1 Bydzihñ yâme stiby chehsh nisdoo ru rtzoo meññ-gadaren mdad. 2 Scâsy byruu Jesúz leññ barcü, biahd gahc to mpyquie ru zu me ni byruu lahd baa. No mpyquie-rieꞌ naꞌ, nu mbenahcsy lee, 3 no tirgahc nu me lahd baa. No ndruhty di raḻ glihby leeme, nîcze no caden. 4 Xtahl vuelt blihby yâme leeme no caden no blihby yâme nieꞌ me no to guiib, per rchug me caden no rlaꞌy me guiib, no ndruhty nehx beeiy rtzoo gan leeme lehdy ñudzie me. 5 Tirgahc dzé no guiaal, ganzeꞌ me chehsh dahñ no lahd baa, rquee me riedz, no rchug lady gahcme no guie-ndush. 6 Per ru bwieꞌ me Jesúz xtâ ziht, byxuunn me biahd me bidguisshiby me lo, 7 no gaquee me riedz ndip, ra me lee:

―¿Bia ryohbyiꞌ no naa Jesúz, Xiiñ Dioz-nu gybaa? ¡Rnabaꞌ lii por le Dioz di ctzoo csahquiꞌ naa!

8 Günii me ze, porni ba gu Jesúz leeme:

―¡Mbenahcsy, byruu mpyquie-rieꞌ!

9 No günabdiidz Jesúz leeme, ra me:

―¿Dxu ley?

Ra me:

―Dlen Legióṉ, porni xtahl noꞌ we.

10 No ptzunñaad me Jesúz di cshahl me mbe-wé yahc ziht de uga. 11 No gahsh uga chehsh dahñ nu xtahl ngutzy-gayahgü, 12 were ptzunñaad mbenahcsy yahc Jesúz:

―Cshahliꞌ noꞌ ru nu ngutzy, no gdeedyiꞌ ñahz tzu noꞌ leeyâmaꞌ.

13 No bdee Jesúz ñahz gacu ze, no byruu mbenahcsy mpyquie-wé, bictzu yahcu ngutzy. No ma-rieꞌ yahc, por gyre maꞌ beeiy chohp mily maꞌ, tohzydzi byxuunn gyre maꞌ byrîbydahñ yâmaꞌ to ruꞌ zaꞌn xtâ lo nisdoo, no wé leññ nisdoo pycawy yâmaꞌ, guhty yâmaꞌ.

14 Byxuunn gahc meññ-gayahp ngutzy, zigyne yâme meññ leññ guiedzy no meññ ni nu yahc dahñ. No güya meññ bigüieꞌ yâme bia leeu ni guhc. 15 Ru bydzihñ yâme ru zu Jesúz, bwieꞌ yâme mpyquie-wé ni güdahp xtahl mbenahcsy, dxie me no ba nutz shab me no ba nza xguîlriehñ me, no bydzie yâme. 16 No meññ-bwieꞌ yahc leeu, bie yâme diidz lo meññ ni guhc mpyquie-rieꞌ ni güyuꞌ mbenahcsy lee, no ni guhc ngutzy. 17 No guzlo ptzunñaad yâme Jesúz gyruu me de ru rtzoo yâme mdad.

18 No lóni gayuꞌ Jesúz leññ barcü, ptzunñaad mpyquie ni güyuꞌ mbenahcsy lee ndee Jesúz ñahz ña me ru za. 19 Per nehx bdee Jesúz ñahz, mazyg ra leeme:

―Gübiꞌ xiryuꞌy ru nu xfamilyiꞌ, no bie diidz lo yâme xnahc xroꞌ ni ptzoo Dioz no lii, no mod-bioob me lii.

20 Luxu za mpyquie-rieꞌ, no guzlo bie me diidz lo meññ ni nu yahc gyre guiedzy lo ṟegióṉ ni le Decápolis xnahc xroꞌ ni ptzoo Jesúz no leeme. No ptzunadz gyre meññ-wé yahc.

