1 Naa Jud, rtzon xtziiñ Jesucrist, no dbetzyaꞌ we Santiagü. Gashaalaꞌ guetzy-rieꞌ lo meññ ni ndzi dTad nó Dioz lee no ni ba pquee me riedz lee; meññ-rieꞌ yahc Jesucrist‑e gawieꞌ leeyâme. 2 Dioz gyre gyzasy mód guioob me laꞌd, tzu laꞌd dzie tziaawy, no guîntzi me laꞌd.

3 Rman ni ndzin leeyahc, ba xtze gayuꞌdadzyaꞌ cshaalaꞌ guehtzy lo laꞌd ru gzan de ni bislaa Dioz nó de lo guîlnadz ni ziaad; per naꞌ rwien ma rquihñ gzanu lehdy gnabaꞌ güieꞌ laꞌd di gdee laꞌd ñahz gydzee mod-rlíladzy laꞌd. Dioz bdee leeu par gyre xmeññ me, no nehx ziuꞌ dzé gydzeeu. 4 Porni lahd laꞌd ba nu meññ-rtzoo ni dirquihñ, güyuꞌ yâme ngaꞌdzy gá no rtiꞌx yâme xlaꞌy Dioz lehdy ctzoo yâme gyre gyzasy ni nahcsy, per ba gahc ziaad lo Guehtzy ru queꞌ xtiidz Dioz ru neu, meññ-wé gynihty yâme lo xguîlquie yâme. Meññ-wé rruu yâme contr dbixwaan nó ni lehzy rtzoo mdad nó, leeme we Jesucrist.

5 Nîcze ba gahc nann laꞌd, per racdadzyaꞌ gapyaꞌ laꞌd sto lehdy guitsêlou laꞌd, Dioz bislaa me meññ-Isṟael no güloo me leeyâme Egipt, per bydzihñ to dzé bniꞌdy me lahd meññ-Isṟael ni nehx bylíladzy leeme. 6 No ángel yahc ni di ne ntzoo mdad ni bdee Dioz leeyâme, mazyg psaꞌn xilgar yâme. No hôrrieꞌ Dioz güluꞌ leeyâme lo guibcawy, nliiby yâme no caden par dze-ro ni gac guîlguxtisy. 7 No mod-wé gahc guhc Sodom no Gomorr no zrieñ ciuda yahc ni güyuꞌ gahsh de leeyahcu, güzeno yâme ni nehx tziahl yâme lee, no mpyquie güzeno zâ-mpyquie no ngünaa güzeno zâ-ngünaa, no por leeu pshahl Dioz guîlné chehsh yâme no gue ni nehx riee, par güieꞌ nó ni guhc yâme, lehdy di gac nó mod-wé.

8 No zegahc meññ-wé yahc ni ne rahc mod-rnii xcaaḻ, rtzoo yâme gyrehzy ni nahcsy no xcuerp gahc yâme, rruu yâme chehsh ni ne Dioz, no rnii yâme didz-nahcsy chehsh ni nu gybaa. 9 Per ni Miguel ni rtzoo mdad zrieñ ángel, hor-güdeḻyno me bêndzab por xcuerp Moiséz, nehx gülu-dia me bêndzab, mazyg ra me lee: “Dioz tush me loꞌy.” 10 Per meññ-wé yahc naꞌ, rnii yâme didz-nahcsy chehsh ni nehx nann yâme bia lee. Mod-nac xguîlriehñ yâme zidguiahc yâme beeiy maꞌ wéhdyx‑e ni nehx nann bia rtzoo, no leeu gnidylo leeyâme.

