1 Güyuꞌ to mpyquie-gayac-ure ni le Lasr. Xguiedzy me le Betania, ru nac xguiedzy meññ-byzan me ni le Maríe no Mart. 2 Maríe naꞌ, byzan Lasr ni gayac-ure, leeme we ni güluꞌ ceitnixye nieꞌ Jesúz no pchee me leeu no xguitz-ihqy me. 3 Gyrop meññ-ngüna-rieꞌ yahc naꞌ, pshahl yâme meññ-bigyne Jesúz, no ra yâme lee:

―Señor, xmígüiꞌ gayac-ure.

4 Ru bieññ Jesúz günii yâme ze, were ne me:

―Guîlguidz-wé dac‑e par igaꞌdyu leeme, mazyg par tzuguia Dioz, no zegahc por leeu tzuguia Xiiñ me.

5 No nîcze ndzi Jesúz Mart, no Maríe no Lasr, 6 hor-ra yâme leeme gayac-ure Lasr, Jesúz nehx byruu me ru nu me, biaꞌn me schohp dzé mazy. 7 Byluxu, ra Jesúz xmeññ:

―Tzo nó ṟegioṉ-Judea gyzac.

8 Ra xmeññ me leeme:

―Muextr, rahp doozy dzé riñlo meññ-Isṟael ni nu ñaz-wé ngaꞌdy yâme lii no guie, ¿no naꞌ neꞌy tzaꞌy uga gyzac la?

9 Ra Jesúz leeyâme:

―¿Dâs‑e tzipychop hór nu byniꞌ to dzé la? Dxu rzeꞌ yudzé, mbehty nehx rraḻ nieꞌ, porni rwieꞌ me byniꞌ ni nu lo guiedzylie-rieꞌ; 10 per dxu rzeꞌ guiaal, gyrehzy rraḻ nieꞌ, porni nehx nu me lo byniꞌ.

11 Bylux günii me ze, were ra me:

―Dmígü nó Lasr ba nishcahsy, per dzicsiun lo me.

12 Ra xmeññ me leeme:

―Señor, bâḻ nishcahsy me, ziaḻ me we.

13 Jesúz naꞌ gaya leeyâme de ni ba guhty Lasr, per xmeññ me nlâdzy yâme de mpcaaḻ‑e ganii Jesúz. 14 Were ra Jesúz leeyâme nxal lo diidz:

―Lasr ba guhty. 15 No rxihlyaꞌ de ni nehx nun uga, no mod-wé ma mos par laꞌd lehdy gylíladzy laꞌd. Per tzo nó dzigüieꞌ nó leeme.

16 Tomáz, ni ra yâme lee Dídimo (porni guhl me tohzy no sto meññ), gu me zrieñ xmeññ Jesúz:

―Tzo nó zegahc, lehdy gaty nó tohzy no Jesúz.

17 Dze-bydzihñ Jesúz Betania, ba rahp tahp dzé de ni bygaꞌdzy Lasr. 18 No Betania, riaꞌnu beeiy tzonn kilómetr de Jerusaléṉ; 19 no xtahl meññ-Isṟael riahd ridtixlo Maríe no Mart, lehdy di gzacno yâme mazy de ni guhty byzan yâme. 20 Hor-gunn Mart ziaad Jesúz, güya me bigydzil-lo me lee; per Maríe, biaꞌn ruꞌ yuꞌ. 21 Were ra Mart Jesúz:

―Señor, bâḻ lii ñuꞌy neꞌ, nehx ñehty dsanaꞌ. 22 Per nîcze guhcu ze, nannaꞌ Dioz‑e zdee me lii gyre ni gnabiꞌ leeme.

23 Ra Jesúz leeme:

―Byzaniꞌ zbahñ me we gyzac.

24 Ra Mart leeme:

―Nannaꞌ zbahñ me dze-gybahñ gyre mînguty dze-gydibylgaa guiedzylie.

25 Were ra Jesúz leeme:

―Naa we ni rispahñ mînguty, no naa we ni rdee guîlmbahñ ni nehx zluhx. Dxu rlíladzy naa, nîcze gaty, per zbahñ gyzac. 26 No dxu mbahñ no rlíladzy naa, nehx ziuꞌ dzé znihty. ¿Rlíladzyiꞌ ni ren lii la?

27 Ra Mart Jesúz:

―Rlídadzyaꞌ, Señor; naa rlídadzyaꞌ lii we nac Crist, Xiiñ Dioz, ni biahd lo guiedzylie.

28 Bylux günii Mart ze, bigyne me Maríe ra me lee ngaꞌdzy gá:

―Muextr ba bydzihñ, no ne me tzaꞌy ru zu me.

29 Scâsy bieññ Maríe ra Mart leeme ze, za gahc me zigydzil-lo me Jesúz. 30 Dgueññ ziaꞌ gydzihñ Jesúz leññ guiedzy; zu ziaꞌ me ru bwieꞌ Mart leeme. 31 Meññ-Isṟael naꞌ ni dxie yahc leññ yuꞌ no ni gayuunladzy Maríe de ni guhty byzan me, ru bwieꞌ yâme biahs me byru-güxuunn me, náḻ gahc yâme leeme, nlâdzy yâme ruꞌ baa we za me, zigyuun me.

