1 Bylux günii Jesúz nirieꞌ yahc, byruu me no xmeññ me, za yâme stiby chehsh guiâgülahsy ni le Cedróṉ, no güyuꞌ yâme leññ to lyu ru zu yag-rgaꞌy. 2 Jud, ni bdee Jesúz lo ña meññ-rdziadzyno leeme, zegahc nann ru nu lyu-wé, porni xtahl vuelt Jesúz no xmeññ me rdohp yâme uga. 3 Güya Jud ru nu lyu-wé no soldad no zrieñ meññ ni rahp ruꞌ idoró, ni pshahl xjefy yahc bahl no meññ-nac yahc fariseu lee. Ziyno yâme lampr no xgue guier-bihdzy no spad. 4 Per Jesúz nann me ni dziguiahc me, byruu me no günabdiidz me, ra me meññ-wé yahc:

―¿Dxu ryo laꞌd lee?

5 Ra yâme leeme:

―Jesúz ni nac meññ-Nasaret.

Ra Jesúz leeyâme:

―Naa we.

No Jud, ni gadee Jesúz lo ña meññ-wé, nu lahd yâme. 6 Hor-ra Jesúz leeyâme: “Naa we”, biatrxan yâme, no biahb yâme lo yu. 7 Gyzac ra Jesúz leeyâme:

―¿Dxu ryo laꞌd lee?

Gyzac ra yâme leeme:

―Jesúz ni nac meññ-Nasaret.

8 Ra Jesúz leeyâme:

―¿Dâs ba ren laꞌd: “Naa we”? Bâḻ naa gayo laꞌd, lâ gdee ñahz gybiꞌ meññ-rieꞌ yahc.

9 No wé guhc ni günii Jesúz, ru ne me: “Dad, meññ-bdee yahquiꞌ naa, nehx bynihty ni to yâme.” 10 Hor-wé güloo Simoṉ-Pedr to spad ni ziyno me, no pchug me gydiag-drech xmós xjefy gyre bahl. No mos-wé, le me Malcü. 11 Were ra Jesúz Pedr:

―Güluꞌ xispadiꞌ xilgaru; gyre ni nadz ni gabiahz naa ni ne dTadaꞌ tedyaꞌ, ¿nehx zdeedyaꞌu la?

12 Gyre soldad no xcomandant yâme, no zrieñ meññ-rahp ruꞌ idoró, günahzy yâme Jesúz no blihby yâme leeme. 13 Güiyno yâme leeme nier xiryuꞌ Anáz, suegyr Caifáz, no iz-wé Caifáz nac me xjefy gyre bahl. 14 Caifáz, leegahcme we ni ra meññ-Isṟael ni rtzoo mdad, ma mos‑e par leeyâme ñehty tohzy meññ por gyre yâme.

15 Pedr naꞌ no sto xmeññ gahc Jesúz, náḻ yâme Jesúz. No mpyquie-rieꞌ ni nac sto xmeññ Jesúz, rzaclo xjefy gyre bahl leeme, no leewe güyuꞌ me lo xpaty bahl tohzy no Jesúz. 16 Per Pedr biaꞌn me stziuꞌ ruꞌ puert. Were byruu mpyquie-nac xmeññ Jesúz, ni rzaclo xjefy gyre bahl lee, günii me no ngüna-rahp ruꞌ puert par güyuꞌ Pedr. 17 Ngüna-rahp ruꞌ puert naꞌ, ra me Pedr:

―¿No lii we xmeññ mpyquie-rieꞌ la?

Ra Pedr leeme:

―Yac, dac‑e xmeññ me naa.

18 Gumm gayahc ncohby la, xmós yahc xjefy gyre bahl no meññ-rahp ruꞌ idoró, gülahqy yâme gue no gatzeꞌladzy yâme. Zuhdy Pedr lahd yâme, gatzeꞌladzy zegahc.

19 Guzlo xjefy gyre bahl ganabdiidz me Jesúz de xmeññ no de ni rluu me meññ. 20 Ra Jesúz leeme:

―Naa günin ñaz-lo nyug, no gyre meññ bieññ. Rlun meññ leññ idoo yahc no zegahc leññ idoró ru rdohp gyre meññ-Isṟael, no mbehty dgueññ gynin ngaꞌdzy. 21 ¿Bia nacu ganabdiidziꞌ naa? Beeiy gnabdiidziꞌ meññ-bieññ ni günin. Leeyâme nann bia günin.

