1 Byluxz bluu Jesúz meññ, za me guiedzy-Capernaum. 2 Uga nu to capitáṉ ni byruu Ṟom, rahp to mós ni ndzi me lee. Per gayac-ure mos-caḻ, ba par gaty. 3 Ru bieññ capitáṉ gayu meññ diidz de Jesúz, pshahl gahc me chohp tzonn mînguhl yahc ni nac guxtisy lahd meññ-Isṟael, zigyne yâme Jesúz bâḻ beeiy tza me csiaḻ me xmós capitaṉ-wé. 4 Bydzihñ yâme, gatzunñaad yâme Jesúz, no ra yâme leeme:

―Gucno capitaṉ-rieꞌ; par noꞌ to meññ-rsahc‑e leeme; 5 porni ndzi me meññ-Isṟael, no xtâ diydoo noꞌ, gunn me güyaau.

6 “Yo” ne Jesúz, za no leeyâme. No ru ba gadzihñ yâme gahsh gá de ruꞌ yuꞌ we naꞌ, pshahl capitáṉ xmígü me, zigyne yâme Jesúz mod-rieꞌ:

―Ne capitáṉ: “Lii ni rtzoo mdad, di gydziaꞌdzyiꞌ de ni guiaadiꞌ diryuꞌn, porni ndruhty nehx nacaꞌ. 7 No leewe nehx biaḻaꞌ naa yoꞌby, nidyobyaꞌ lii. Per günihzy, ba gahc biaḻ dmósaꞌ we. 8 Naa nannaꞌ xnahc rahc mdad, porni nu dxu rtzoo mdad naa, no zegahc nu soldad ni rtzon mdad leeyahc. Hor-gapyaꞌ to lahd yâme tza bahch, zia. No hor-gapyaꞌ sto lahd yâme guiaad, ba gahc ziaad. No hor-rshaalaꞌ dmósaꞌ dzictzoo me behch, rtzoo me leeu.”

9 Ru bieññ Jesúz niwé we naꞌ, ptzunadz me no bwieꞌ gahc me lo meññ-zidno me, no günii me ne me:

―Gapyaꞌ laꞌd, ni to lahd meññ-Isṟael nehx bydzialaꞌ meññ ni rlíladzy beeiy mpyquie-rieꞌ.

10 No hor-gubyguiat meññ-bigyne Jesúz ruꞌ yuꞌ, bydzihñ yâme, ba biaḻ xmós capitáṉ.

11 Luxu, za Jesúz sto guiedzy ni le Naíṉ. No ziyno me xmeññ me no zrieñ meññ mazy. 12 Hor-bydzihñ yâme ruꞌ guiedzy, bwieꞌ me ziycaꞌdzy meññ to mînguhty, xñooby to ngünaviud, xiñ-ngahc me. Xtahl meññ-guiedzy ziyno leeme. 13 Ru bwieꞌ Jesúz ngüna-wé naꞌ, bioob me lee, no ra me:

―Ba di guunriꞌ.

14 Luxu, gübigy me coo taú no güdan me chehshu, no güliahz gahc meññ-ngüyañ leeu. Were günino Jesúz ñoby-guhty, ra me lee:

―¡Biahsiꞌ! Naa we ganino lii.

15 Gürieli gahc ñoby-caḻ ni ba guhty no guzlo gahc ganii me. Luxu, bdee Jesúz leeme xmam me. 16 Ru bwieꞌ gyre yâme ni guhc, bydzie yâme no guzlo gaguguia yâme Dioz, no ne yâme:

―To profet ni beeiyu lee bidtzu dlahd nó.

No ne yâme:

―Dioz ba biahd par gacno xmeññ.

