1 Luxu güyuꞌ Jesúz leññ barcü, no güdedy me stiby chehsh nisdoo par bydzihñ me ru nac xguiedzy me. 2 Uga bidno meññ to mpyquie-gayac-ure ni di raḻ gyniꞌby mbehty, nash me to lo camill; hor-bwieꞌ Jesúz ulihbu rlíladzy yâme, ra me mpyquie-gayac-ure:

―Byxihly naꞌ, shiꞌñ; xguîlquiey ba psiaaḻdadzyaꞌ gyreu we.

3 Chohp tzonn de lahd muextr ni ruuḻ yahc xleiy Moiséz, ganii leññ ihqy yâme: “Mpyquie-rieꞌ rnii me didz-nahcsy contr Dioz.” 4 Per Jesúz nann me bia ganii leññ ihqy muextr yahc. Were ra me leeyâme:

―¿Bia nacu nu guîlrieñ-nadz leññ ihqy laꞌd? 5 ¿Bia leeu ma nehx ngann, ñapyaꞌ: “Gyre xguîlquiey ba psiaaḻdadzyaꞌ”, o ñapyaꞌ: “Biahsiꞌ no güzeꞌ”? 6 Naa, Mpyquie-Pshahl Dioz Lee, glun laꞌd beeiy rsiaaḻdadzyaꞌ xguîlquie meññ.

Were ra me mpyquie-di raḻ gyniꞌby:

―Biahsiꞌ, gülesy xcamilliꞌ, no gübiꞌ xiryuꞌy.

7 No biahs mpyquie-wé, zia xiryuꞌ. 8 Hor-bwieꞌ meññ nirieꞌ, ptzunadz yâme no güluguia yâme Dioz porni pshahl me meññ-beeiy ctzoo zâ niwé.

9 Byruu Jesúz de uga za me sto lad, no bwieꞌ me to mpyquie ni le Mateu, dxie gacuquix mpuezd meññ. Were ra Jesúz leeme:

―Güde, náḻiꞌ naa.

No biahs gahc Mateu, za me no Jesúz.

10 No hor-nu Jesúz leññ yuꞌ gayahgü, bydzihñ xtahl meññ-rcuquix mpuezd no zegahc zrieñ meññ-rtzoo gyrehzy guîlquie, gürie yâme tohzy ruꞌ miax no Jesúz no xmeññ me. 11 Hor-bwieꞌ meññ-nac yahc fariseu dxie Jesúz lahd meññ-rieꞌ yahc, günabdiidz yâme xmeññ me, ra yâme lee:

―¿Bia nacu rahgü xmuextr laꞌd tohzy no meññ-rcuquix mpuezd no zrieñ meññ-rtzoo gyrehzy guîlquie?

12 Hor-bieññ Jesúz nirieꞌ, ra me leeyâme:

―Meññ-nzaꞌg nehx rquihñ tza lo doctor, mazyg meññ-gayac-ure. 13 Lâ tza, no lâ gyzeedy ni ganii lo Guehtzy ru queꞌ xtiidz Dioz, ru neu: “Ni riuꞌdadzyaꞌ la, lâ guioob zâ-bynech laꞌd, no dac aaḻ yquee laꞌd gue ni gacnixye par to gun.”s9:13 Os. 6:6 Nehx biaḻaꞌ zidyobyaꞌ meññ-tziaawy, mazyg meññ-guîlquie we zidyobyaꞌ, lehdy csaan yâme ni nahcsy ni nac yâme.

14 To dzé biahd xmeññ Juaṉ ni rchôbnihs, ra yâme Jesúz:

―¿Bia nacu noꞌ no meññ-nac yahc fariseu rtzoo noꞌ ayun, no xmeññiꞌ yac?

15 Ra Jesúz leeyâme:

―Ru nu meññ lo guîltziahl, ¿nehxni beeiy ñuꞌ yâme trixd no nu ziaꞌr ñoby-gayidzña lahd yâme? Per ziaad dzé ru naa ni zidguiahc beeiy to ñoby-guidzña, ba dgueññaꞌ lahd yâme, were ctzoo yâme ayun no nehx zoo zahgü yâme.

16 ’Ndruhty nehx nquieedy diby laꞌy lar-coby to lo lar-gush, porni lar-coby nguiixu lar-gush no ba ma ñacxroꞌ ru nyuhx. 17 No ndruhty nehx rguꞌ vin ni leer güyaa leññ to bush-guiedy ni ba nigush, porni bâḻ leeu ñahcu ze la, nchiahzu bush-guiedy ni ba nigush, no nnitylou vin no zegahcu bush. Leewe vin ni leer güyaa rahpu de ni tzuw leññ bush-guiedy ni ncoby, no were gyropu nehx zahc mbehty.