11 ¡Baazy dzii de leeyâme!, porni gatzoo yâme scâsy ni ptzoo Caíṉ ni biꞌdy behtzy, no par ctzoo yâme gan medy risquiee yâme meññ scâsy Balam, no gaty yâme beeiy guhty Coré, porni meññ-dirquihñ leeyâme. 12 To guîlrtuꞌ leeu riuꞌ yâme lahd laꞌd ru rahgü laꞌd tohzy porni ndzi saꞌ laꞌd, porni rahgü yâme no roo yâme, no nehx rahp xpeeiy yâme. Leeyâme we meññ ni rguꞌ ihqy nunzy par leegahc. Zidguiahc yâme beeiy zá ni riyno mbeꞌ lee no nehx ridno guio, no beeiy yahg ni nehx rqueꞌ xcuannahsh, ni ba gübihdzy no ba bylahdz. 13 Zidguiahc yâme beeiy x‑oḻ nisdoo ni modni ndip, hor-riahsu guia rchaꞌdzu mboo byzaꞌzy; no mod-wé nac yâme, gyre ni nahcsy ni rtzoo yâme zidnou guîlrtuꞌ. Zidguiahc yâme beeiy mbial ni bynityxñahz ni rahc cuent ba nu to lo guibcawy-ro no nehx ziuꞌ dzé gyruu.

14 No Enoc zegahc, ni byzaꞌu gahdzy meññ de dzé ni güyuꞌ Adáṉ ba xtze, günii me ni gu Dioz leeme lguia meññ-wé yahc, ne me: “Ziaad Señor, zidno me mily no mily x‑ángel me, 15 lehdy ctzoo me guîlguxtisy chehsh gyre meññ, no ycuquix me gyre meññ-dirquihñ por gyre ni dirquihñ ni ptzoo yâme; no meññ-rieꞌ yahc naꞌ ni rtzoo guîlquie, ycuquix me lee por gyre didz-nahcsy ni günii yâme contr leeme.” 16 Leeyâme rlesyno yâme zrieñ meññ, no gyreu rnii yâme chehsh nyugz, no rtzoo yâme nunzy ni riuꞌzyladzy yâme; rninguihdz yâme no rguguia yâme meññ lehdy ctzoo ni ne yâme.

17 Per laꞌd, rman ni ndzin leeyahc, lâ guitsêlou laꞌd, tzcaḻ günii x‑apóstl yahc Jesucrist ni rtzoo mdad nó, 18 no gu yâme laꞌd mod-rieꞌ: “Dze-ba gadziñgahsh gyluhx guiedzylie ziuꞌ meññ ni gyxidzyno ni nac par Dioz no ctzoo ni dirquihñ ni riuꞌladzy.” 19 Xtoḻ yâme rruu xmeññ Dioz chohp tzonn cuib; rtzoo yâme ni nehzy ihqy yâme no nehx rahp yâme xiSpirt Dioz.

20 Per laꞌd, rman ni ndzin leeyahc, lâ gacno saꞌ laꞌd lehdy di gyxiññladzy laꞌd de ni rlíladzy laꞌd Dioz. Lâ gynino Dioz por Spirt-Sant ni gacno laꞌd. 21 No di gyrusytzu laꞌd de lo xguîlndzi Dioz, leegâ gabiahz laꞌd dze-gdee Señor Jesucrist nó guîlmbahñ ni nehx zluhx, porni rioob me nó.

22 Meññ-rqueꞌladzy lguia ni uli, lâ gacno leeyâme lehdy gann yâme zaꞌgndzi. 23 No lâ guislaa zrieñ yâme lehdy di tza yâme lo gue; no lâ guioob zrieñ meññ, per no dzieeby, no gax lâ gann, di ycaꞌ laꞌd xguîlrieñ-nahcsy yâme ni zidguiahc beeiy shab-beedy yâme.

24 Tzuguia Dioz ni beeiyu lee güieꞌ di gyxiññladzy laꞌd lehdy gydzihñ laꞌd lo me lo xguîlbyniꞌ me nyar xguîlmbahñ laꞌd no xroꞌ guîlrxihly. 25 Tohzy Dioz‑e nu ni rahp gyre guîlnann, no leeme bislaa nó de lo guîlnadz ni ziaad, no por Jesucrist ni rtzoo mdad nó, di guiandzie de ni gayuguia me, no de ni nu me to ru mos, no de ni beeiyu leeme, no de ni rtzoo me mdad, modé nacu ni naꞌ, no di tzu dzé gydibylgaau. Modé gacu.