1 Luxu, biahs gyre meññ-bydohp yahc no ziyno yâme Jesúz lo Pilat. 2 Uga guzlo günii yâme contr leeme no ne yâme:

―Mpyquie-rieꞌ we ni gaquihly dmeññ noꞌ. Ra me noꞌ di quix noꞌ mpuezd lo xgobiern Cézr, no ne me leegahcme we nac Crist, ni ziaad de ṟeiy.

3 Were ra Pilat leeme:

―¿Lii we xṞeiy meññ-Isṟael la?

Ra Jesúz leeme:

―Lii we neu.

4 Were ra Pilat xjefy yahc bahl no zrieñ meññ:

―Nehx rdzialaꞌ mbehty doḻ lguia mpyquie-rieꞌ.

5 Per leeyâme naꞌ, ma rahc yâme rquee yâme riedz, ne yâme:

―Rtziiñ me meññ gydo lo ṟegioṉ-Judea no ni rluu me. Guzlo me lo ṟegioṉ-Galilea no glo bydzihñ me xtâ neꞌ.

6 Ru bieññ Pilat ni rquee yâme riedz la, were günabdiidz me bâḻ meññ-Galilea we Jesúz. 7 No hor-gunn me we naꞌ, meññ-Galilea Jesúz, were ptzoo me mdad pshahl yâme leeme lo Herody, porni leeme rtzoo mdad Galilea. No leññ dze-wé yahc nu Herody Jerusaléṉ. 8 Byxihly Herody hor-bwieꞌ me Jesúz‑e naꞌ, porni ba bieññ me bie meññ diidz de leeme, no ba xtze riuꞌladzy me güieꞌ me ctzoo Jesúz behch ni ngann ni nunzy Dioz beeiy rtzoo. 9 No gyrehzy günabdiidz me lee, per ba mbehty di nnii Jesúz. 10 Uga dxie xjefy yahc bahl no muextr ni ruuḻ yahc xleiy Moiséz, gyrehzy ganii yâme contr leeme par di gylaa me. 11 Guzlo Herody no gahc xsoldad me güdeḻy yâme Jesúz gyrehzy mód, no lehdy ptzuburl yâme leeme bguhtz yâme leeme to lahr mod-ruhtz ṟeiy. No luxu, pshahl me Jesúz lo Pilat gyzac. 12 No xtâ dze-wé ba guhc Herody mígü no Pilat; antzy rdziadzyno saꞌ yâme we.

13 Were ptohp Pilat gyre xjefy yahc bahl, no meññ-nac guxtisy, no meññ-guiedzy, 14 ra me lee:

―Bidno laꞌd mpyquie-rieꞌ neꞌ, ne laꞌd gachaḻ me xguîlriehñ meññ. Per günabdiidzaꞌ leeme ñaz-lo laꞌd, no ba bwieꞌ laꞌd nehx bydzialaꞌ mbehty doḻ lguia me mod-ne laꞌd nac me. 15 No zegahcu Herody nehx bydzial mbehty doḻ lguia me. Leewe bidzguiat leeme dlo nó gyzac. Mpyquie-rieꞌ nehx nu doḻ chehsh me par gaty me. 16 Ctzon mdad gydihñ me, no luxu, guislaan leeme.

17 No gyre ihz lo lni-Pascü rahp Pilat de ni guislaa me to meññ ni ndaagü lidzyguiib. 18 Per lo hor-wé, guzlo gyre yâme gaquee riedz, ne:

―¡Ptzoo mdad gaty me, no bislaa Barrabáz!

19 Barrabáz naꞌ, psaagü yâme leeme lidzyguiib, porni pquihly me meññ byruu contr guxtisy, no bgaꞌdy me meññ. 20 Gyzac günino Pilat leeyâme sto, porni gucladzy me nislaa me Jesúz; 21 per leeyâme naꞌ ma rahc yâme gaquee yâme riedz, ne yâme:

―¡Pquee leeme lo cruzy! ¡Pquee leeme lo cruzy!

22 Gyzac ra Pilat leeyâme ni bionn vuelt:

―¿Per bia ni dirquihñ ptzoo me? Naa nehx rdzialaꞌ mbehty doḻ lguia me par gaty me. Beeiydí, ctzon mdad gydihñ me, no luxu guislaan leeme.

23 Per leeyâme, aaḻ ma rquee yâme riedz, ne yâme yqueꞌ me lo cruzy.

No mod-wé xtâ glo pquihly yâme Pilat gacu mod-ne yâme no mod-ne xjefy yahc bahl. 24 “Yo” ne Pilat, bzoob xtiidz yâme. 25 No mod-wé bislaa Pilat mpyquie-dirquihñ ni nu lidzyguiib ni pquihly meññ byruu contr guxtisy xtâ no bgaꞌdy, porni leeme günab yâme gylaa. No Jesúz, wé bdee me lee lehdy guhcu mod-racladzy yâme.

26 Ru ziyno yâme Jesúz par yquee yâme leeme lo cruzy, günahzy yâme to meññ-Ciren ni le Simóṉ, lóhgni byruu me dahñ. Bguu yâme leeme cruzy ni yqueꞌ Jesúz lo, no náḻ me chehsh gahc Jesúz.

