1 Bâḻ nu meññ ni uxiee ziaꞌ rlíladzy la, lâ gdee ñahz tzu yâme lahd laꞌd, per dac par teḻydiidz laꞌd no leeyâme lguia mod-rlíladzy yâme. 2 Porni nu meññ ni rlíladzy beeiy gahgü yâme nitisy leeu, no nu zrieñ yâme ni uxiee ziaꞌ rlíladzy, nehx rahgü yâme biahl, mazyg nunzy ni rdziib meññ lee. 3 Meññ ni rahgü nitisy leeu, di gynii me ma rsahc me que meññ ni nehx rahgü nitisy leeu; no meññ ni nehx rahgü nitisy leeu, di gynii me lguia meññ ni rahgü nitisy leeu, porni zegahc‑e xmeññ Dioz leeme. 4 ¿Dxu naquiꞌ par glaꞌdzyiꞌ ni nac meññ ni zrieñ dxu rtzoo mdad lee? Ni rtzoo mdad leeme we güieꞌ bâḻ mos o nadz gatzoo me. No stzoo me mos, porni Jesucrist ni rtzoo mdad, beeiyu lee gacno leeme ctzoo me ni mos.

5 No zegahc nu meññ rahp to dzé ni ne yâme ma nda, no nu zrieñ ne tohzy‑e nac gyre dzé. To to meññ racladzyu gann zaꞌgndzi lguia ni ne me xñahzu. 6 Dxu rahp to dzé ni ma nda, par Dioz‑e rtzoo meu; no dxu nehx rahp to dzé ni ma nda, par Dioz‑e nehx rtzoo meu. Dxu rahgü de gyreu, par Dioz‑e rahgü me, porni rdee me xquix Dioz; no dxu nehx rahgü de gyreu, par Dioz‑e nehx rahgü me, no rdee me xquix Dioz zegahc.

7 No ni to dlahd nó mbahñ par leegahc, no ni to dlahd nó nehx zehty par leegahc. 8 De ni mbahñ nó, par Dioz‑e mbahñ nó, o bâḻ gaty nó, par Dioz‑e gaty nó. Leewe, bâḻ mbahñ nó o gaty nó, par Dioz‑e nac nó. 9 Por nirieꞌ guhty Crist no gübahñ me, lehdy ctzoo me mdad meññ-ba guhty no meññ-mbahñ.

10 Per lii naꞌ, ¿bia nacu rlaꞌdzyiꞌ ni nac xirmaniꞌ? ¿No bia nacu rniiy ma rsahquiꞌ que xirmaniꞌ? Gyre nó we rahp de ni gydzihñ ru dxie Crist par ctzoo me guîlguxtisy dilguia nó. 11 Porni lo Guehtzy ru queꞌ xtiidz Dioz neu:

13 No leewe, ba di glaꞌdzy nó ni nac dsaꞌ nó, mazyg gap laꞌd to guîlriehñ de ni di gletyrxan laꞌd xirman laꞌd de ni rlíladzy me, o csiahb laꞌd lee ctzoo guîlquie. 14 Naa rlídadzyaꞌ Jesúz ni rtzoo mdad, no nannaꞌ nehx guîlquie lo Dioz bâḻ gahgü nó nitisy leeu; per bâḻ to rman ne nu ni nehx xñahzû gahgü me la, were par leeme we nehx xñahzu. 15 Per bâḻ por guîlrahgü ni rahgüiꞌ rtzunéy xirmaniꞌ la, ba dac‑e guîlndzi ni rtzooy. Na di por xguîlrooy gynihty meññ ni por lee guhty Crist. 16 Di gdee laꞌd ñahz gynii meññ chehsh ni nann laꞌd xñahzu rtzoo laꞌd, 17 porni mod-rtzoo Dioz mdad, dac‑e de ni rahgü xmeññ me o de ni roo yâme, mazyg de ni ctzoo yâme ni nac xñahzû, no de ni tzu yâme dzie tziaawy no gap yâme guîlrxihly por Spirt-Sant ni nuno leeyâme. 18 Dxu rtzoo nirieꞌ ni ne Crist, rxilyno Dioz lee, no zrieñ meññ tzúladzy mod-rtzoo me.

19 No leewe, gyo nó xnahc tzu nó dzie tziaawy, no ze zacno dsaꞌ nó gyniꞌzy de ni rlídadzy nó. 20 Na di naꞌ por xtoḻ guîlrahgü gynihty ni ba ptzoo Dioz. Gyre ni rahgü meññ ni uli we nyeu; ma nadz‑e por xtoḻ ni gahgü nó guiatrxan zrieñ de ni rlíladzy. 21 Ma mos‑e di gahgüiꞌ biahl, ni di gooy vin, ni di ctzooy behch ni ctzuné, o gletyrxan, o csiahb xirmaniꞌ. 22 Mod-rlíladzyiꞌ lguia niwé yahc, ptzoou entr lihzy no Dioz. ¡Dxu ñahc beeiy meññ ni nann xñahzu rtzoo no nehx ne rahp doḻ! 23 Per dxu rqueꞌladzy de ni gahgü, were ba rsiahb doḻ chehsh me leegahcme, porni rahgü meu no nehx rlíladzy me; no gyre ni ctzoo meññ no nehx gylíladzy la, ba guîlquie we leeu.