1 Leññ gahc tiemp-wé, ba ma gane xtahl xmeññ Crist. No guzlo meññ-rnii didz-griegü ni nu lahd yâme galesyno yâme meññ-rnii didz-hebreu. Ne yâme meññ-ngünaviud ni nu lahd yâme, nehx riygahl ni rcaꞌ par tedydzé, porni nehx rcaꞌ yâme tohzy mdid no meññ-ngünaviud ni nac meññ-hebreu. 2 Were gydiby tzipychop apóstl ptzoo yâme diidz ptohp yâme gyre xmeññ Crist. Hor-ba bydohp gyre yâme we naꞌ, ra apóstl leeyâme:

―Nehx xñahzu csaꞌn noꞌ dixtziiñ noꞌ de ni rigyuno noꞌ meññ xtiidz Dioz nunzy par quiiz noꞌ ni gaquihñ meññ-rieꞌ yahc. 3 Leezuwe, rman, beeiydí lâ cue gahdzy mpyquie lahd laꞌd ni nann laꞌd rtzoo ni mos, no ni rahp guîlriehñ, no ni neññ ulihbu nu Spirt-Sant xguîlmbahñ. No leeyâme csan-no noꞌ ctzoo dziñ-rieꞌ. 4 Noꞌ nehx ssaꞌn noꞌ dixtziiñ noꞌ de ni rnab noꞌ lo Dioz no de ni dzigyuno noꞌ meññ xtiidz me.

5 Gyre yâme biuꞌladzy mod-ne apóstl yahc, no mod-wé ptzoo yâme. Güle yâme rman-rieꞌ yahc: Stebn, to mpyquie ni ulihbu rlíladzy xtiidz Dioz no ni ulihbu nu Spirt-Sant xguîlmbahñ; no Felipy, Prócoro, Nicanor, Timóṉ, Parmenas no Nicoláz, to meññ-byruu ciuda-Antioquía ni guzlo rtzoo ni ne xleiy meññ-Isṟael antzy ni gac me xmeññ Crist. 6 Byluxu, bidno yâme meññ-rieꞌ yahc lo apóstl par günab lo Dioz no pshob ña chehsh meññ-gübee.

7 No xtiidz Dioz ma gayann meññu, no gane xtahl xmeññ Crist Jerusaléṉ; no zegahc xtahl bahl yahc bylíladzy xtiidz Dioz no guzlo bzobdiidz yâmeu.

8 To mpyquie ni le Stebn, ulihbu nu xlaꞌy Dioz leeme no beeiyu leeme rtzoo me xroꞌ guîlrtzunadz yahc no zrieñ ni ngann leññ guiedzy ru nu me. 9 To dzé we naꞌ biahd to cuib meññ-ria idoo ni le: Ru rdohp meññ-ba nehx nac mós ni rzee. No tohzy no leeyâme ziaad meññ-Ciren, meññ-Alejandría, meññ-Cilicy no meññ-Asia. No guzlo gadeḻydiidz yâme no Stebn. 10 Per di ñaḻ ntzoo yâme gan leeme por guîlnann ni rahp me no por xiSpirt Dioz ni risnii leeme. 11 Leewe güdix yâme chohp tzonn meññ par günii ni nehx uli contr leeme, ne:

―Noꞌ bieññ noꞌ ganii me didz-nahcsy contr Moiséz no contr Dioz.

12 No mod-wé pquihly yâme meññ-guiedzy byruu contr Stebn, no gahc mînguhl yahc ni nac guxtisy no muextr ni ruuḻ yahc xleiy Moiséz. Günahzy yâme leeme, güiyno yâme leeme lo guxtisy yahc ni rahc ni rnii. 13 No güiyno yâme meññ-biax lehdy bisquiee yâme guxtisy, ra yâme:

―Mpyquie-rieꞌ nehx rsaꞌn me ni rnii me contr diydoró nó ni nda, ni nehx rsaꞌn me ni rruu me contr xleiy Moiséz. 14 No bieññ noꞌ ganii me, ne me Jesúz ni nac meññ-Nasaret, zguiñguie me idoro-rieꞌ, no stzee me costumbr ni ganii xleiy Moiséz ctzoo nó.

15 Gyre meññ ni dxie yahc uga, bwieꞌ yâme lo Stebn, no hor-wé lé rluuw beeiy lo x‑ángel Dioz.