1 Naabz gayuꞌ byniꞌ bydohp xjefy yahc bahl, no zrieñ mînguhl yahc ni nac guxtisy, no muextr ni ruuḻ yahc xleiy Moiséz no zrieñ meññ-nac guxtisy, ptzoo yâme diidz. No ziyno yâme Jesúz nliiby, no bdee yâme leeme lo ña Pilat. 2 Ra Pilat leeme:

―¿Lii we xṞeiy meññ-Isṟael la?

Ra Jesúz leeme:

―Lii we neu.

3 No xjefy yahc bahl naꞌ, gyrehzy ganii yâme contr Jesúz. 4 Gyzac ra Pilat leeme:

―¿Nehx neꞌy mbehty la, no gyre ni rnii yâme contr lii?

5 Per Jesúz ba nehx günii me mbehty; no leewe ptzunadz Pilat.

6 Lo lni-Pascü naꞌ, rislaa Pilat to meññ-nyagü lidzyguiib, nitisy dxu gnab meññ gylaa. 7 To mpyquie ni le Barrabáz, nyagü me lidzyguiib gydibyno zrieñ meññ-rdeḻy yahc ni bgaꞌdy meññ dze-pquelo yâme gobiern. 8 No bydzihñ xtahl meññ, guzlo ganab yâme Pilat ctzoo me mod-rtzoo gahc me, guislaa me to meññ-nyagü lidzyguiib. 9 Ra Pilat leeyâme:

―¿Racladzy laꞌd guislaan xṞeiy meññ-Isṟael la?

10 Porni nann me por guîlmvidy‑e bidno xjefy yahc bahl Jesúz lo me. 11 Per xjefy yahc bahl pquihly yâme meññ-xtahl gnab yâme guislaa Pilat Barrabáz. 12 Ra Pilat leeyâme gyzac:

―¿Biaz naꞌ racladzy laꞌd ctzon no ni ra laꞌd lee xṞeiy meññ-Isṟael?

13 Ra yâme lé rquee yâme riedz:

―¡Pquee leeme lo cruzy!

14 Ra Pilat leeyâme:

―¿Per bia ni dirquihñ ptzoo me?

Per leeyâme naꞌ, ma rquee yâme riedz, ne yâme:

―¡Pquee leeme lo cruzy!

15 No Pilat, gumm racladzy me ctzoo me ni ganii meññ-rieꞌ yahc la, bislaa me Barrabáz. Bylux ptzoo me mdad bydihñ Jesúz, no bdee me lee lehdy gaty lo cruzy.

16 No ziyno soldad Jesúz lo paty leññ palacy, ru ne yâme pretorio, no ptohp yâme gyre zrieñ soldad. 17 No bguhtz yâme Jesúz to lar-morad, no bzaa yâme to coron-guiahtz ni bdziib yâme ihqy me. 18 Luxu guzlo gatzoo yâme beeiy ni ganii diux leeme, no ra yâme leeme:

―¡Nehx zehty xṞeiy meññ-Isṟael!

19 No rguihñ yâme to var ihqy me, no rxîbyshieñ yâme leeme, no bisshiby yâme lo me beeiy ni gazacbeeiy yâme leeme. 20 Bylux ptzuburl yâme leeme, güloo yâme lar-morad ni bguhtz yâme leeme, no bguhtz yâme shab gahcme, no ziyno yâme leeme ru yquee yâme leeme lo cruzy.

21 Bydzil-lo yâme to mpyquie ni le Simóṉ lóhgni byruu me dahñ, xguiedzy me le Ciren, xtad Lejandr no Ṟufo. Günahzy yâme leeme, biee me xcruzy Jesúz.

22 Güiyno yâme Jesúz to ru le Gólgota, ni rnii ne: Xilgar Calaver. 23 No bdee yâme vin leeme ni nutz to ceitnixye ni le mirra, ñoo me; per nehx güee meu. 24 No hor-ba pquee yâme leeme lo cruzy, cuaꞌ soldad shab me, no güloo yâme suert lehdy bwieꞌ yâme dxu xlad guiaꞌn cad tohbyu.