32 Hor-bydzihñ Maríe ru zu Jesúz, bisshiby gahc me lo, no ra me lee:

―Señor, bâḻ lii ñuꞌy neꞌ, nehx ñehty dsanaꞌ.

33 Ru bwieꞌ Jesúz gayuun Maríe no gayuun zrieñ meññ-Isṟael ni za no Maríe, güyuꞌ me trixd no bioobu leeme, 34 no ra me:

―¿Bá glo pcaꞌdzy laꞌd leeme?

Ra yâme leeme:

―Güde güieꞌy, Señor.

35 No biin Jesúz. 36 Ra saꞌ meññ-Isṟael:

―¡Lâ güieꞌ xnahc‑e rioobu leeme Lasr!

37 Lahd gahc meññ-rieꞌ gaya saꞌ yâme:

―Mpyquie-rieꞌ ni psiaḻ lo ngaḻ, ¿di ñaḻ dxi nislaa me Lasr de lo guîlguhty la?

38 Xroꞌ ni gayoobu Jesúz gyzac, gübigy me ma gahsh ru bygaꞌdzy Lasr. To leññ cuev‑e leeu, no ndaagu no to guie-ro. 39 No ra Jesúz leeyâme:

―Lâ gboo guie ni ndaagü ruꞌ baa.

Mart, byzan Lasr ni guhty, ra me Jesúz:

―Señor, ba rahp tahp dzé de ni bygaꞌdzy me, ba nadz‑e rlaa me.

40 Ra Jesúz leeme:

―¿Dâs ba ren lii bâḻ gylíladzyiꞌ la, zwieꞌy xroꞌ ni rtzoo Dioz‑e?

41 Were güloo yâme guie ni ndaagü ruꞌ baa. No gülesy lo Jesúz gybaa, ne me:

―Dad, rdedyaꞌ xquix lii, porni rieññiꞌ naa. 42 Nannaꞌ lii rieññiꞌ naa; per ren ze porni rioobaꞌ meññ-zu yahc neꞌ, no lehdy gylíladzy yâme lii we pshahl naa.

43 Bylux günii me ze, günii me ma ndip, ne me:

―¡Lasr, byruu de wé!

44 No byruu gahc Lasr leññ baa no ba mbahñ me, nraḻ lahr nieꞌ me no ña me, no ndaagü lo me no sto lahr. Were ra Jesúz leeyâme:

―Lâ gboo lahr ni nraḻ me lehdy tza me.

45 No leewe, xtahl meññ-Isṟael ni biahd bidtixlo Maríe no ni bwieꞌ ni ptzoo Jesúz, bylíladzy yâme leeme. 46 Per lahd gahc meññ-rieꞌ yahc güya ru nu meññ-nac yahc fariseu, no ra yâme lee ni ptzoo Jesúz. 47 Per xjefy yahc bahl no meññ-nac yahc fariseu, psieññ yâme zrieñ meññ-nac guxtisy, no bydohp yâme no lee, no ra yâme:

―¿Xnahc ctzoo nó naꞌ? Porni mpyquie-rieꞌ rtzoo me xtahl ni ngann. 48 Bâḻ gdee nó ñahz ctzoor me mod-rieꞌ, gyre meññ zlíladzy leeme; no luxu guiaad xsoldad meññ-Ṟom ni rtzoo mdad, guidnidylo yâme diydoró nó, no zegahc gyre dmeññ nó.

49 Per to lahd yâme ni le Caifáz, ni nac xjefy gyre bahl iz-wé, ra leeyâme:

―Laꞌd nehx nann laꞌd mbehty, 50 ni dgueññ guieññ laꞌd, ma mos ñehty tohzy meññ por gyre dmeññ nó, lehdy di nnihty gyre nó.

51 Per Caifáz naꞌ, nehx günii me ni nehzy xguîlriehñ me, mazyg porni leeme nac xjefy gyre bahl iz-wé, leewe bisnii Dioz leeme de ni gaty Jesúz por gyre meññ-Isṟael; 52 no nehx nunzy por gyre meññ-Isṟael, mazyg zegahc lehdy gydohp gyre xiiñ Dioz tohzy ni nu byzaꞌzy. 53 No glohdy dze-wé, gyre meññ-Isṟael ni rtzoo mdad, ptzoo yâme diidz igaꞌdy yâme Jesúz.

54 No leewe, Jesúz ba nehx rzeꞌ me neññ lahd meññ-Isṟael; beeiydí byruu me ru nac ṟegioṉ-Judea, no za me coo yu-bihdzy, sto guiedzy ni le Efraíṉ. Uga güyuꞌ me no xmeññ me.

55 Ba bydziñgahsh lni-Pascü ni rtzoo meññ-Isṟael, no xtahl yâme ni nu zrieñ guiedzy, za yâme Jerusaléṉ antzy ni gac lni par gacnyar yâme lehdy guiaꞌn yâme mos lo Dioz, mod-rtzoo gahc yâme xtâ ba xtze diaa. 56 No gayohdy yâme Jesúz, no ganabdiidz saꞌ yâme ruꞌ idoró:

―¿Bia ne laꞌd? ¿Siahd me we lo lni la?

57 Xjefy yahc bahl no zrieñ meññ-nac yahc fariseu, psieññ yâme meññ, bâḻ dxuhch gann bá glo nu Jesúz, guidne leeyâme, lehdy gynahzy yâme leeme.