1 Liꞌá Pablo, necaa tucu apóstolꞌ Jesucristo xne scua niarquiꞌ Diose. Liꞌá cuna Timoteo enu neca saꞌahua enu nzeli arquiꞌ Jesucristo, 2 rquieꞌeru carta quieꞌ luhua, liꞌihua enu neli nzeli arquiꞌ Jesucristo, liꞌihua enu neca bee beneꞌ Diose enu nucuaꞌa eyeche Colosas. Diose Paꞌahua cuna Jesucristo enu rnibiyaꞌ luaꞌahua, riꞌinu nú cha nzeꞌca lu cuendaꞌhua cuna nú nzuxe arquiꞌhua.

3 Cada chenu rnacuꞌru lu Diose lu cuendaꞌhua, liꞌinu enu neca paꞌ Jesucristo enu rnibiyaꞌ luaꞌahua, rniru cheꞌtsa lunu lu cuendaꞌhua. 4 Xne ubeneꞌlaꞌru xa nzeli arquiꞌhua Jesucristo cuna lunú xa secahua bee bene enu neca bee beneꞌnu, 5 equie nú nzuculuhua nú riña bichia nú yucuhua eluxene nú nuꞌcheꞌe liñibe. Liꞌihua ungabiyaꞌlaꞌhua nucuaꞌ chenu ubeneꞌhua bedichaꞌ nzeꞌcaꞌ Jesucristo nú neli neca. 6 Nu bedichiaꞌ nú neli neca cuaꞌ nú ubeneꞌlaꞌhua diqui lu iliulabe nze riꞌchia letse bee bedichiaꞌ cuaꞌ nu diqui bee luhuare leꞌca nzelila arquiꞌ bee bene bedichiaꞌ cuaꞌ. Liꞌibeella nzelila arquiꞌbeella bedichiaꞌ cuaꞌ tucu nú ungae luhua chenu ubeneꞌhua lunú xa uhuaꞌa arquiꞌ Diose liꞌihua cuna nú neli secanu liꞌihua. 7 Liꞌihua uriꞌihua beyaꞌ nú neli neca nucuaꞌ chenu uzeteꞌ Epafras nucuaꞌ liꞌihua. Liꞌilla rriꞌilla elietsa luru nu chiquiꞌ seꞌcaru liꞌilla xne liꞌilla neli sibiꞌlla lu Jesucristo. 8 Nu leꞌca liꞌilla necalla enu udixiuleꞌe luru lunú xa secahua bee saꞌahua equie nú nzu Espíritu Santo cuna liꞌihua.

9 Enzeꞌe hasta bichia chenu ubeneꞌru nú xa nehuañihua, la tsanaꞌ arquiꞌru nú rnacuꞌru lu Diose equie cuendaꞌhua para nú equie cuendaꞌ Espíritu Santo riꞌi nzeꞌcahua beyaꞌ nú xa niarquiꞌnu, nu liquiꞌnu lu ye nú acahua nu xaꞌlanu elliebacuꞌhua nú riꞌihua beyaꞌ nú ti necanu. 10 Nu scua huañihua tucu nú riala nú huañi bee bene enu neca bee beneꞌ Jesucristo, nu riꞌihua tucu nú riuꞌ arquiꞌnu, nu che riꞌiláhua puro nú neca nzeꞌca para nú riꞌiláhua beyaꞌ Stichiaꞌ Diose. 11 Nu liꞌiru leꞌca rnacuꞌru lunu para nú equie nú chiquiꞌ rnibiyaꞌnu riꞌinu elietsa luhua nú tsutaꞌ arquiꞌhua lunu, nu riquiꞌhua lubee xitse nú nehuana zecahua nu uluꞌcuhua paciencia. 12 Nu hasta ñia tsu arquiꞌhua deteꞌhua cheꞌtsa lu Paꞌahua Diose equie nú uquieelanu arquiꞌhua para nú atiꞌhua lunú riala bee bene enu neca bee beneꞌnu enu nzequie inziuꞌnu. 13 Diose utsilaꞌa liaꞌahua lunú rnibiyaꞌ bezeꞌlu para nú uduꞌnu liaꞌahua lunú rnibiyaꞌ Lliꞌñinu Jesucristo enu secanu. 14 Liꞌinu udixiunu equie cuendaꞌ stulaꞌahua nú rluꞌcuꞌlaꞌahua perdona lu Diose.