25 Guhc beeiy las-nuevy yudzé, pquee yâme Jesúz lo cruzy. 26 No diidz ni bzaa yâme uga rnii bia nacu gaty me, neu: “XṞEIY MEÑÑ-ISṞAEL.” 27 No zegahc pquee yâme chohp meññ-gübaan lo zrieñ cruzy coo ru queꞌ Jesúz, to me lad-drech no sto me lad-ṟevez. 28 No guhcu mod-rnii lo Guehtzy ru queꞌ xtiidz Dioz, ru neu: “No pteedy yâme leeme por meññ-nzahby guîlquie.”o15:28 Is. 53:12

29 No meññ-rdedy yahc uga lé rquee yâme riedz, rtzuburl yâme, rchaḻ ihqy yâme, no ra yâme leeme:

―Lii ni ne nguiñguie xiydoró Dioz, no lo tzonn dzé nzaayu gyzac, 30 bislaa lii gahc, no biahtiꞌ lo cruzy.

31 No zegahcu xjefy yahc bahl no zrieñ muextr ni ruuḻ yahc xleiy Moiséz rtzuburl yâme leeme, no ra saꞌ yâme:

―Zrieñ meññ bislaa me lee, per naꞌ di raḻ guislaa me leegahcme. 32 ¡Guiaht Crist we lo cruzy naꞌ, ni nac xṞeiy meññ-Isṟael, lehdy güieꞌ nó no gylídadzy nó!

No gyrop meññ-queꞌ lo cruzy no leeme rtzuburl leeme zegahc.

33 Hor-bydzihñ ribygue naꞌ, güyuꞌ guibcawy gydo lo guiedzylie no xtâ las-trez udzie. 34 No lo hor-wé, las-trez, pquee Jesúz riedz-ndip, ne me:

―Eloi, Eloi, ¿lama sabactani? ―ni rnii ne: TDiozaꞌ, tDiozaꞌ, ¿bia nacu psaꞌniꞌ naa tohgaꞌ?

35 Lahd meññ-zu yahc uga, hor-bieññ yâme ni günii me, ra yâme:

―Lâ guieññ, gaquee me riedz profet-Elíaz.

36 No byxuunn to lahd yâme biglunihs me to sponj lo vinagyr, no pquee me leeu ihqy beeiy to gobgui, no bdee meu goo Jesúz, no ra me:

―Lâ gdee ñahz güieꞌ nó bâḻ guiaad Elíaz glety leeme lo cruzy.

37 Per Jesúz naꞌ, gyzac pquee me riedz ndip, no guhty gahc me. 38 No bygaax lar-rsaagü glaꞌy idoró xtâ guia no xtâ lo yu, no byruuw chohp laꞌy. 39 No capitaṉ-ṟoman ni zu lo Jesúz, hor-bwieꞌ me mod-pquee Jesúz riedz no guhty, ra me:

―Uli gahcxu we Xiiñ Dioz‑e mpyquie-rieꞌ.

40 Zegahc zu meññ-ngünaa uga, ziht gá gawieꞌ yâme. Lahd yâme zu Maríe-Magdalen, no Maríe xmam Jacob ni lwiñ no José, no Salomé. 41 Meññ-ngüna-rieꞌ yahc náḻ yâme Jesúz, no gucno yâme leeme dze-güyuꞌ me lo ṟegioṉ-Galilea. Zegahc nu zrieñ meññ-ngünaa uga, xtahl yâme, ni güya Jerusaléṉ tohzy no leeme.

42 Ba udziedoo we, dze-rzaa meññ-Isṟael gyre ni yquihñ yâme par dze-risladzy yâme, no guial-wé rizlo xguîlrisladzy yâme. 43 No lo hor-wé bydzihñ to mpyquie ni le José, xguiedzy me le Arimatea, no rahc cuent leeme lahd xjefy meññ-Isṟael no rsahc ni rnii me, no zegahc gabiahz me dze-ctzoo Dioz mdad. Nehx bydzie me, güya me, ra me Pilat bâḻ beeiy gdee ñahz glety me xcuerp Jesúz lo cruzy. 44 Pilat naꞌ, nlâdzy me mbahñ ziaꞌ Jesúz‑e; were pshalcaꞌ me capitáṉ, no ra me lee bâḻ ba guhty Jesúz. 45 Hor-ra capitáṉ leeme gyreu, were bdee me ñahz glety José xcuerp Jesúz. 46 Were bicshii José to lar-ro ni mos, no bylux gülety me xcuerp Jesúz, pchaḻ me lee lahr. Luxu, biycaꞌdzy me lee leññ to baa ni bydahñ chehsh guie coo to guielaꞌ, no ptiꞌx me to guie lehdy ptahgü me ruꞌ baa. 47 Maríe-Magdalen, no Maríe xmam José, bwieꞌ yâme bá glo bygaꞌdzy Jesúz.