1 Lóni pchuꞌ Xiily ni rzaꞌu gahdzy sell ni queꞌ guetzy-caḻ, güyudzie gybaa beeiy medy-hór. 2 Luxu bwien gydiby gahdzy ángel ni zu yahc lo Dioz, no bwien cuaꞌ yâme gahdzy trompet. 3 Byluxu biahd sto ángel, caꞌ me to pysiñguhsh de or, no güliahz me ruꞌ ltar. No cuaꞌ me xtahl yahl par yquee me gue leeu lo ltar de or ñaz-lo ru rbia ni rtzoo mdad. Ptzoo meu beeiy to gun tohzy no gyre ni rnab xmeññ Dioz leeme. 4 Xguhsh yahl ni garuu leññ pysiñguhsh ni caꞌ ángel lo ña zau lo Dioz, tohzy no gyre ni rnab xmeññ me leeme. 5 Luxu cuaꞌ ángel pysiñguhsh, bistzee me boo leññu ni cuaꞌ me lo ltar, no luxu blee meu lo guiedzylie; no günii ngüziee, no bieññ xtahl riedz, no byruu xgue ngüziee, no guhc to xu.

6 No gydiby gahdzy ángel ni caꞌ trompet, güyuꞌ yâme puexd par yquee yâmeu.

7 No pquee primer ángel trompet, no biahb gahc guioguie lo guiedzylie no gue ni nutz no rieñ. No to laꞌy de lo tzonn ni nac guiedzylie cueꞌ gue lee tohzy no yag-mble, no zegahcu guix-ngay.

8 Ni byrohp ángel pquee trompet, no lo nisdoo we biahb beeiy to dañ-ro ni gaqueꞌ gue lee. No to laꞌy de lo tzonn ni nac nisdoo guhcu rieñ. 9 No to laꞌy de lo tzonn cuib maꞌ ni nu lo nisdoo guhty, no to laꞌy de lo tzonn cuib barcü bynihty.

10 Ni bionn ángel pquee trompet, no byruu to mbial-ro leññ gybaa ni gaqueꞌ gue lee, no biahb me to lo ni nac tzonn cuib guiahgü, no zegahcu lo nzeꞌ ni gada yahc. 11 Mbial-wé le me Nlá. No to de lo tzonn cuib ru biahb me gucnlá, no xtahl meññ ni güee nze-wé ni gucnlá, guhty yâme.

12 Ni rzaꞌu tahp ángel pquee trompet, no gucné to de lo tzonn laꞌy ncübidz, no mboo, no mbial, no gucncawy yâme. Modé to de lo tzonn laꞌy yudzé nehx bdee ncübidz byniꞌ, no to de lo tzonn laꞌy guiaal nehx bdee mboo no mbial byniꞌ zegahc.

13 Luxu bwien to mpysie ni gazîbyshiily leññ gybaa, no bieññaꞌ ganii maꞌ ndip, ne maꞌ:

―¡Baazy dzii de gyre meññ ni nu lo guiedzylie ru yquee stzonn ángel trompet!