17 Gydo-bynac lo ṟegioṉ-Judea no gyre guiedzy-yaañ ni nu gahsh, gunn meññ ni ptzoo Jesúz.

18 Bie xmeññ Juaṉ diidz lo me ni ptzoo Jesúz. Were pquee Juaṉ riedz chohp xmeññ me, 19 no pshahl me lee bignabdiidz yâme Jesúz bâḻ ulihbu leeme ni nac diidz guiaad ni cshahl Dioz lee, o bâḻ cuiahz yâme zrieñ. 20 Bydzihñ meññ-pshahl Juaṉ lee, ra yâme Jesúz:

―Juaṉ ni rchôbnihs pshahl me noꞌ, zidnabdiidz noꞌ bâḻ lii we ni nac diidz guiaad ni ne Dioz cshahl me lee o cuiaaz noꞌ zrieñ.

21 Lohb hor-wé bydzihñ yâme gasiaḻ Jesúz xtahl meññ-gayac-ure no meññ ni nu yoob lee, no meññ ni nu mbenahcsy lee, no pshal me lo meññ-ngaḻ yahc. 22 Were ra Jesúz leeyâme:

―Lâ tza, lâ gu diidz lo Juaṉ gyre ni bwieꞌ laꞌd no gyre ni bieññ laꞌd neꞌ. Lâ ga leeme meññ-ngaḻ ba rwieꞌ, meññ-ndang ba rzeꞌ, meññ-gayudz lady riaḻ de xguîlguihdz, meññ-nguat ba rieññ, mînguty rbahñ, no meññ-pobr ba gayieññ xtiidz Dioz; 23 no dxu ñahc beeiy meññ ni rlíladzy naa no nehx rxiññladzy.

24 Byluxz byruu meññ-pshahl Juaṉ lee, guzlo Jesúz gaya me meññ bia rtzoo Juaṉ:

―Hor-güya laꞌd lo yu-bihdzy ru ziaad Juaṉ, ¿bia bigüieꞌ laꞌd? ¿To ni zidguiahc beeiy gobgui ni rchaḻ mbeꞌ lee la? 25 O bâḻ yac, ¿bia bigüieꞌ laꞌd? ¿To mpyquie ni ruhtz lar-rsahc bigüieꞌ laꞌd lee la? Zoꞌn yacu, porni nann laꞌd, meññ-ruhtz lar-rsahc no ni riuꞌladzy cos de guiedzylie, li ṟeiy‑e riuꞌ yâme. 26 ¿Bia bigüieꞌ laꞌd? ¿To profet la? Ze we leeu, no gapyaꞌ laꞌd, mazy que to profet‑e mpyquie ni bigüieꞌ laꞌd lee. 27 De Juaṉ‑e ganii lo Guehtzy ru queꞌ xtiidz Dioz, ni ne:

29 Hor-bieññ gyre meññ nirieꞌ, no meññ-rguquix yahc mpuezd, gunn yâme xtiidz Dioz xñahzu we, no biuꞌladzy yâme pchôbnihs Juaṉ leeyâme. 30 Per meññ-nac yahc fariseu naꞌ no zrieñ muextr ni nann yahc leiy, nehx biuꞌladzy yâme ñac yâme xmeññ Dioz, no di ne yâme nchôbnihs Juaṉ leeyâme. 31 No ne Jesúz:

―¿Biahx‑e nsacaꞌ meññ-nu ni naꞌ? 32 Rluu yâme beeiy mbiux ni rbia lóguiaꞌ, rquee riedz saꞌ, ne: “Pcuadz noꞌ bdzia, per di nyeꞌ laꞌd; biiḻy noꞌ cancioṉ-trixd, per di ñuun laꞌd.” 33 Porni biahd Juaṉ ni rchôbnihs, nehx rahgü sca ni rahgü laꞌd no nehx roo sca ni roo laꞌd, ne laꞌd bêndzab we nu leeme. 34 No zegahc rwieꞌ laꞌd naa, Mpyquie-Pshahl Dioz Lee, rahguaꞌ no roon, no ne laꞌd to meññ-la no meññ-roo nistzuuñ‑e naa. No ne laꞌd zegahc, naa we xmígü nyug meññ-rguquix mpuezd no zrieñ meññ-nehx rlaby ni ne leiy. 35 Per xguîlnann Dioz rdee diidz por ni mos ni rtzoo gyre xmeññ me.