21 Gyzac ru güdedy Jesúz leññ barcü stiby chehsh nisdoo, bydohp xtahl meññ guingybi me no biaꞌn me coo nisdoo. 22 Tohzy bydzihñ to de lahd meññ-nu idoo xcargü, le Jair. No scâsy bwieꞌ me Jesúz bisshiby me lo, 23 no di rbiahz ni ganab me, ra me lee:

―Dindzabdxuuraꞌ ba gayehty. Güde, guidshob ñay chehsh me lehdy guiaḻ me, di gaty me.

24 Were za Jesúz no leeme, no náḻt xtahl meññ leeme, lé raꞌñ yâme leeme. 25 Lahd meññ yahc naꞌ, za to ngünaa ba rahp tzipychop ihz gayac-ure me de guidzngünaa. 26 No modni gazacno me ria me xtahl lo doctor, no ba bisree me gyre ni güdahp me, no nehx riaḻ xguîlguihdz me, aaḻ ma gayahcu. 27 Ru bieññ me bie meññ diidz de Jesúz‑e naꞌ, gübigy me ñaz-chehsh Jesúz lahd meññ yahc, no güdan me lo shab, 28 porni ganii leññ ihqy me, ne me: “Bâḻ canzaꞌ shabz me, ziaḻaꞌ we.” 29 No biandzie gahc xguîlguihdz me; no bieññ me ba biaḻ me. 30 Hor-wé gahc bieññ Jesúz byruu poder leeme ni rsiaḻ meññ. Were gubyguiat me no güliahz me gawieꞌ me lahd meññ, no ra me:

―¿Dxu güdan lo dshabaꞌ?

31 Ra xmeññ me leeme:

―Gawieꞌ gahquiꞌ gayaꞌñ meññ lii, no neꞌy: “¿Dxu güdan lo dshabaꞌ?”

32 Per gawieꞌ Jesúz guingybi me lehdy güieꞌ me dxu güdan lo shab me. 33 Were ngüna-wé naꞌ, gadzie me lé rzîbyyoob me, no ba nann me bia guhc me, gübigy me no bisshiby me lo Jesúz, no ra me lee gyre ni uli. 34 Ra Jesúz leeme:

―Shiꞌñ, porni rlíladzyiꞌ naa, leewe ba biaḻiꞌ. Zaꞌgru güya naꞌ; ba biaḻiꞌ we de xguîlguihdziꞌ.

35 Ganii ziaꞌ Jesúz ze, bydzihñ meññ ni byruu xiryuꞌ mpyquie-nu idoo xcargü ni zidne yahc, ra yâme leeme:

―Xindzabdxuuriꞌ ba guhty. ¿Par bia gazacnñaadriꞌ Muextr?

36 Per nehx bylaby Jesúz ni ne yâme, ra me mpyquie-wé ni le Jair:

―Di gydziehbyiꞌ; bylíhzyladzyiꞌ.

37 No nehx bdee me ñahz ña zrieñ meññ no leeme, nunzy Pedr, no Jacob no Juaṉ behtzy Jacob. 38 Bydzihñ me xiryuꞌ Jair, no bwieꞌ me nyetz meññ no gayuun meññ lé rquee riedz. 39 Güyuꞌ me leññ yuꞌ, no ra me meññ-caḻ yahc:

―¿Bia nacu nyetz laꞌd no gayuun laꞌd zehdy mdid? Ndzabdxuur dac‑e guhty me, nishcahsy me we.

40 Aaḻ gaxidzyno yâme Jesúz. Per leeme naꞌ, güloo me gyre meññ stziuꞌ, no luxu güyuꞌ me no xtad ndzabdxuur no xmam no xmeññ me leññ yuꞌ ru nash ndzabdxuur. 41 No günahzy Jesúz ña ndzabdxuur, no ra me lee:

―Talita, cumi ―ni rnii ne: Ndzabdxuur, lii we gayapyaꞌ, biahsiꞌ.

42 No biahs gahc ndzabdxuur no güzeꞌ gahc me, tzipychop ihz rahp me. No modni rtzunadz gyre meññ ru bwieꞌ yâme bispahñ Jesúz ndzabdxuur. 43 Per ra Jesúz leeyâme, gax lâ gann, di gu yâmeu lo ndruhty. No ra gahc Jesúz leeyâme gdee yâme ni gahgü ndzabdxuur.