12
Ejempl xchieñ meññ ni ptzoo xtziiñ blatzy
(Mt. 21:33-46; Lc. 20:9-19)
1 No guzlo Jesúz günino me meññ-wé yahc ndaagü lo diidz, ra me leeyâme:
―Güyuꞌ to mpyquie, bdziib me blatzy to lo xroꞌ lyu, no ptahgü me guingybiu; luxu güdahñ me to guieryu ru gyxii blatzy, no bzaa me beeiy to yuꞌ ni nsuu lehdy ycuniꞌ xmeññ me ru gayahc dziiñ.
’No luxu bdee me lyu-rieꞌ zrieñ meññ-ctzoo dziiñu por glaꞌy, no leeme za me to ru ziht. 2 Dze-ba gayahc xicüsech blatzy‑e naꞌ, pshahl me to xmós me ziycaꞌ ni ctzulaꞌy yâme de lo cüsech ru nu meññ-caḻ yahc ni gatzoo dziiñ. 3 Per hor-bydzihñ me, aaḻ günahzy yâme leeme, güdihñ yâme leeme, no gubyguiat me zehzy. 4 Gyzac pshahl xbixwaan lyu sto mós, za; wé pshadguie yâme lee, gülaꞌy yâme ihqy, no gu yâme lee didz-nahcsy. 5 Were pshahl xbixwaan lyu sto mós, za; no nirieꞌ ba bgaꞌdy yâme lee; no mod-wé guhc no xtahl zrieñ mós; lahd yâme bydihñ no lahd yâme bgaꞌdy yâme lee.
6 ’No xbixwaan lyu rahp ziaꞌr me sto xmeññ me, merp xiiñ me ni ndzi me lee. Byluxu pshahl me lee, no ne me: “Stzoo yâme ni gynii me we, porni dshiñaꞌ leeme.” 7 Per meññ-caḻ ni gatzoo yahc dziiñ naꞌ, ra saꞌ yâme: “Mpyquie-ziaad, leeme we ni guian-no gyrenac dziiñ dze-ba guhty xtad me; igaꞌdy nó leeme lehdy gac dixchieñ nó gyreu.” 8 No günahzy yâme leeme, bgaꞌdy yâme leeme, no bicsaaby yâme leeme stziuꞌ de lyu ru dziib blatzy.
9 ’¿Biaz‑e naꞌ ctzoo xbixwaan lyu-caḻ ni bdziib blatzy? Guiaad me no igaꞌdy me meññ-rieꞌ yahc, no gdee me lyu-wé ycaꞌ zrieñ meññ.
10 ’¿Dgueññ guuḻ laꞌd lo Guehtzy ru queꞌ xtiidz Dioz la?, ru neu mod-rieꞌ:
Guie ni di ne meññ-rzaa yuꞌ nquihñ,
naꞌ lehbu ba nash squiñp ru raa guie ni ma rquihñ lehdy tzaa yuꞌ zaꞌgndzi.
11 Dioz ni rtzoo mdad, leeme we ptzoo leeu, no gatzunadz nó rwieꞌ nó leeu.h12:10-11 Sal. 118:22-23
12 Gucladzy meññ-caḻ yahc nnahzy yâme Jesúz, porni gunn yâme de leeyâme günii Jesúz nirieꞌ ni ndaagü lo diidz. Per wé naꞌ, gumm rdzie yâme meññ-guiedzy la, psaꞌn yâme leeme, no za yâme.
Xcuent ni riax mpuezd
(Mt. 22:15-22; Lc. 20:20-26)
13 Byluxu pshahl yâme lahd meññ-nac yahc fariseu no lahd xmeññ Herody, zignabdiidz yâme Jesúz, nwieꞌ yâme bâḻ nnii me behch lehdy ñuꞌ to mód nruu yâme contr leeme. 14 Bydzihñ meññ-rieꞌ, ra yâme Jesúz:
―Muextr, noꞌ nann noꞌ gyre ni rniiy ni uli we leeu, no nehx rlabyiꞌ ni ne meññ, porni nehx rwieꞌy meññ nunzy de xtziguia. Rluuy ni uli lguia ni racladzy Dioz ctzoo meññ. Leewe gu noꞌ: ¿Xñahzu we quix noꞌ mpuezd lo xṟeiy meññ-Ṟom la, o yac? ¿Rahp noꞌ de ni quix noꞌu la, o yac?
