1 Wzëët Jesus zegnak te kwent lo men yra men chen yseed men ne yzaandxee dxe ynab men lo Dëdyuzh, sin ne ytxuugdet lextoo men. 2 Re Ne:

―Te gyëz wuu te jwes ne rdxedet Dëdyuzh, ni raknzebnëzdet men lo mén. 3 Gyëz ke guin wuu te wnabyud ne ranab gyelextis guetse guetse por te dil ne rap men yrup men mén ne rlaa lo men. 4 Xche wkaa men zenga, nadet jwes guin nyukasgue men, per zhich guin nuu lextoo jwes guin: “Mase rdxedet noo Dëdyuzh, ni raknzebnëzdet noo lo mén, 5 per por tant zëdlandxiin wnaaree lo noo, ylaache noo xgyelextis men chen chiidetre men, antes ne yneseyal men xpasens noo.”

6 No re Jesus lo men yra men:

―Belne zeree re jwes mal guin, 7 ¡peleske Dëdyuzh ne tsukasdet xpén Ne ne rnab lo Ne dxe gyëëltee! ¿Peguin tsukasdetgue Ne men? 8 Yna noo lo de yra de ne zukasgue Ne men. Per chene chiid Men ne wdxiid wak Mén, ¿pe benakleg sël mén ne rlaleedx Dëdyuzh lo men lo gyëzlyuree?

9 Wzëët Jesus ste zegnak kwent por mén ne nuu lextoo noze laa men xnëz rlaa per le ste mén xnëzdet rlaa, re Ne:

10 ―Wa txup mgyeey lenxeydoo Dëdyuzh wnab men lo Dëdyuzh: te men nak farisew, le ste men nak men ne rgoob zeg impwest. 11 Men ne nak farisew, zuli men wnab lo Dëdyuzh, zeree re men: “Dëdyuzhe, dexkyizhtee de ne nakdet noo zegnak gwrol mén ne ngbaan, ne mal, no ne rkano ste wnaa; ni nakdet noo zegnak mén gwa ne rgoob zeg impwest. 12 Noo txup tir rkwan noo te leen xman, rudet noo chene rnab noo lo de, no yra ne run noo gan, rlachii noo we, lex rniiz noo tebchii we por laa de.” 13 Per le men guin ne rgoob zeg impwest, axtegue nat wzu men, ni wyezhdet men nlisgya lo men gyeybaa, sinke rgap laz men, re men: “¡Dëdyuzh, gules lextoo de noo ne nak noo mendol!” 14 Yna noo lo de yra de ne chene le men guin ne rgoob zeg impwest wberee ruxyuu men, che wun Dëdyuzh men perdon, per le men ne nak farisew, wundet Dëdyuzh men perdon. Porke yrandxee mén ne rlanon laake, mén guin bet nondet lo Dëdyuzh; le mén ne nuu lextoo ne bet nondet, mén guin gaknon lo Dëdyuzh.

15 Wdxinno mén minwin lo Jesus chen yxob nya Jesus xtoo miin; per chene wii xpén Jesus, wakndux men lo yra men ne wdxinno miin. 16 Per wbëz Jesus men yra men, lex re Ne lo men:

―Gudee si chiid minwin lo noo, ysoowdet de, porke ledne rnebééy Dëdyuzh, por mén ne nak zegnak minwin nako. 17 Nligue yna noo lo de yra de ne mén ne rlaandet ylaa ne rnebééy Dëdyuzh gakdet tee men ledne rnebééy Ne belne gakdet men zegnak minwin ne ron diiz.

18 Wnabdiiz te mén ne rnebééy lo men-Israel lo Jesus, re men:

―Maxter, laa de ne wen de, ¿pagox rap noo degne ylaa noo chen gap noo gyelembán ne nunk luzhdet?

19 Wke Jesus, re Ne lo men:

―¿Penak na de ne wen noo? Yët menwen; nonchee Dëdyuzh wen. 20 Laa de che nan de gan pagox rkyeen Dëdyuzh: “Ykanodet de mén ne nakdet lzaa de, yketet de mén, kwandet de, ykagyiidet de mén, gugaknzebnëz lo xuz de, gugaknzebnëz lo xnaa de.”

21 Orguin re mén guin lo Ne:

―Yrandxee negwa che rlaa noo axtegue ne win noo.

22 Chene won Ne ne re men zenga, re Ne lo men:

―Benak rak falt ylaa de ste kos: gutoo yrandxee ne rap de, lex gudee med lo menprob, chen gap de ne non ne nuu gyeybaa; lex chiid de chidnal de noo.

23 Per chene won mén guin zenga, kesentyent wunles lextoo men, porke kesentyent rik men. 24 Ne wii Ne ne wunles lextoo men, re Ne:

―¡Kesentyent ngan tee menrik ledne rnebééy Dëdyuzh! 25 Mazre mbëëdee tee te kamey gyeer ne zob nii gyëtsguzh ke ne tee te menrik ledne rnebééy Dëdyuzh.

26 Yra men ne won ne re Ne zenga, re men:

―¿Txuzh nak ne gun gan yláá lo kastig cheguin?

27 Lex re Ne lo men:

―Logne rundet mén gan ylaa men, Dëdyuzh si run Ne gan rlaa No.

28 Lex re Bëd lo Ne:

―Noo yra noo, wsan noo yrandxee ne rap noo, zëdnal noo de.

29 Lex wke Ne re Ne lo Bëd:

―Nligue yna noo lo de yra de ne kwaskyertee mén ne rsan xyuu, rsan xegwzan, rsan bech, rsan xewnaa, o rsan zhiin por ne rlaa men ne rkyeen Dëdyuzh, 30 kesentyent ndaldee ne ykakwent men nee gyëzlyuree, no sdxiin dxe ne gap men gyelembán ne nunk luzhdet.

31 Wbëz Jesus yra chibtxup xpén Ne waandxee, lex re Ne lo men:

―Orree tsa be Jerusalén ledne gak yra xkwent Men ne wdxiid wak Mén zegne wkaa yra profet. 32 Ydekwent mén men lo menzit, no yzhidxno mén men, yninyaan mén lo men, no ytxonxen mén lo men. 33 Ydee mén xkwent men; luzh nga yket mén men; per chene gyon gbiz, yban ke men.

34 Bet wdeedet men kwent gan penak re Ne zenga, ni nandet men gan pe rna ne re Ne zenga.

35 Chene che guex ydxiin Jesus gyëz-Jericó, nga zob te menngwlëë runëz rnab men goon. 36 Ne won men ne rzheedx rdee ndal mén, wnabdiiz men gan kox rak. 37 Lex re mén lo men ne Jesus men-Nazaret za nga. 38 Lex wkarëz men, re men:

―¡Jesus, XPee David, gules lextoo de noo!

39 Yra mén ne zaner wakndux men lo mén guin chen gyakchi men, per lel mazre rkarëz men, re men:

―¡XPee David, gules lextoo de noo!

40 Orguin wzutsë Ne, lex wkyeen Ne mén waxii mén men. Chene wdxiin men guex lo Ne, wnabdiiz Ne lo men, re Ne:

41 ―¿Pagox rlaan de ylaa noo por laa de?

Wke menngwlëë guin, re men:

―Dechey, rlaan noo gyenii bzalo noo.

42 Orguin re Ne lo men:

―¡Gyenii bzalo de! Por ne wlaleedx de noo, wyenii we.

43 Orgueguin wyenii bzalo mén guin; zanal men Ne, wzaknon men Dëdyuzh. No yrandxee mén ne wii neguin, no ke men wzaknon Dëdyuzh.