1 Byluxz günii Jesúz ze, byruu me lo ṟegioṉ-Galilea no za me lo ṟegioṉ-Judea ni riaꞌn stiby chehsh guiagü-Jordáṉ. 2 Xtahl meññ náḻ ru za me, no psiaḻ me xtahl meññ-gayac-ure.

3 No lahd meññ-nac yahc fariseu güya gayo xnahc nsiahb yâme Jesúz no to ni ngann, no ra yâme leeme:

―¿Xñahzu we la, bâḻ ntzily to mpyquie guîltziahl no tziahl me por nitisy doḻ?

4 Ra Jesúz leeyâme:

―¿Nehx ruuḻ laꞌd ni ziaad lo Guehtzy ru queꞌ xtiidz Dioz la, ru neu dze-bzaa Dioz meññ, “bzaa me mpyquie no bzaa me ngünaa”? 5 No ra me: “Leewe rruu to mpyquie coo xtad no coo xmam, no tzu me no tziahl me, no were ba gyrop yâme gac beeiy gahc tohzy meññ.”b19:5 Gn. 2:24 6 No leewe, ba dac‑e chohp meññ leeyâme, mazyg ba beeiy gahc tohzy meññ‑e leeyâme. Leezuwe, ni ba ptzoo Dioz lee tohzy, di ctzily ndruhty leeu.

7 Ra meññ-nac yahc fariseu Jesúz:

―Were, ¿bia nacu ne Moiséz beeiy gzaa mpyquie to guehtzy ni gynii ba ptzily me guîltziahl, no gdee meu tziahl me, no luxu csaꞌn me lee?

8 Ra Jesúz meññ-nac yahc fariseu:

―Bdee Moiséz ñahz rtzily laꞌd guîltziahl porni nahdy xguîlmbahñ laꞌd; per glo dze-güyaa guiedzylie, nehx ne Dioz ñahcu ze. 9 No naa gapyaꞌ laꞌd, nitisy dxu ctzily guîltziahl no ndzab-tziahl, nîcze nehx güzeno ngüna-rieꞌ sto ni nehx tziahl me lee, no guidzña me no sto ngünaa la, gatzoo mpyquie-rieꞌ guîlquie; no dxu guidzña no to ngünaa ni gübily xguîltziahl la, guîlquie gahc‑e zahcu par lee.

10 Ra xmeññ Jesúz leeme:

―Bâḻ neꞌy ze leeu la, ma mos‑e nehx guidzña ndruhty.

11 Ra Jesúz xmeññ me:

―Dac‑e gyre meññ beeiyu lee nehx nidzña, mazyg nunzy meññ ni gdee Dioz lsenzy, wé we beeiy ctzoo ze. 12 Nu mpyquie-nehx ridzña porni glo guhl yâme nu ni rca gap xiiñ yâme, no nu mpyquie-nehx ridzña porni meññ pca de ni gap xiiñ yâme, no nu meññ-nehx ridzña porni riuꞌladzy yâme ctzoo yâme nunzy xtziiñ Dioz ni rtzoo mdad. Dxu beeiy ctzoo ze, ctzoo leeu.

13 Güiyno meññ mbiux par cshob ña Jesúz chehsh yâme no par gnab me lo Dioz por mbiux-rieꞌ yahc; per xmeññ Jesúz naꞌ, ndush yâme lo meññ-zidno mbiux. 14 Were ra Jesúz leeyâme:

―Lâ gdee ñahz guiaad mbiux ni zidyo naa, no di yca laꞌd leeyâme; porni dxu gac scâsy mbiux-rieꞌ yahc la, par leeyâme we ru rtzoo Dioz mdad.

15 No bylux pshob ña me chehsh mbiux, luxu byruu me de uga, no za me.

16 Güya to mpyquie-ṟicü, no ra me Jesúz:

―Muextr, naa nannaꞌ meññ-tziaawy lii. ¿Bia ni mos ntzon lehdy ñapaꞌ guîlmbahñ ni nehx zluhx?

