1 No leewe, rman, sca-ze ba bioob Dioz laꞌd, rnabaꞌ gac laꞌd beeiy to gun ni mbahñ ni gdee laꞌd Dioz, no ni gac nunzy par lehzyme, no ni gyxilyno me lee. Niwé we to ulihbu guîlrzacbeeiy ni gdee laꞌd leeme. 2 Ba di ctzoo laꞌd mod-rwieꞌ laꞌd rahc lo guiedzylie-rieꞌ ni naꞌ, mazyg lâ gdee ñahz ctzee Dioz mod-nac xguîlmbahñ laꞌd por guîlrieñ-coby ni rdee me laꞌd, no were zann laꞌd bia racladzy Dioz ni nac ni mos, no ni rxilyno me lee, no ni ulihbu nac xñahzû.

3 Por xlaꞌy Dioz ni bdee me naa, gapyaꞌ laꞌd di gynii leññ ihqy laꞌd ma rsahc laꞌd que ni ulihbu nac laꞌd, mazyg lâ güieꞌ laꞌd laꞌd gahc no to bueññ guîlriehñ, mdid-ba bylíladzy laꞌd ni ba bdee Dioz laꞌd. 4 Sca-ze dcuerp nó rahpu xtahl part, no to tohbyu gydze ru rquihñ, 5 no mod-wé gahc‑e nó, nîcze xtahl nó, per zidguiahc nó beeiy tohzy cuerp porni nu nó tohzy no Crist, no gumm zidguiahc nó beeiy xcuerp me la, gyre nó we nu tohzy.

6 Dioz biuꞌladzy me bdee me to to nó mod-beeiy ctzoo nó xtziiñ me. Bâḻ dxuhch de nó bdee Dioz lee to mod-beeiy guisnii me lee la, ctzoo me leeu mdid-rlíladzy me; 7 bâḻ dxuhch de nó bdee Dioz lee to mod-beeiy gacno me zrieñ la, gacno me zaꞌgndzi; bâḻ dxuhch de nó bdee Dioz lee to mod-beeiy gluu me la, gluu me zaꞌgndzi; 8 bâḻ dxuhch de nó bdee Dioz lee to mod-beeiy cu me xguîlriehñ zrieñ lehdy di gyrugan la, ctzoo me leeu zaꞌgndzi; bâḻ dxuhch de nó bdee Dioz lee to mod-beeiy gdee me behch la, di gacnguiby me; bâḻ dxuhch de nó bdee Dioz lee to mod-beeiy gap me cargü leññ idoo la, di qytzaab me mod-rtzoo meu; bâḻ dxuhch de nó bdee Dioz lee to mod-beeiy gacno me meññ-nehx rahp ni tedydzé la, ctzoo me leeu no guîlrxihly.

9 Lâ guîntzi saꞌ laꞌd no gydo guîlmbahñ. Lâ gboo ni dirquihñ diby lad, lâ ctzoo ni mos. 10 Lâ guîntzi saꞌ laꞌd mod-racladzyu guîntzi saꞌ meññ-rman; lâ gap xpeeiy laꞌd no gyxilyno saꞌ laꞌd.

11 Di gacntzaab laꞌd, lâ ctzoo xtziiñ Crist no gydo xguîlmbahñ laꞌd.

12 Lâ gyxihly porni gabiahz laꞌd ni ba ne Dioz; lâ ctibladzy hor-tedy laꞌd ni nadz; no lâ gnab lo Dioz tirgahc.

13 Lâ gacno xmeññ Dioz ni gayaadz ni tedydzé; lâ gdee xiryuꞌ laꞌd gydzihñ meññ-mbiuhz. 14 Lâ gnab lo Dioz cu xlaꞌy me meññ ni rtzoo rsahc laꞌd. Lâ gnab tzu yâme mos, no di cu-dia laꞌd leeyâme.

15 Bâḻ dxuhch gaxihly, lâ gyxihly no leeyâme. Bâḻ dxuhch gayuun, lâ guioob leeyâme.

16 Di gydieꞌ saꞌ laꞌd; di gyniguia laꞌd, mazyg lâ gac tohzy no meññ-nehx rahp mbehty. Di gynii leññ ihqy laꞌd ma nann laꞌd que zrieñ.

17 Ru ctzoo meññ laꞌd behch ni nahcsy, di ycuquix laꞌdu leeyâme. Mazyg lâ gnâbladzy laꞌd ctzoo laꞌd ni mos, güieꞌ meññ. 18 Xtâ ru beeiyu laꞌd, lâ gyo xnahc tzu laꞌd dzie tziaawy no gyre meññ. 19 Dirmanaꞌ ni ndzin leeyahc, di ycuquix laꞌd meññ no nitisy rtzoo yâme laꞌd, lâ csaꞌnu ladzyña Dioz, porni lo Guehtzy ru queꞌ xtiidz Dioz neu: “Naa we ycuquixaꞌ meññ; naa gdedyaꞌ guîlné leeyâme, ne Dioz.”n12:19 Dt. 32:35 20 No zegahc neu: “Bâḻ meññ-rdziadzyno lii galahn me, bdee ni gahgü me, o bâḻ gazaagyladzy me, bdee ni goo me; porni bâḻ ctzoo laꞌd modé la, zahcu beeiy to bial de guîlrtuꞌ par leeme.”o12:20 Pr. 25:21-22 21 Di gdeedyiꞌ ñahz ni dirquihñ ctzoou gan lii, mazyg ptzoo ni mos, lehdy ctzooy gan gyruu ni dirquihñ.