15 Per Jesúz naꞌ, nann me leeyâme we ni ne meññ-tziaawy lee nîcze nehx uliu. Were ra me leeyâme:
―¿Bia nacu riñlo laꞌd csiahb laꞌd naa no to ni ngann? Lâ gdee naa to medy-guiib lehdy güienu.
16 No bdee yâmeu, cuaꞌ meu; no ra me leeyâme:
―¿Dxu lo we nirieé, no dxu le queꞌ neé?
Ra yâme leeme:
―Xchieñ Cézr ni nac xṟeiy meññ-Ṟom.
17 Were ra me meññ-wé yahc:
―Lâ gdee Cézr ni nac xchieñ Cézr, no lâ gdee Dioz ni nac xchieñ Dioz.
No ptzunadz yâme no ni günii me.
Lguia ni gybahñ meññ ni ba guhty yahc
(Mt. 22:23-33; Lc. 20:27-40)
18 Luxu güya meññ-nac yahc saduceu lo Jesúz; no meññ-rieꞌ yahc naꞌ, ne yâme nehx zbahñ mînguty, ra yâme leeme:
19 ―Muextr, Moiséz bzaa me lo leiy, ne me: “Bâḻ to mpyquie rehty me no riaꞌn tziahl me, no nehx güdahp xiiñ la, behtzy gahcme guidzña no ngüna-rieꞌ lehdy gap xiiñ yâme xcuent behtzy me ni guhty.” 20 Naꞌ hôrrieꞌ, güyuꞌ gahdzy meññ-mpyquie behtzy saꞌ yâme; no ni nac lguhl lahd yâme bidzña me, per guhty me no biaꞌn tziahl me nehx güdahp xiiñ me. 21 Were bidzña ni byrohp yâme no ngüna-wé, per guhty me no zegahc nehx güdahp xiiñ me. No zegahc guhcu ni bionn yâme. 22 No mod-wé glo byzaꞌ gydiby gahdzy yâme, no nehx güdahp xiiñ yâme. No luxu zegahc guhty ngüna-wé. 23 Naꞌz naꞌ, dze-gybahñ mînguty, ¿dxu de leeyâme gac tziahl ngüna-wé, porni gydiby gahdzy yâme bidzña no leeme?
24 Were, ra Jesúz leeyâme:
―Nehx xñahzu ni ne laꞌd, porni nehx rzaclo laꞌd ni ne lo Guehtzy ru queꞌ xtiidz Dioz, no nehx nann laꞌd gyre mod-beeiyu Dioz. 25 Porni dze-gybahñ mînguty, ba nehx zidzña meññ no nehx zdee meññ guîltziahl xiiñ, mazyg gac yâme beeiy ángel yahc ni nu gybaa. 26 No lguia ni gybahñ mînguty naꞌ, ¿dgueññ guuḻ laꞌd ni bzaa Moiséz lo guehtzy ru bwieꞌ me rdahl biaḻ lo yag-guiahtz la? Ne Moiséz ra Dioz leeme: “Naa we xDioz Braṉ, Isac no Jacop ni güyuꞌ yahc ba xtze.”i12:26 Ex. 3:6 27 No Dioz naꞌ, dac‑e xDioz mînguty leeme, mazyg xDioz meññ-mbahñ‑e leeme. No leewe, nehx xñahzu mbehty gahc ni ne laꞌd.
Ni rtzoo Dioz mdad ctzoo nó ni ma rsahc
(Mt. 22:34-40)
28 To lahd muextr ni nann yahc xleiy Moiséz zaꞌgndzi bieññ me ni gaya meññ-rieꞌ yahc Jesúz no de ni psaꞌ Jesúz lo xtiidz yâme zaꞌgndzi; were gübigy me, no ra me Jesúz:
―¿Bia ni rtzoo Dioz mdad ctzoo nó ma rsahc de lo gyreu?
29 Ra Jesúz leeme:
―Ni rtzoo Dioz mdad ctzoo meññ, ni ma rsahc de lo gyreu la, leeu we nirieꞌ: “Bieññiꞌ, meññ-Isṟael: Nu tohzy ni rtzoo mdad, no leeme we Dioz ni rtzoo mdad nó. 30 Bzacbeeiy Dioz ni rtzoo mdad lii no gydo xguîlmbahñiꞌ, no gydo x‑almiꞌ, no gydo xguîlriehñiꞌ, no xtâ ru beeiyu lii.”j12:29-30 Dt. 6:4-5 Nirieꞌ we ni nier gahc lee de lahd ni rtzoo Dioz mdad ctzoo meññ. 31 No ni byrohpu beeiy gahc nirieꞌ: “Bintzi zâ-bynechiꞌ mod-ndzi gahquiꞌ lii.”k12:31 Lv. 19:18 Nehx nu zrieñ ni rtzoo Dioz mdad ctzoo meññ ni ma rsahc que gyrop nirieꞌ.
