1 Ne wdee Jesus te lugar, wii Ne zu te mgyeey ne cheguel ngwlëë axtegue ne wal men. 2 Lex wnabdiiz yra xpén Ne lo Ne, re men:

―Maxter, ¿penak cheguel ngwlëë mén gwa ne wal men? ¿Pe por xdol xegwzan meno u por xdol ke meno?

3 Wke Ne re Ne:

―Let por xdoldet meno, ni let por xdoldet xegwzan meno, sinke le we nak ne por laa men yrunyoo ne rlaa Dëdyuzh. 4 Rap noo degne ylaa noo xdxiin Xuz noo ne wxaal noo zëëd noo, naaster ne benak nyenii, porke chene nitse lyu, rutre gakdet ylaa dxiin. 5 Myentras ne benak zu noo gyëzlyuree, noo nak bnii por yrandxee mén.

6 Wluzhse re Ne zenga, wxe Ne tebruu zhen lyu, lex kon zhen guin wzhexkwaa Ne bën, wgueeb No bzalo menngwlëë guin. 7 Lex re Ne lo men:

―Gutsa ga lo de rutank ne la Siloé. (Siloé rna Wxaal.)

Orguin wa men waa lo men. Chene wberee men, che rak rwii men. 8 Lex re yra mén ne nuu guex ledne nuu men no le yra mén ne nan ne ngwlëë men:

―¿Pe let laadet ménree nga rzob rnab goon lo mén?

9 Gwrol men re:

―Laa men ne.

Gwrol zeg men re:

―Let laadet men ne, noze rzaglo men.

Per wke mgyeey guin, re men:

―Noo ne.

10 Lex re men lo mgyeey guin:

―¿Pezee wlaa de ne che rak rwii de?

11 Wke men re men:

―Laa men ne la Jesus wzhexkwaa bën, wgueeb meno bzalo noo, lex na men lo noo: “Gutsa ga lo de rutank ne la Siloé.” Lex wa noo. Chene wluzh waa noo lo noo, che rak rwii noo.

12 Lex re men lo mgyeey guin:

―¿Gozh men naa?

Wke men re men:

―Nandet noo we.

13 Lex wano men mgyeey guin ne wyenii bzalo, lo yra men ne nak farisew. 14 Per kom dxe ne rne men-Israel nak dxe guin ne wzhexkwaa Jesus bën ne wgueeb Ne bzalo mgyeey guin ne wyenii bzalo, 15 por neguin wnabdiiz men ne nak farisew lo mgyeey guin gan pezee wyenii bzalo men. Wke men re men:

―Laa Jesus wgueeb bën bzalo noo; lex waa noo lo noo ne le we wyenii.

16 Orguin re gwrol men ne nak farisew:

―Mén ne wlaa negwa nakdet men xpén Dëdyuzh, porke rzaknondet men dxe ne rne be.

Per le gwrol men re:

―¿Pezee gun te mendol gan ylaa men gyelmilaguer gwa?

Noze wren wren rnii men. 17 Lex wberee men wnabdiiz men lo mgyeey guin ne wyenii bzalo, re men:

―¿Laa de naa, pe yna de txu nak mén gwa ne wlaa ne wyenii bzalo de?

Lex re mgyeey guin:

―Noo yna te profet nak men.

18 Per le yra men-Israel rlaleedxdet men ne ngwlëë mgyeey guin chekwlo no ne le men che rak rwii; lex wbëz men xegwzan mgyeey guin, 19 wnabdiiz men lo men, re men:

―¿Pe laa xpee de wa ne cheguel ngwlëë axtegue chene wal? Orrenaa, ¿pezee wlaa me ne che rak rwii mee?

20 Wke xegwzan mgyeey guin, re men:

―Noo nan noo ne xpee noo ne no ne cheguel ngwlëë me axtegue chene wal mee; 21 per nandet noo pezee wlaa me ne che rak rwii mee, ni nandet noo txu wlaa ne wyenii bzalo mee. Lo me gunabdiiz, che mengol mee; laa me yna gan pezee wyenii bzalo mee.

22 Re xegwzan mgyeey guin zenga por ne rdxe men men-Israel, porke che tese wak men-Israel ne kwaskyertee mén ne gue: “Jesus nak Crist”, ydeedetre men si tsa mén guin lenydoo. 23 Por neguin re xegwzan mgyeey guin: “Lo me gunabdiiz, che mengol mee.”

24 Lex wbëz men-Israel mgyeey guin ste, re men lo men:

―Gugon Dëdyuzh, belne nli rnii de, porke noo yra noo nanwen noo ne mendol nak mén gwa.

25 Wke mgyeey guin, re men:

―Noo nandet noo belne mendol nak men o nakdet zeg men mendol. Nonchee ne nan noo ne ngwlëë noo chekwlo no ne che rwii noo naaree.

26 Lex wnabdiiz men lo mgyeey guin ste, re men:

―¿Kox wlaa men? ¿Pezee wlaa men ne wyenii bzalo de?

27 Wke mgyeey guin, re men:

―Che na noo we lo de yra de, per rlaleedxdet de noo. ¿Penak rlaan de gon do ste? ¿Pe no de rlaan gak xpén men?

28 Lex wninyaan men lo mgyeey guin, re men:

―Laa de xpén men nak de, per le noo yra noo xpén Moises nak noo. 29 No nan noo ne Dëdyuzh wnii lo Moises. Per le mén gwa, ni nandet noo gan pa wzaa men.

30 Orguin wke mgyeey guin, re men:

―Te gyelgwzee nak negwa ne nandet de gan pa wzaa men, no laa men wlaa ne wyenii bzalo noo. 31 Nanwen be ne rkagyedyagdet Dëdyuzh xdiiz mendol, sinke le Ne rkagyedyag nonchee xdiiz mén ne ron xdiiz Ne no ne rlaa ne rlaan Ne. 32 Nunk gardet gyen xdiiz te mén ne ylaa ne gyenii bzalo te mén ne cheguel ngwlëë axtegue chene wal. 33 Belne let Dëdyuzhdet wxaal men, bet nyundet men gan nlaa men.

34 Lex re men lo mgyeey guin:

―Laa de axtegue ne wal de, kesentyent neey de dol; ¿pezee ne yneluu de noo?

Orguin wboo men mgyeey guin lenydoo.

35 Waknan Jesus ne wboo men mgyeey guin lenydoo, lex chene wzëël Ne men, re Ne lo men:

―¿Pe rlaleedx de XPee Dëdyuzh?

36 Lex re mgyeey guin lo Ne:

―Dechey, guzëët gan txuzh ne, chen ylaleedx noo zhaa.

37 Wke Ne re Ne:

―Che wii de zhaa. Laa zhaa nee kayuno de diiz.

38 Orguin wzuzhib mgyeey guin lo Ne, lex re men:

―Rlaleedx noo de, Dechey.

39 Lex re Ne:

―Zëëd noo nee gyëzlyuree chen gak gyelextis, chen gyenii bzalo menngwlëë, le yra men ne rwii gak men zegnak menngwlëë.

40 Ne won tebëd men ne nak farisew ne ndxin nga ne re Ne zenga, re men lo Ne:

―¿Peguin no noo nak ngwlëë?

41 Wke Ne re Ne:

―Belne nyak de ngwlëë, nyeeydet de dol. Per kom na de ne rwii de, laa de yra de rap dol por xdol de.