27 No náḻ xtahl meññ Jesúz, no meññ-ngünaa náḻ gayuun yahc lé rquee yâme riedz por xroꞌ guîlrioob. 28 No bidzguiat lo Jesúz, bwieꞌ me leeyâme, no ra me:

―Ngüna-Jerusaléṉ, di ruun laꞌd por naa. Lâ guun por laꞌd gahc no por xiiñ laꞌd. 29 Porni ziaad dzé ni ga meññ: “Dxu ñahc beeiy ngünaa yahc ni di raḻ gap xiiñ, no ni ngünaxtohby lee, no ni nehx güdahp mdoo par ñadzy.” 30 No hor-caḻ ga meññ dañ-roob yahc: “Lâ gyxaꞌd noꞌ”; no ga yâme dañ-wiñ yahc: “Lâ iguhtz yu noꞌ.” 31 Bâḻ mod-rieꞌ gatzoo yâme naa, ni zidguiahc beeiy yag-yeꞌ, ¡lê dxiclé laꞌd ni zidguiahc beeiy yag-bihdzy!

32 No ziyno yâme chohp meññ-ptzoo ni dirquihñ lehdy gaty yâme tohzy no Jesúz. 33 Ru bydzihñ yâme ru le Xilgar Calaver, pquee yâme Jesúz lo cruzy, no zegahc pquee yâme gyrop meññ-ptzoo ni dirquihñ lo zrieñ cruzy coo ru queꞌ Jesúz, to me lad-drech no sto me lad-ṟevez. 34 Were günino Jesúz Dioz, ra me lee:

―Dad, psiaaḻladzyiꞌ xguîlquie yâme. Porni nehx nann yâme bia gatzoo yâme.

No luxu, güdiiz soldad yahc shab Jesúz, güloo yâme suert lehdy bwieꞌ yâme dxu xlad guiaꞌn cad tohbyu. 35 Bydzeꞌ meññ uga ni gawieꞌ. Zu guxtisy yahc gawieꞌ no gatzuburl yâme leeme, ne yâme:

―Zrieñ meññ bislaa me lee. Naꞌ guislaa me leegahcme, güieꞌ nó bâḻ uliu leeme Crist, ni güle Dioz lee.

36 Gübigy soldad yahc gatzuburl leeme zegahc, gadee yâme vinagyr goo me. 37 No ra yâme leeme:

―Bâḻ xṞeiy meññ-Isṟael lii, bislaa lii gahc.

38 No ihqy cruzy ru queꞌ me lo, queꞌ letrer ni güyaa no didz-griegü, latíṉ, no didz-hebreu, ne: NIRIEꞌ WE XṞEIY MEÑÑ-ISṞAEL.

39 Günii to meññ-ptzoo ni dirquihñ ni queno me lee, ra leeme:

―Bâḻ uliu Crist lii, pchuꞌ lii gahc de ru queꞌy, no pchuꞌ noꞌ zegahc.

40 Were güdeḻy sto zâ-meññ-dirquihñ me, ra leeme:

―Di rdzie dxiꞌy Dioz‑e, rwiehguiꞌ tohzy ru quee nó no leeme lehdy gaty nó. 41 Nó quee nó neꞌ porni rahp nó doḻ, no leewe gaguix nóu neꞌ. Per mpyquie-rieꞌ nehx ptzoo me mbehty ni dirquihñ.

42 No luxu, ra me:

―Jesúz, guitsêlohdyu lii de naa dze-sulo ctzooy mdad.

43 Ra Jesúz leeme:

―Gapyaꞌ lii ni uli: Dzêrieꞌ gahc‑e tzuy no naa to ru mos.

44 Beeiy ribygue, güyuꞌ guibcawy gydo lo guiedzylie no xtâ las-trez udzie, 45 porni gucncawy lo ncübidz; no bygaax lar-rsaagü glaꞌy idoró, byruuw chohp laꞌy. 46 Lo gahc hor-caḻ pquee Jesúz riedz, ne me:

―Dad, lo ñay‑e rsanaꞌ dguîlmbahñaꞌ.

No günihzy me ze, guhty gahc me.

47 Hor-bwieꞌ capitaṉ-ṟoman gyre niwé yahc, güluguia me Dioz, ne me:

―Uli gahcxu we, mpyquie-rieꞌ meññ-tziaawy-e leeme.

48 No ru ba bwieꞌ gyre meññ de ni ba guhty Jesúz no gyre ni guhc hor-guhty me, were zia yâme lé rbihby lidzydoo yâme. 49 Per meññ-rzaclo me lee no zrieñ meññ-ngünaa ni náḻ leeme dze-byruu yâme lo ṟegioṉ-Galilea, zu yâme ziht gá, gawieꞌ yâme ni gayahc.

50 Güyuꞌ to mpyquie ni le José, xguiedzy me le Arimatea, nuw lo ṟegioṉ-Judea, no rahc cuent leeme lahd xjefy meññ-Isṟael. Meññ-tziaawy leeme no rtzoo me ni nac xñahzû. 51 Mpyquie-rieꞌ naꞌ, zegahc gabiahz me gydzihñ de ni rtzoo Dioz mdad, no nehx biuꞌladzy me mod-ptzoo zrieñ jefy yahc diidz, ni mod-ptzoo yâme. 52 Leeme güya bignab gdee Pilat lgar glety me xcuerp Jesúz lo cruzy. 53 Bylux gülety me Jesúz, pchaḻ me lee lahr no biycaꞌdzy me lee leññ to baa ni bydahñ coo to guielaꞌ, ru dgueññ ziaꞌ igaꞌdzy ndruhty. 54 Nirieꞌ guhcu dze-rzaa yâme gyre ni yquihñ dze-risladzy yâme, ni ba sulo.

55 No meññ-ngünaa ni byruu tohzy no leeme lo ṟegioṉ-Galilea, güya yâme zegahc, bwieꞌ yâme ru nash ba-wé no bia mód bygaꞌdzy Jesúz. 56 Byluxu, gubyguiat yâme ruꞌ yuꞌ, bistziaawy yâme ceitnixye no zrieñ ni nixye. No luxu, güdahp yâme dze-risladzy meññ, mod-ne leiy.