32 Ra muextr leeme ni ruuḻ xleiy Moiséz:
―Xñahzu ni güniiy, Muextr. No uliu mod-neꞌy. Nu tohzy Dioz, no nehx nu zrieñ dioz. 33 No racladzyu gzacbeeiy nó leeme no gydo dguîlmbahñ nó, no gydo dguîlriehñ nó, no gydo d‑alm nó, no xtâ ru beeiyu nó. No guîntzi dsâ-bynech nó mod-ndzi nó nó gahc. No nirieꞌ yahc‑e ma rsahc que gyre gun ni rdee meññ Dioz no ni rquee yâme gue ni gacnixye par leeme.
34 Ru bwieꞌ Jesúz günii muextr-ruuḻ xleiy Moiséz xñahzu, ra me lee:
―Nehx ziht nuy lehdy ctzoo Dioz mdad lii.
Luxu bydzie yâme nnabdiidzr yâme Jesúz.
¿Dxu xiiñ‑e ni nac Crist?
(Mt. 22:41-46; Lc. 20:41-44)
35 Lóni galuu Jesúz meññ leññ idoró, ra me:
―¿Bia mód‑e ne muextr ni ruuḻ yahc xleiy Moiséz, xiiñ ṟeiy-Davit‑e Crist? 36 Porni bisnii Spirt-Sant Davit gahc, ru ne me:
Günii Dioz, ra me Señor ni rtzoo mdad naa:
“Gürie dcoon lad-drech,
xtâ glo ctzon gyre meññ-rdziadzyno lii, guisshiby yâme loꞌy.”l12:36 Sal. 110:1
37 Davit gahc ra me ni nac Crist: “Señor ni rtzoo mdad.” No leewe, ¿bia mód‑e naꞌ ne meññ lguia ni nac Crist, xiiñ Davit‑e leeme?
No xtahl meññ gayieññ ni ganii Jesúz, no gaxilyno yâmeu.
Ganii Jesúz ni nac muextr ni ruuḻ xleiy Moiséz
(Mt. 23:1-36; Lc. 11:37-54; 20:45-47)
38 Lo hor-galuu Jesúz meññ, ra me:
―Lâ gap laꞌd no muextr ni ruuḻ yahc xleiy Moiséz. Riuꞌladzy yâme rzeꞌ yâme gutz yâme lar-duhñ ni rsahc. No hor-ganzeꞌ yâme leññ guiedzy, racladzy yâme gynii meññ diux leeyâme no xroꞌ guîlrzacbeeiy. 39 No ryo yâme ru ma mos rbia yâme leññ idoo ru rbia meññ-rsahc; no zegahc ryo yâme ru ma mos rbia yâme ru rotzie yâme no meññ. 40 Rboo yâme xyuꞌ ngünaviud, no sto lad ba zu yâme ruuḻ yâme laꞌy xtze, rluuw ulihbu meññ-tziaawy leeyâme. Per ma xroꞌ guîlné we ycaꞌ yâme.
Xgun to ngünaviud
(Lc. 21:1-4)
41 Dxie Jesúz gahsh ru dxie caj ru riuꞌ gun leññ xiydoró meññ-Isṟael, no gawieꞌ me mod-gaguꞌ meññ medy leññ caj. Xtahl meññ-ṟicü gaguꞌ xtahl medy. 42 No bydzihñ to ngüna-byzahby, güluꞌ me chohp medy-guiib ni uxiee rsahc. 43 Were pquee Jesúz riedz xmeññ me, no ra me lee:
―Ni uli gapyaꞌ laꞌd, ngüna-rieꞌ ni viud lee ma xroꞌ gun bdee que gyre zrieñ meññ ni güluꞌ medy leññ caj; 44 porni gyre yâme bdee ni ba biaꞌn; per ngüna-rieꞌ naꞌ, pobr‑e leeme, no bdee me gyrenac ni rahp me, ni ndedydzé gahc me.