18 Mientr ganino Jesúz leeyâme, bydzihñ to mpyquie-nu idoo xcargü, bisshiby me lo Jesúz, no ra me lee:

―Dindzabdxuuraꞌ leer gá guhty; per bâḻ lii guiaadiꞌ no cshob ñay chehsh me la, zbahñ me gyzac‑e.

19 Were biahs Jesúz, byruu me za me no xmeññ me, ziyno mpyquie-caḻ leeyâme. 20 Tohzydzi bydzihñ to ngünaa, ba rahp tzipychop ihz gayac-ure me de guidzngünaa, gübigy me ñaz-chehsh Jesúz lahd meññ no güdan me nieꞌ shab; 21 porni ganii leññ ihqy me, ne me: “Bâḻ canzaꞌ shabz me, ziaḻaꞌ we.” 22 Jesúz naꞌ, bidzguiat lo me, bwieꞌ me ngüna-wé, no ra me lee:

―Ba di cu ihqyiꞌ, shiꞌñ; porni rlíladzyiꞌ naa, leewe ba biaḻiꞌ.

No lohg hor-wé, biaḻ gahc ngüna-caḻ.

23 Hor-bydzihñ Jesúz xiryuꞌ mpyquie-nu idoo xcargü, bwieꞌ me ba nu musycü ni gacuadz bdzia, no gayuun meññ-xtahl lé rquee yâme riedz, 24 ra me leeyâme:

―Lâ gyruu; dac‑e guhty ndzabwiñ, nishcahsy me we.

Meññ-caḻ yahc naꞌ, aaḻ byxidzyno yâme Jesúz hor-günii me ze; 25 were güloo Jesúz leeyâme stziuꞌ, no güyuꞌ me no günahzy me ña ndzabdxuur, no biahs gahc me gübahñ me. 26 No gydo lo ṟegióṉ ru nu yâme, gunn meññu.

27 Hor-byruu Jesúz de uga, náḻ chohp meññ-ngaḻ leeme, gaquee riedz:

―¡Lii ni ziaad de lo xfamily ṟeiy-Davit, bioob noꞌ!

28 Hor-güyuꞌ Jesúz leññ yuꞌ, bydzihñ meññ-caḻ ru dxie me, were günabdiidz me leeyâme, ra me:

―¿Rlíladzy laꞌd beeiy csiaḻaꞌ lo laꞌd la?

Ra yâme leeme:

―Rlídadzy noꞌ, Señor.

29 Were güdan Jesúz lo yâme, no ra leeyâme:

―Gacu mod-rlíladzy laꞌd.

30 No byxal gahc lo yâme, no bwieꞌ gahc yâme. Ra Jesúz leeyâme:

―Gax lâ gann, na di gu laꞌdu lo ndruhty dxu psiaḻ laꞌd.

31 Per byruhzy yâme de uga, no gydo lo ṟegióṉ bie yâme diidz lo meññ ni ptzoo Jesúz.

32 Bylux byruu meññ-caḻ yahc ru dxie Jesúz, bydziñno zrieñ meññ to ngop ni nu mbenahcsy lee. 33 Scâsy güloo Jesúz mbenahcsy, ngop guzlo gahc günii me. Rtzunadz meññ ni bwieꞌ yahc ni guhc, no ne yâme:

―Nito dgueññ güieꞌ meññ zâ nirieꞌ gydo ru nu meññ-Isṟael.

34 Per meññ-nac yahc fariseu ne yâme:

―Mpyquie-rieꞌ beeiy rboo me mbenahcsy meññ, porni bêndzab gahc‑e ni rtzoo mdad gyre mbenahcsy, racno leeme.

35 Za Jesúz gyre ciuda no zrieñ guiedzy, galuu me meññ leññ idoo gyre lad. Gayuno me meññ xtiidz Dioz no de ni rtzoo Dioz mdad, no gasiaḻ me meññ-gayac-ure de gyre guîlguihdz. 36 Hor-bwieꞌ me meññ, bioob me leeyâme, porni nehx nann yâme bia ctzoo yâme no porni zidguiahc yâme beeiy xiily ni nehx rahp dxu güieꞌ lee. 37 Luxu ra me xmeññ me:

―Gapyaꞌ laꞌd ni uli, xtahl dziiñ‑e nu, porni xtahl meññ gabiahz guieññ xtiidz Dioz, per meññ-gatzoo xtziiñ Dioz la, uxiee yâme. 38 No leewe, lâ gnab lo Dioz ni nac xbixwaan dziiñ, lehdy cshahl me meññ-tziyno xtiidz me byzaꞌzy.