36 Byruu to meññ-nac fariseu, ra me Jesúz:

―Tzo nó diryuꞌn, dzictahgü nó.

Were güya Jesúz. Hor-bydzihñ me, gürie me ruꞌ miax. 37 Leññ guiedzy-wé nu to ngüna-guîlquie, no ru bieññ me diidz dxie Jesúz xiryuꞌ fariseu, cuaꞌ gahc me to frascü ni güyaa no guie ni le alabastro ni nu ceitnixye leññ, ziyno meu ru dxie Jesúz. 38 Ru bydzihñ me, gayuun me, no guzlo gahc gaguihby me nieꞌ Jesúz no nzelo me. No luxu, gachee meu no xguitz-ihqy me no gacuruꞌ me nieꞌ Jesúz. No luxu, güluꞌ me ceitnixye nieꞌ Jesúz. 39 Ru bwieꞌ fariseu ni gatzoo me we naꞌ, günii leññ ihqy me, ne me: “Ñahc uliu profet mpyquie-rieꞌ la, ñann me dxu we ngüna-rieꞌ ni gagan leeme, no ñann me ngüna-dirquihñ‑e lee ni nu guîlquie chehsh.” 40 Were ra Jesúz fariseu:

―Simóṉ, rapaꞌ to ni gapyaꞌ lii.

Ra me Jesúz:

―Guw naa, Muextr.

41 Ra Jesúz leeme:

―Güyuꞌ chohp mpyquie ni nzahby meññ-ristiꞌñ. To me nzahby medy sahc xchieñ beeiy diby ihz no shun mboo, no sto me nzahby medy sahc xchieñ beeiy cincuent dzé. 42 Gumm di ñaḻ nguix yâmeu la, mpyquie-bistiꞌñ ra me gyrop meññ-nzahby: “Ba nehx zguix laꞌd medy ni nzahby laꞌd.” Gu naa naꞌ, ¿dxu de leeyâme ma ndzi mpyquie-bistiꞌñ de lo gyrop yâme?

43 Ra Simóṉ leeme:

―Zoꞌ naa, mpyquie-nzahby mazy.

Ra Jesúz leeme:

―Xñahzu mod-neꞌy.

44 Were bidzguiat lo me ru dxie ngüna-caḻ, no luxu ra me Simóṉ:

―¿Bwieꞌy ni ptzoo ngüna-rieꞌ la? Hor-bydzihñaꞌ xiryuꞌy, nehx bdeedyiꞌ nzeꞌ, ñar dnien. Per ngüna-rieꞌ, güdihby me dnien no nzelo me no pchee meu no xguitz-ihqy me. 45 Nehx pcuruꞌy naa. Ngüna-rieꞌ, xtâ glo hor-bydzihñaꞌ, gacuruꞌ me dnien. 46 Ni di nguꞌy ceihd diqyaꞌ. No leeme güluꞌ me ceitnixye dnien. 47 Ngüna-rieꞌ ndzi me naa, no gyre xguîlquie me ni modni xtahl, gyreu psiaaḻladzy Dioz lee. Meññ ni uxiee ziaꞌ gasiaaḻladzy Dioz xguîlquie la, uxiee gahc‑e ndzi yâme naa.

48 Were ra me ngüna-caḻ:

―Ba psiaaḻdadzyaꞌ xguîlquiey.

49 Guzlo zrieñ meññ-dxieno me ruꞌ miax uga, ganii leññ ihqy yâme, ne yâme:

―¿Dxuz‑e leeme mpyquie-rieꞌ? Xtâ guîlquie rsiaaḻladzy me.

50 Jesúz naꞌ, ra me ngüna-caḻ:

―Ba bylaay‑e no ba nehx nu guîlquie chehshiꞌ, porni rlíladzyiꞌ. Zaꞌgru güya naꞌ.