1 Antzy ni gydzihñ lni-Pascü, Jesúz nann me ba bydzihñ dzé ni gyruu me guiedzylie-rieꞌ no gybiꞌ me ru nu xTad me. No leeme bintzi me xmeññ me ni nu lo guiedzylie, mod-wé gahc ndzi me leeyâme xtâ glo dze-guhty me.

2 Ru gayagü-tzie yâme we naꞌ, ba güluꞌ bêndzab guîlrieñ-nahcsy leññ xguîlmbahñ Jud-Iscariot, xiiñ Simóṉ, lehdy gdee me Jesúz lo ña meññ-rdziadzyno Jesúz. 3 Per Jesúz naꞌ, nann me ba psaꞌn xTad me gyreu lo ña me lehdy ctzoo me mdad, no nann me byruu me ru nu Dioz, no ru nu gahc Dioz guibyguiat me. 4 Leewe ru gayahgü yâme, biahs me, no güloo me lar-nutz me xtziguia, cuaꞌ me to toall, blihby me xigülaan me. 5 Luxu güluꞌ me nzeꞌ leññ to mbras, no guzlo güdihby me nieꞌ xmeññ me, no gasiab meu no toall ni blihby me xigülaan me.

6 Ru ba dzictiiby me nieꞌ Pedr‑e naꞌ, ra Pedr leeme:

―Señor, ¿aaḻ lii quiibyiꞌ dnien la?

7 Ra Jesúz leeme:

―Ni gatzon hôrrieꞌ nehx rieññiꞌu; sto dzé were zanniꞌ bia nacu.

8 Ra Pedr leeme:

―Nehx beeiy gdedyaꞌ ñahz quiibyiꞌ dnien.

Ra Jesúz leeme:

―Bâḻ di quiibyaꞌ nieꞌy la, di zaḻ gacriꞌ dmeññaꞌ.

9 Were ra Pedr leeme:

―Señor, ¡di quiibyiꞌ nunzy dnien, güdihby dñan no diqyaꞌ zegahc!

10 Ra Jesúz leeme:

―Dxu leer guhz, nunzy nieꞌ guiar, porni nter me nyar; no ba nyar laꞌd‑e, nîcze dac gyre laꞌd.

11 Jesúz naꞌ, nann me dxu de xmeññ me gdee leeme lo ña meññ-rdziadzyno leeme, leewe günii me: “Nîcze dac gyre laꞌd nyar.”

12 No byluxz güdihby Jesúz nieꞌ xmeññ me, bihtz me shab-ruhtz me xtziguia, no gürie me ruꞌ miax gyzac, no luxu, ra me leeyâme:

―¿Nann laꞌd bia ptzon no laꞌd la? 13 Ra laꞌd naa Muextr, no ra laꞌd naa Señor; no xñahzu mod-ne laꞌd, porni ze leeu. 14 No sca-ze naa, ni nac Señor no ni nac Muextr, güdiibyaꞌ nieꞌ laꞌd, no zegahc‑e laꞌd quiiby nieꞌ saꞌ laꞌd. 15 Ba blun laꞌd xnahc ptzon, lehdy ctzoo laꞌd mod-ptzo gahcaꞌ no laꞌd. 16 Gapyaꞌ laꞌd ni uli, to mós dac‑e ma rsahc me que patróṉ; no meññ-ria mdad dac‑e ma rsahc me que meññ-rshahl leeme. 17 Bâḻ rieññ laꞌd gyre nirieꞌ, no ctzoo laꞌdu, dxu ñahc beeiy laꞌd.

18 ’Nehx ganin de gyre laꞌd; nannaꞌ dxu gyre güleꞌn lee. Per rahp de ni gac ni rnii lo Guehtzy ru queꞌ xtiidz Dioz, ru neu: “Ni rahgü tohzy no naa, byruu me contr naa.”i13:18 Sal. 41:9 19 Ba gahc gayapyaꞌnu laꞌd‑e, lehdy hor-ba gayahcu, gylíladzy laꞌd naa we ni ba gahc nu. 20 Gapyaꞌ laꞌd ni uli, dxu rcaꞌ xtiidz meññ-gashaalaꞌ, rcaꞌ me dtiidzaꞌ; no dxu rcaꞌ dtiidzaꞌ la, rcaꞌ xtiidz Dioz ni pshahl naa.

