19
1 Bylux nirieꞌ bieññaꞌ ndip beeiy xriedz xtahl meññ gybaa, ne:
¡Tzuguia Dioz! TDioz nó ni rtzoo mdad, leeme we bislaa nó, no nu me lo guîlbyniꞌ, no leeme beeiyu lee,
2 porni rtzoo me guîlguxtisy xñahzu no ni uli;
no ba ptzoo me guîlguxtisy chehsh Babilony ni zidguiahc beeiy ngünaa ni rtzoo guîlquie no xtahl mpyquie,
ni pquihly gyre meññ ni nu lo guiedzylie güzeno ni nehx tziahl beeiy gahc ptzoo me.
No Dioz, ba güluquix me ngüna-wé de ni biꞌdy me xmeññ Dioz no pshieꞌ me xrieñ yâme.
3 Luxu gyzac ne yâme:
―¡Tzuguia Dioz! Guhsh ni rruu ru gaqueꞌ gue ciuda-wé ni zidguiahc beeiy ngüna-rieꞌ, nehx ziuꞌ dzé gydibylgaau.
4 No gydiby veinticuatr mînguhl ni rahc ni rnii no gydap ni mbahñ, bisshiby lé güdihsh ihqy lo yu, no güluguia yahc Dioz ni dxie ru rtzoo mdad, no ne yahc:
―¡Modé gacu! ¡Tzuguia Dioz!
5 Luxu bieññaꞌ byruu to riedz ru rbia ni rtzoo mdad, neu:
Lâ cuguia tDioz nó,
gyre laꞌd ni rtzoo xtziiñ me,
laꞌd ni rzacbeeiy leeme,
meññ-rahc ni rnii no meññ-ndruhty nehx nac.
Xguîltziahl Xiily
6 Luxu bieññaꞌ beeiy xriedz xtahl meññ, beeiy ru ziaad nisro, no beeiy rnii ngüziee ndip neu:
¡Tzuguia Dioz! Porni Señor ni nac tDioz nó ni beeiyu lee gyreu, leeme rtzoo mdad.
7 Gyxihly nó naꞌ, no tzu nó legyr, no cuguia nó leeme,
porni ba bydzihñ xguîltziahl Xiily,
no gyre xmeññ me ni zidguiahc beeiy ni gac tziahl me ba guctziaawy;
8 no ba bdee Dioz leeme lar-quitzy gutz me ni nyar no rzaagy.
Lar-rieꞌ ni rzaagy, leeu we ni zidguiahc beeiy ni mos yahc ni rtzoo xmeññ Dioz.
9 Were ra ángel naa:
―Bzaa nirieꞌ: “Dxu ñahc beeiy meññ ni psieññ yâme par guiaad lo guîlroo ni gac lo xguîltziahl Xiily.”
No zegahc ra ángel naa:
―Nirieꞌ we didz-uli ni ziaad de Dioz.
10 Hor-bieññaꞌ ze, bisshibyaꞌ lo ángel par nzacbeeiyaꞌ leeme. Per ra me naa:
―Di gzacbeeiyiꞌ naa; xtziiñ Dioz‑e rtzon beeiy gahc lii no gyre meññ-xirmaniꞌ ni nehx rsaꞌn de ni runo yâme meññ xtiidz Jesúz. Bzacbeeiy Dioz.
Porni xtiidz Jesúz, leeu we ni risnii xmeññ me ni runo leeu zrieñ meññ.
Meññ-dziib caball-quitzy
11 Luxu bwien nxal gybaa; no bwien to caball-quitzy, no meññ-dziib leemaꞌ le Ni Uli, no zegahc le me Nehx Risquiee; leeme rtzoo guîlguxtisy xñahzu, no rtzoo me gan lo guîlrdeḻy. 12 No rzaagy byzalo me, lé rluuw beeiy gue, no dziib xtahl coron ihqy me, no queꞌ letr leeme ni nac le me, per nunzy leeme rzaclo leeu. 13 Lahr ni nutz me bydiꞌu no rieñ, no le me: Xtiidz Dioz. 14 Gyre xmeññ me ni nu gybaa náḻ leeme, nutz yâme lar-quitzy ni rzaagy no nyaru, no dziib yâme caball-quitzy. 15 Ruꞌ me garuu to spad ni ndush par ctzuné me meññ-gyre nacióṉ, no stzoo me mdad leeyahc zaꞌgndzi no beeiy to var-guiib. No stzoo me guîlguxtisy mod-rshii meññ blatzy no nieꞌ leññ to ru rxiiu, no ycaꞌ yâme xguîlné Dioz ni beeiyu lee gyreu. 16 Lo shab me no lo cur me queꞌ diidz ni ne: “Ṟeiy ni rtzoo mdad gyre ṟeiy no rtzoo mdad gyre meññ ni rahc ni rnii.”
17 No bwien to ángel zob me lo ncübidz, no ndip pquee me riedz gyre mashiily ni rzîbydun leññ gybaa, ra me leeyâmaꞌ:
―Lâ te, no lâ gydohp ru gac to xroꞌ guîlrotzie ni gdee Dioz. 18 Lâ gahgü xbiahl xcuerp ṟeiy yahc, no xjefy yahc soldad, no meññ ni nehx rdzie mbehty, no xbiahl caball yahc, no gahc meññ-rbib leemaꞌ, no xbiahl xcuerp gyre meññ, guhcu meññ-nehx byzee o mós ni byzee, o meññ-ndruhty nehx nac o meññ ni rahc ni rnii.
19 No bwien ma-ro ni byruu leññ nisdoo no ṟeiy yahc ni nu lo guiedzylie, no gydiby gyre xsoldad yâme, bydohp par teḻyno yâme meññ-dziib caball-quitzy gydiby gyre xmeññ me. 20 Per bygaꞌ ma-ro no gahc profet ni risquiee ni ptzoo ni ngann yahc ñaz-lo ma-ro. No por ni ngann yahc ni ptzoo profet bisquiee me meññ ni cueꞌ xseñ ma-ro lee, no ni bzacbeeiy yahc xfigur maꞌ. Per ma-wé no profet ni bisquiee, diby mbahñ yahc, bráḻ yâme lee beeiy to lo guial de gue ni galahby de asufr. 21 No zrieñ yâme guhty no spad ni garuu ruꞌ meññ-dziib caball-quitzy, no gyre mashiily güdahgü xbiahl meññ-wé glo bydzeꞌ.