22 Ru günii Jesúz ze, byruu to lahd meññ-rahp ruꞌ idoró, güdahp lo me, no ra leeme:

―¿Bia nacu ridzguiatiꞌ diidz lo xjefy gyre bahl ze?

23 Ra Jesúz leeme:

―Gu naa bia günin ni nehx xñahzû; no bâḻ xñahzu günin, ¿bia nacu güdihñiꞌ naa?

24 Byluxu, nliiby gahc Jesúz, pshahl Anáz leeme lo xjefy gyre bahl ni le Caifáz.

25 Zu Pedr, gatzeꞌladzy me coo gue. Ra yâme leeme:

―¿Dac‑e xmeññ Jesúz lii la?

Ra Pedr:

―Yac, dac‑e xmeññ me naa.

26 Byruu to xmós xjefy gyre bahl, xfamily mpyquie-pchug Pedr gydiag, ra leeme:

―¿Dâs‑e bwien lii no leeme leññ lyu ru zu yag-rgaꞌy la?

27 Gyzac günii Pedr nehx rzaclo me Jesúz, no lohg hor-wé güriedz rig.

28 Byruno yâme Jesúz xiryuꞌ Caifáz, ziyno yâme leeme xpalacy gobernador. Gumm ba zidtzu byniꞌ la, nehx güyuꞌ meññ-Isṟael no Jesúz leññ palacy; porni bâḻ leeyâme ñuꞌ, ba nehx ntzoo yâme mod-ne xleiy yâme, no ba nehx beeiy ñahgü yâme guîlrahgü ni rzaa yâme lo lni Pascü. 29 No leewe byruu Pilat stziuꞌ, ra leeyâme:

―¿Bia ptzoo mpyquie-wé zidno laꞌd leeme neꞌ?

30 Ra yâme Pilat:

―Bâḻ ñahc me meññ-tziaawy, nehx nidno noꞌ leeme.

31 Ra Pilat leeyâme:

―Lâ tziyno leeme, lâ ctzoo guîlguxtisy lguia me mod-rnii xleiy laꞌd.

Ra meññ-Isṟael Pilat:

―Dleiy noꞌ nehx rdee ñahz ngaꞌdy noꞌ ndruhty.

32 Günii yâme ze lehdy guhc mod-ne Jesúz hor-günii me bia mód gaty me. 33 Gyzac güyuꞌ Pilat leññ palacy, no pquee me riedz Jesúz, no ra me lee:

―¿Lii we xṞeiy meññ-Isṟael la?

34 Ra Jesúz leeme:

―¿Ni ne xguîlriehñiꞌ, wé rahbyiꞌ naa la, o zrieñ dxu rahbyu lii de naa?

35 Ra Pilat leeme:

―¿Nlâdzyiꞌ meññ-Isṟael‑e naa la? Meññ-xguiedzy gahquiꞌ no xjefy yahc bahl bidno lii neꞌ ru nun. ¿Bia ptzooy?

36 Ra Jesúz leeme:

―Ru rtzon mdad, dac‑e de lo guiedzylie-rieꞌ leeu. No bâḻ leeu ñahcu ze la, nquelo dmeññaꞌ we, lehdy meññ-Isṟael ni rdziadzyno naa, di nnahzy yâme naa. Per ru rtzon mdad, dac‑e neꞌ leeu.

37 Ra Pilat leeme:

―¿Ni uli ṟeiy lii la?

Ra Jesúz leeme:

―Lii neꞌy ṟeiy naa. Par nirieꞌ we guhlaꞌ no biaḻaꞌ lo guiedzylie, lehdy gdedyaꞌ diidz de ni nac ni uli. Gyre meññ ni rzaclo ni uli, rieññ yâme naa.

38 Ra Pilat leeme:

―¿Bia we leeu ni uli?

Bylux günabdiidz Pilat Jesúz, byruu me, güya me gyzac ru zu meññ-Isṟael, no ra me leeyahc:

―Naa nehx rdzialaꞌ mbehty doḻ lguia mpyquie-rieꞌ. 39 Per ba bieno laꞌd rislaan to meññ-nyagü lidzyguiib lo lni-Pascü. ¿Racladzy laꞌd guislaan xṞeiy meññ-Isṟael la?

40 Gyre yâme gyzac gaquee riedz, ne:

―¡Dac‑e leeme gylaa! ¡Barrabáz bislaa!

Per Barrabáz, gübaan‑e leeme.