15 Lecati aca lañiꞌ Diose. Pero Jesucristo neca tucu nú neca Diose, nu nzula Jesucristo cuna Diose hasta chenu lascaꞌ acacheꞌ iliulabe. 16 Equie cuendaꞌ Jesucristo ungacheꞌ ye nú nuꞌ liñibe cuna nú nuꞌ lu iliulabe, sianu rlañiꞌ bee bene urre nu la lañiꞌ bee bene, nu leꞌca equie cuendaꞌ liꞌinu nuꞌ yee bee elurnibiyaꞌ cuna yee bee elu usticia nú rluꞌcu bee enu leca modo nú lañiꞌ bee bene. Yeene ungacheꞌe lu cuendaꞌ liꞌinu nu para liꞌinue. 17 Nzula Jesucristo ante nú acacheꞌ iliulabe nu liꞌinu nuyaꞌ cuendanu yeene nu rnibiyaꞌnu lu yeene. 18 Nu leꞌca liꞌinu rnibiyaꞌnu lu ye bee bene enu nzeli arquiꞌ liꞌinu, enu neca bee beneꞌnu. Liꞌinu necanu enu rluti nzula, nu liꞌinu necanu enu rluti uhuañi zeca leta bee benenguti para nú riꞌi bee bene beyaꞌ nú tucutsia liꞌinu rluꞌcunu nú rnibiyaꞌnu lu yeene. 19 Xne uyuꞌ arquiꞌ Diose nú neca Jesucristo tucu nú neca Diose. 20 Nu equie cuendaꞌ Jesucristo uyuꞌu nú uyaala arquiꞌ Diose lubee nú nuꞌ lu iliulabe urre sia beenú nuꞌ liñibe, uyuꞌu nú uyaala arquiꞌnu scua lubee nucuaꞌ equie cuendaꞌ reneꞌ Jesucristo nú uriꞌchia chenu ungutinu lu cruse.

21 Huaꞌtu istu nzu arquiꞌhua lu Diose cuna nú necahua xi neca enu rlee lunu, xne uriꞌitsiahua puro nú necha neca. 22 Pero nee uriꞌi Diose nú uyuꞌu nú uyaala arquiꞌnu luhua equie nú nehuana ulleꞌca Jesucristo chenu ungutinu lu cruse para nú riñahua lunu nu lecaxi natsa arquiꞌhua, cuna nú lecaxi equiya luꞌcuhua nú nacuꞌ quiyanu luhua. 23 Pero para nucuaꞌ rquiꞌña nu chiuca tsutaꞌ arquiꞌhua chequiehua lunú nzu teneli arquiꞌhua, sin nú tsanaꞌ arquiꞌhua nú nzequiehua bedichiaꞌ nzeꞌcaꞌ Jesucristo nú ubeneꞌlaꞌhua. Nu leꞌca liꞌi bedichiaꞌ nzeꞌca quieꞌ nze riꞌchia letse diqui lu iliulabe, nu liꞌá Pablo, necaa tucu enu rixiuleꞌe bedichiaꞌ nzeꞌca cuaꞌ lubee bene.

24 Nu nee, chiquiꞌ ñia nzu arquia equie nú nehuana seꞌca equie cuendaꞌ liꞌihua. Xi neca nú ulleꞌca Jesucristo para nú riꞌá elietsa lubee bene enu nzeli arquiꞌ liꞌinu enu neca bee beneꞌnu. 25 Xne Diose uduꞌu liꞌá para nú zibiