1 Günino Jesúz leeyâme ndaagü lo diidz gyzac lehdy di gyrugan yâme de ni rnino yâme Dioz. 2 Ra me leeyâme:

―Güyuꞌ to juez leññ to guiedzy, no nehx rdzie me Dioz ni nehx rlaby me meññ. 3 No leññ gahc guiedzy-wé güyuꞌ to ngünaviud, tirgahc ria me lo juez, rigynino me lee par ntzoo guîlguxtisy chehsh meññ-rdziadzyno leeme. 4 Leññ xroꞌ tiémp di ne juez ntzucas leeme, per bydzihñ to dzé, ne juez: “Nîcze nehx rdziehbyaꞌ Dioz, ni nehx rlabyaꞌ ndruhty, 5 mazyg porni ridtziaꞌdzy ngüna-rieꞌ naa, beeiydí ctzon ni ganab me lehdy di guiaadr me ctziaꞌdzy me naa.”

6 Were ne Jesúz:

―Lâ guitsêlou laꞌd ni günii juez-dirquihñ. 7 ¿Nehxni Dioz nehx ntzoo me guîlguxtisy par ñacno me xmeññ me ni gaquee riedz leeme dzé no guiaal? ¿Ne laꞌd nlee Dioz par ñacno me leeyâme la? 8 Gapyaꞌ laꞌd, leeme ngueeḻy gahc‑e zacno me xmeññ me. Naa Mpyquie-Pshahl Dioz Lee, no dze-guibyguiataꞌ, ¿zdzial ziaꞌraꞌ meññ-rlíladzy Dioz lo guiedzylie la?

9 Gyzac günii Jesúz ndaagü lo diidz par meññ ni ne meññ-tziaawy leeyahc no luxu di rlaby yâme zâ-bynech, ne me:

10 ―Güya chohp mpyquie ruꞌ idoró, bignab yâme lo Dioz. To me we meññ-nac fariseu ni rguguia leegahc, sto me we meññ-guîlquie ni rguquix mpuezd. 11 Fariseu we zuli, no ne: “Rdedyaꞌ xquixiꞌ, Dioz, porni nehx nacaꞌ beeiy zrieñ meññ. Nehx rbaanaꞌ, nehx rtzon mbehty ni dirquihñ, no nehx rzenon ndzab-tziahl sto, ni nehx nacaꞌ beeiy mpyquie-zu wé ni rguquix mpuezd. 12 Naa rtzon ayun chohp vuelt to leññ seman, no rdedyaꞌ lii to cuib de lo tzii cuib medy ni rtzon gan.” 13 Per mpyquie-rguquix mpuezd naꞌ zu ziht, ni di ne glesy lo gybaa, mazyg rbihby lidzydoo me, no ne me: “¡Bioob naa, Dioz, porni meññ-guîlquie naa!”

14 Were ne Jesúz:

―Gapyaꞌ laꞌd, mpyquie-rguquix mpuezd zia me, ba güdedy me beeiy ni nehx nzahby guîlquie; per fariseu naꞌ, nehx güdedy me ze. Porni dxu rguguia leegahc, wé nehx zguguia ndruhty lee; no dxu nehx rguguia leegahc, wé we tzuguia.

15 Meññ güiyno yâme mbiux yahc lo Jesúz par cu me laꞌy lee. Per hor-bwieꞌ xmeññ Jesúz ni gayahc, ndush yâme lo meññ-zidno mbiux. 16 Were pquee Jesúz riedz leeyâme par guiaad mbiux ru zu me, no ra me xmeññ me:

―Lâ gdee ñahz guiaad mbiux ni zidyo naa, no di yca laꞌd leeyâme; porni dxu gac scâsy mbiux-rieꞌ la, par leeyâme we ru rtzoo Dioz mdad. 17 Gapyaꞌ laꞌd ni uli, dxu di gap to guîlmbañ-nguhdzy scâsy xguîlmbahñ mbiux la, nehx beeiy tzu ru rtzoo Dioz mdad.

18 To mpyquie-nu idoo xcargü günabdiidz me Jesúz, ra me lee:

―Muextr, naa nannaꞌ meññ-tziaawy lii. ¿Bia mód ntzon lehdy ñapaꞌ guîlmbahñ ni nehx zluhx?