21 Bylux günii Jesúz ze, gyzac ra me no xroꞌ guîlrioob:

―Gapyaꞌ laꞌd ni uli, to de lahd laꞌd gdee naa lo ña meññ-rdziadzyno naa.

22 Were guzlo gawieꞌ lo saꞌ xmeññ me, no ne yâme de dxu we ne me, gdee leeme lo ña meññ-rdziadzyno leeme. 23 To de lahd xmeññ me ni ndzi me lee, ni dxie coo me ruꞌ miax, 24 ptzoo Simoṉ-Pedr señ lehdy gnabdiidz dxu de lee ganii me. 25 Were güriequeꞌ me Jesúz, no ra me lee:

―Señor, ¿dxu we leeme ni neꞌy gdee lii lo ña meññ-rdziadzyno lii?

26 Ra Jesúz leeme:

―Cunisaꞌ diby laꞌy paṉ, no dxu gdedyaꞌu lee, wé we leeme.

No gülunihs Jesúz diby laꞌy paṉ no bdee meu Jud, xiiñ Simoṉ-Iscariot. 27 No scâsy cuaꞌ Jud paṉ, güyuꞌ bêndzab xguîlmbahñ me. Were ra Jesúz leeme:

―Ni dzictzooy, ptzoo leeu ngueeḻy gahc.

28 Per ndruhty de leeyâme ni dxie yahc ruꞌ miax di ñieññ bia nacu ra Jesúz leeme ze. 29 Gumm lo ña Jud nu bush ni nu xmedy yâme leññ la, leewe lahd yâme nlâdzy gaya Jesúz leeme ssii me behch par lo lni-Pascü, o gdee me behch ycaꞌ meññ-pobr. 30 Bylux güdahgü Jud paṉ-caḻ, byruu gahc me, za me; no hor-wé ba güyuꞌ guiaal.

31 Bylux byruu Jud, ra Jesúz:

―Naa we Mpyquie-Pshahl Dioz Lee, no ba bydzihñ hor-guieññ riuguian, no por naa zegahc zieññ riuguia Dioz. 32 No sca-ze riuguia Dioz por naa, zegahc‑e Dioz gahc zguguia me naa, no stzoo meu ngueeḻy gahc. 33 Shiꞌñ, ba nehx ziun no laꞌd mazy. Zyo laꞌd naa, per mod-re gahcaꞌ meññ-Isṟael, gayapyaꞌ laꞌd hôrrieꞌ: Nehx beeiy tza laꞌd ru tzan. 34 Ni gatzon mdad ctzoo laꞌd, to nicoby‑e leeu: Lâ guîntzi saꞌ laꞌd; no mod-ndzi gahcaꞌ laꞌd, mod-wé lâ guîntzi saꞌ laꞌd. 35 No bâḻ ndzi saꞌ laꞌd, were gyre meññ zwieꞌ dmeññaꞌ we laꞌd.

36 Ra Simoṉ-Pedr Jesúz:

―Señor, ¿bá tzaꞌy?

Ra Jesúz leeme:

―Ru tzan, nehx beeiy tzaꞌy no naa ngâstoo. Per gapru dzé were tzaꞌy.

37 Ra Pedr leeme:

―Señor, ¿bia nacu di zaḻ tzan no lii ngâstoo? ¡Naa gatyaꞌ por lii!

38 Ra Jesúz leeme:

―¿Neꞌy gatyiꞌ por naa la? Gapyaꞌ lii ni uli: Ni dgueññ ziaꞌ cuiadz rig, lii ba tzonn vuelt güniiy nehx rzacloꞌy naa.