17 Ra Jesúz leeme:

―¿Bia nacu rahbyiꞌ naa meññ-tziaawy? Ndruhty nehx meññ-tziaawy lee, mazyg nunzy Dioz. Per bâḻ racladzyiꞌ gapiꞌ guîlmbahñ ni nehx zluhx la, gyre ni rtzoo Dioz mdad ctzoo meññ la, ptzoo leeu.

18 Ra me Jesúz:

―¿Sca bia leeu?

Ra Jesúz leeme:

―Di igaꞌdyiꞌ meññ. Di senoy tziahl meññ. Di cuaniꞌ. Di gyniiy ni nehx uli de meññ. 19 Bzacbeeiy xtadiꞌ no xmamiꞌ; no bintzi zâ-bynechiꞌ mod-ndzi gahquiꞌ lii.c19:18-19 Ex. 20:12-16; Dt. 5:16-20

20 Ra mpyquie-caḻ leeme:

―Gyre nirieꞌ gatzon mod-ne glo nwiñaꞌ. ¿Bia sto gayaadzaꞌ?

21 Ra Jesúz leeme:

―Bâḻ racladzyiꞌ di gydzial mbehty doḻ chehshiꞌ la, güya, ptoꞌ ni rahpiꞌ, no bdee xmedyu ycaꞌ meññ-nehx rahp mbehty, were zahpiꞌ xtahl ni rsahc gybaa; luxu guiaadiꞌ, tzaꞌy no naa.

22 Hor-bieññ mpyquie-rieꞌ ni miꞌñ ziaꞌ lee ni ra Jesúz leeme, güyuꞌ me trixd za me, porni rahp me xtahl ni rsahc.

23 Were ra Jesúz xmeññ me:

―Gapyaꞌ laꞌd ni uli, modni ngann zahcu no to meññ ni rahp xtahl ni rsahc, ndee me ñahz ntzoo Dioz mdad leeme. 24 Gapyaꞌ laꞌd gyzac, ma nehx ngann ndedy to camell xguiehr igux que to meññ-ṟicü ndee me ñahz ntzoo Dioz mdad leeme.

25 Ru bieññ xmeññ me ze, modni gatzunadz yâme, no ne yâme:

―¿Dxu we naꞌ beeiy gylaa par tzu lo xñahz Dioz?

26 Bwiedzie Jesúz leeyâme, no ra me:

―Nehx ñaḻ ntzoo meññ nirieꞌ; per no Dioz, gyreu we beeiy.

27 Were ra Pedr leeme:

―Noꞌ psaꞌn noꞌ gyre ni güdahp noꞌ, no zo noꞌ ru zaꞌy. ¿Bia leeu naꞌ ycaꞌ noꞌ?

28 Ra Jesúz leeyâme:

―Gapyaꞌ laꞌd ni uli, dze-gydzee gyre cos mod-nac, lee we dze-ba naa, Mpyquie-Pshahl Dioz Lee, dxien to ru mos ru ctzon guîlguxtisy to lo guîlbyniꞌ, were laꞌd ni nac dmeññaꞌ lee, zbia laꞌd zegahc tzipychop lgar ru ctzoo laꞌd guîlguxtisy, no güieꞌ laꞌd ni nac gyre meññ-ziaad de lo xfamily gydiby tzipychop xiiñ Isṟael. 29 No nitisy dxu psaꞌn xiryuꞌ, behtzy o baḻ, byzan, xtad, xmam, tziahl, xiiñ, o xilyu por naa la, Dioz zdee leeme diby gayuu vuelt ma xtahl, no ycaꞌ me guîlmbahñ ni nehx zluhx. 30 Per xtahl meññ ni ma rsahc lahd meññ neꞌ la, zdzihñ dze-ma uxiee qysahc yâme; no xtahl meññ ni ma uxiee rsahc lahd meññ neꞌ, wé we ma qysahc.