19 Ra Jesúz leeme:

―¿Bia nacu rahbyiꞌ naa meññ-tziaawy? Ndruhty nehx meññ-tziaawy lee, mazyg nunzy Dioz. 20 Per lguia ni ganabdiidziꞌ naa la, lii nanniꞌ ni rtzoo Dioz mdad ctzoo meññ: “Di senoy tziahl meññ; di igaꞌdyiꞌ meññ; di cuaniꞌ; di gyniiy ni nehx uli de meññ; bzacbeeiy xtadiꞌ no xmamiꞌ.”k18:20 Ex. 20:12-16; Dt. 5:16-20

21 Were ra mpyquie-wé leeme:

―Gyre nirieꞌ gatzon mod-ne glo nwiñaꞌ.

22 Hor-bieññ Jesúz ni günii me we naꞌ, ra leeme:

―Per nu ziaꞌr to ni riaadziꞌ: güya, ptoꞌ gyre ni rahpiꞌ no bdee xmedyu meññ-nehx rahp mbehty, were zahpiꞌ xtahl ni rsahc gybaa; luxu guiaadiꞌ, tzaꞌy no naa.

23 Per hor-bieññ me nirieꞌ, modni güyuꞌ me trixd, porni rahp me xtahl ni rsahc. 24 Bwieꞌ Jesúz modni gazacno me, ra:

―¡Modni ngann zahcu no meññ ni rahp xtahl ni rsahc ndee yâme ñahz ntzoo Dioz mdad leeyâme! 25 Porni ma nehx ngann ndedy to camell xguiehr igux que ndee to meññ-ṟicü ñahz ntzoo Dioz mdad leeme.

26 Gyre meññ-bieññ ni ne me, ra yâme leeme:

―¿Dxu we naꞌ beeiy gylaa par tzu lo xñahz Dioz?

27 Ra Jesúz leeyâme:

―Gyre ni nehx ñaḻ ntzoo meññ, no Dioz beeiyu.

28 Were ra Pedr leeme:

―Lii ni rtzoo mdad, noꞌ psaꞌn noꞌ gyre ni güdahp noꞌ, no zo noꞌ ru zaꞌy.

29 Ra Jesúz leeyâme:

―Gapyaꞌ laꞌd ni uli, nitisy dxu psaꞌn xiryuꞌ, xtad no xmam, behtzy o baḻ, byzan, tziahl, o xiiñ par ctzoo mod-rtzoo Dioz mdad la, 30 Dioz zdee leeme ma xtahl que ni psaꞌn me ni naꞌ, no dzé ni ziaad Dioz zdee leeme guîlmbahñ ni nehx zluhx.

31 Güloo Jesúz gydiby tzipychop xmeññ me diby lad, ra me lee:

―Ba tzo nó Jerusaléṉ, no uga dziguiahc gyre ni bzaa profet ba xtze de naa, Mpyquie-Pshahl Dioz Lee. 32 Zdee yâme naa lo ña meññ-nehx meññ-Isṟael, no stzuburl yâme naa, no zdeḻy yâme naa, no sshîbyshieñ yâme naa. 33 Zguihñ yâme naa, no zgaꞌdy yâme naa; per lo tzonn dzé zbahñaꞌ gyzac.

34 Per di ñieññ xmeññ me ni ra me leeyâme, porni dgann yâme bia we ne me, no ngannu par leeyâme.

35 Lóni gadziñgahsh Jesúz ciuda ni le Jericó, uga dxie to meññ-ngaḻ coo ñahz, rnab me gun. 36 Ru bieññ me gadedy xtahl meññ, günabdiidz me bia gayahc. 37 Ra yâme leeme:

―Jesúz ni nac meññ-Nasaret gadedy neꞌ.

38 Were guzlo gaquee me riedz, ne me:

―¡Jesúz, lii ni ziaad de lo xfamily ṟeiy-Davit, bioob naa!

39 Per meññ-zunier yahc byduhsh lo me lehdy tzudzie me; per ma rahc me rquee me riedz, ne me:

―¡Bioob naa, Jesúz!

40 Were güliahz Jesúz, no pshahl me meññ biycaꞌ mpyquie-wé ni ngaḻ. Hor-bydzihñ me gahsh, ra Jesúz leeme:

41 ―¿Bia racladzyiꞌ ctzon por lii?

Ra me Jesúz:

―Lii ni rtzoo mdad, racdadzyaꞌ cshaliꞌ dloꞌn lehdy güien.

42 Ra Jesúz leeme:

―Ba byxal loꞌy. Ba biaḻiꞌ we, porni rlíladzyiꞌ.

43 Lohg hor-caḻ byxal lo me, no za me náḻ me ru za Jesúz, gaguguia me Dioz. No gyre meññ ni bwieꞌ, güluguia yâme Dioz zegahc.