ni rlíladzy laꞌd. 18 No leewe, lâ gdee ñahz gyniꞌzy xlaꞌy Jesucrist leññ xguîlmbahñ laꞌd, leeme rtzoo mdad nó no bislaa me nó, no lâ gzaclo leeme ma zaꞌgndzi. ¡Leeme we ni tzuguia ni naꞌ no di guiandzieu! Modé gacu.