3
1 Were naꞌ, ¿bia leeu ni rlesyguia meññ-Isṟael?, ¿o rsahcu tzu señ lady meññ la? 2 Rsahcu de gyre gyzasy mód, porni nier gahc leeyâme psan-no Dioz xtiidz. 3 No nîcze lahd yâme nehx bzoob diidz mod-ne Dioz, ¿nehxni por leeu nisquiee Dioz no ni ba ne me, nîcze zrieñ di rzoob xtiidz me? 4 ¡Yac, dac‑e ze leeu! Dioz nehx nisquiee me, nîcze gyre meññ risquiee, mod-rnii lo Guehtzy ru queꞌ xtiidz Dioz neu:
Zieññ meññ ni uli we rniiy,
no rtzooy gan ru rruu meññ contr lii.c3:4 Sal. 51:4
5 Hôrrieꞌ gynin beeiy ni ñahcu cuentz diidz. Hor-rtzoo nó ni nehx xñahzû, racnou guieññ mod-rtzoo Dioz xñahzu la, ¿bia nnii nó? ¿Beeiy nnii nó nehx xñahzu rtzoo Dioz rshahl me guîlné dchehsh nó la? 6 ¡Yac, dac‑e ze leeu! Bâḻ Dioz nehx ntzoo ni nac xñahzû, ¿bia mód beeiy ntzoo me guîlguxtisy lguia meññ-nu lo guiedzylie?
7 No bâḻ dguîlrisquieen nquihñu lehdy ni uli ni ne Dioz tzuguiau mazy la, ¿bia nacu ne me nzaabyaꞌ guîlquie? 8 No bâḻ ñahcu ze, ¿bia nacu di ctzoo nó ni dirquihñ lehdy ndeedyu ni mos? No nirieꞌ we ni rnii lahd meññ ni rruu contr naa, ne yâme modé galun; per zâ meññ-wé yahc, xñahzu we gynihty yâme lo xguîlquie yâme.
Nehx nu ndruhty ni nehx nzahby guîlquie
9 Naꞌz naꞌ, ¿nó ni nac meññ-Isṟael, ma rsahc nó que zrieñ meññ la? ¡Yac, dac‑e ze leeu! Porni meññ-Isṟael no zegahc meññ-nehx meññ-Isṟael, guîlquie rtzoo mdad gyre yâme, mod-ba bluu noꞌu; 10 mod-rnii lo Guehtzy ru queꞌ xtiidz Dioz neu:
Ñaz-lo Dioz nehx nu meññ-tziaawy, nehx nu ndruhty gahc;
11 Ndruhty di ne guieññ,
ndruhty di ne gyo Dioz.
12 Gyre meññ ba psaꞌn Dioz beeiy ni bynityxñahz, gyre yâme pur meññ-dirquihñ lee.d3:10-12 Sal. 14:1-3; 53:1-3
Ndruhty nehx rtzoo ni nac xñahzû, nehx nu ndruhty gahc.
13 Ruꞌ yâme zidguiahcu beeiy baa ni nxal;
no guîlrisquiee rnii yâme.
Zidguiahcu beeiy ni nu xvenen mbaaḻ lo luhdz yâme;e3:13 Sal. 5:9; Sal. 140:3
14 tirgahc rgu-dia yâme no rzîbyxyahn yâme.f3:14 Sal. 10:7
15 Nshuhc nieꞌ yâme par dziygaꞌdy yâme;
16 rutisy za yâme rnidylo yâme meññ no rtzuné yâme meññ,
17 no nehx nann yâme xnahc tzu meññ dzie tziaawy.g3:15-17 Is. 59:7-8
18 Nehx rguꞌ ihqy yâme gzacbeeiy yâme Dioz.h3:18 Sal. 36:1
19 Nó nann nó gyre ni rnii xleiy Dioz, rniiu ze par meññ ni rtzoo leiy mdad lee, lehdy ndruhty di gynii nehx nu mbehty chehsh, no Dioz ctzoo guîlguxtisy lguia gyre meññ-nu lo guiedzylie; 20 porni ndruhty nehx zdedy beeiy ni nehx nzahby guîlquie lo Dioz porni rtzoo ni ne leiy, porni nunzy par gann nó nzahby nó guîlquie, leewe nu leiy.
Mod-rteedy Dioz meññ beeiy ni nehx nzahby guîlquie
21 Per naꞌ, Dioz ba bluu me mod-rteedy me meññ beeiy ni nehx nzahby guîlquie sinn ctzoo meññ ni ne leiy, no leiy gahc neu mod-wé, no zegahcu lo ni bzaa profet yahc. 22 Dioz rteedy me meññ beeiy ni nehx nzahby guîlquie, bâḻ gylíladzy yâme Jesucrist; rtzoo me modé no gyre meññ ni rlíladzy leeme, nitisy dxu nac yâme. 23 Gyre meññ ptzoo guîlquie, no ziht nu yâme de lo xguîlbyniꞌ Dioz. 24 Per Dioz, por xlaꞌy me, zehzy rteedy me meññ beeiy ni nehx nzahby guîlquie, porni Crist Jesúz bislaa leeyâme. 25 Dioz bdee me Crist guhc beeiy to gun, no byxieꞌ xrieñ me, no mod-wé güdix me xguîlquie meññ ni gylíladzy leeme. Guhcu ze lehdy guieññ rtzoo Dioz ni nac xñahzû, no nehx pshacladzy me pteedy me xguîlquie meññ zehzy ba xtze diaa. 26 Nirieꞌ guhcu ze zegahc, lehdy guieññ de ni Dioz rtzoo me ni nac xñahzû ni naꞌ, no nehx rahp me guîlquie, no rteedy me meññ beeiy ni nehx nzahby guîlquie porni rlíladzy yâme Jesúz.
27 ¿Bá glo naꞌ riaꞌn ni rniguia meññ? ¡Riaꞌnu diby lad! ¿Bia nacu? ¿Porni rtzoo meññ ni ne leiy la? Yac, mazyg porni rlíladzy meññ Crist. 28 No leewe ba nann nó hor-gylíladzy meññ Crist, rteedy Dioz leeyâme beeiy ni nehx nzahby guîlquie, no dac porni rtzoo yâme ni ne xleiy Moiséz.
29 ¿Nehxni Dioz nunzy xDioz meññ-Isṟael leeme? ¿Dâs‑e zegahc xDioz meññ-nehx meññ-Isṟael leeme la? Uliu xDioz yâme we leeme zegahc, 30 porni tohzy Dioz‑e nu. No meññ ni nu señ lady no rlíladzy yâme Crist la, Dioz cteedy leeyâme beeiy ni nehx nzahby guîlquie. No zegahc meññ-nehx nu señ lady no rlíladzy yâme Crist la, Dioz cteedy leeyâme beeiy ni nehx nzahby guîlquie. 31 Were naꞌ, ¿porni rlídadzy nó Crist, mboo nó diby lad ni ne xleiy Dioz la? ¡Yac, dac‑e ze leeu! Mazyg ma gatzoo nó ni ne xleiy Dioz porni rlídadzy nó Crist.