1 Te dxe ne rne men-Israel, wa Jesus gwdu ruxyuu te men ne nak farisew ne rnebééy. Le stebëd farisew noze kaleedx gan kox ylaa Ne. 2 Nga nes lo Ne zob te mgyeey ne nuu gyi. 3 Lex wnabdiiz Ne lo maxter ley no le lo yra men ne nak farisew, re Ne:

―¿Pe zak yneseyaken me te mengyiz dxe ne rne me u gakdeto?

4 Per noze chi wzob men yra men, wkedet men. Orguin wnëëz Ne nya mén guin, wneseyaken Ne men, lex re Ne lo men ne gya men. 5 Zhich guin re Ne lo men ne nak farisew:

―Belne nuu de te de gyab te xbur o te xyuz te leen pos dxe ne rne be, ¿pe tsaloodetgue de ma orgueguin?

6 Axtegue wkedet men.

7 Chene wii Jesus pezee rbe mén lo mezh ledne rzob mennon chen sob men, re Ne lo men:

8 ―Chene rbëz mén de ne tsa de te dooy, sobdet de ledne rzob men ne nondee, porke tegue ydxiin ste myooz ne mazre nondee ke laa de. 9 Lex chiid men ne wbëz de yrup de mén guin, yna men lo de: “Gudee ledne zob de sob ménree.” Rap de degne suli de nga; kon gyelentu tsa de sob de axtegue lultim. 10 Por neguin chene rbëz mén de ne tsa de te dooy, axtegue lultim gusob, chen chene chiid men ne wbëz de, yna men lo de: “Mig, gutee sob de ledne zob men ne nondee.” Zenga gyeep xeblaan de nes lo yra mén ne zob lo mezh. 11 Porke yra mén ne nuu lextoo non men, men guin gaknondet; le men ne nuu lextoo bet nondet, men guin gaknon.

12 No re Ne lo mén guin ne wbëz Ne ne tsa Ne gwdu:

―Chene rtsoow de te kwe o te xsëë, kwëzdet de men ne nak xmig de, ni men ne nak bech de, ni xparyent de, ni menrik ne nuu guex ruxyuu de, porke tegue no men ytsoow te nesyaa, lex kwëz men de tsa de gwdu ruxyuu men, chen ycheree men ne wdee de wu men. 13 Mazdee chene rlaa de te lni, gukwëz menprob, menbeer, mennguzh, menngwlëë, 14 chen zenga gaknzoon de, porke men guin gundet gan ycheree ne wlaa de por laa men; per chene yban yra mén ne wbán xnëz, Dëdyuzh yniiz ne ryal de.

15 Chene won te mén ne zobno Jesus lo mezh ne re Ne zenga, re men lo Ne:

―¡Nzoon men ne sob gu ledne rnebééy Dëdyuzh!

16 Lex re Ne lo men:

―Te mgyeey wzhexkwaa men te xsëë, lex re men lo ndalyaa mén ne tsa men gwdu ruxyuu men. 17 Chene le or ne guxsëë men wdxiin, wxaal men mén ne rlaa dxiin lo men, wa men re men lo yra mén guin: “Gutaa yra de porke le xsëë che nuu.” 18 Per wzelo men yra men wren wren ne rak men gyii. Men primer re: “Gyed wkandxee noo tebla lyu; rap noo degne tsa noo wii we. Ynab noo lo de ne gue de lo men ne gundet noo gan tsa noo.” 19 Le ste men re: “Gyed wkandxee noo gaay nëz yuz; le noo tsalaa ma preb. Ynab noo lo de ne gue de lo men ne gundet noo gan tsa noo.” 20 Le ste men re: “Gyed wtsëlnyandxee noo; gundet noo gan tsa noo.” 21 Chene wberee mén guin ne rlaa dxiin, re meno lo xpatron men. Wlaa xpatron men. Lex re xpatron men lo men: “Gyiid gyiidske gutsa runëzyu runëzlestee ne za lenlgyëz, gutsaxii menprob, menbeer, mennguzh, menngwlëë.” 22 Chene wberee mén guin ne rlaa dxiin lo men, re men lo xpatron men: “Dechey, che wlaa noo zegne wkyeen de, no benak nuur lugar lenyuu.” 23 Lex re xpatron men lo men: “Gutsa yde runëz wa no le yde runëznii; gukyeen stebëd mén chiid men, chen gyezaa lenxyuu noo. 24 Porke yna noo lo de ne ni te mén ne wbëz noo primer, gudet xsëëree ne wtsoow noo.”

25 Ndalyaa mén zanal Jesus; lex wcheree lo Ne, re Ne lo men:

26 ―Belne nuu mén zëdnal noo, per ryaandet men noo mazre ke lo xuz men, ke lo xnaa men, ke lo xewnaa men, ke lo zhiin men, ke lo bech men, ke lo bzaan men, o ke lo men laake men, gakdet gak men xpén noo. 27 Men ne zëdnal noo, per rlaandet men gak men sufrir, gakdet gak men xpén noo. 28 Yzoopo, belne nuu mén rlaan ylep te yuu ne nzhoo, ¿peguin rzobdet men ylebleedx men primer gan palal yrukaa we, chen kwii men gan pe zaglo ne nzen men por ne yzalo meno? 29 Tegue chene che wgyix men simyent, gundet men gan yzalo meno; yrandxee mén ne wii wgyix men simyent, selo men yzhidxno men men, 30 gue men: “Noze wzelo ménree wlep men yuuree, per wundet men gan nzalo meno.” 31 O belne tsa te rrey tilno ste rrey, ¿peguin rzobdet men ylebleedx men primer gan pe zun chiimil xsoldad men gan tilno men men ne zano galmil soldad? 32 Belne ryenen men ne gundet men gan lo ste rrey guin, sxaal men mén ne tsa ynii diztsoow lo rrey guin chene benak zu men nat, chen gyakchi xdil men. 33 Zenga ke kwaskyertee mén ne rlaandet koleedx ne rap, gakdet gak men xpén noo.

34 ’Zëd, ne wen nako; per belne gaknzhidetro, ¿pezee gak gaknzhi we ste? 35 Batre ykyiindeto, ni por ne gako yu, ni por ne tsa we lad beeb, sinke noze ysee méno. Men ne rkagyedyag diiz, gon men neree ne rzëët noo.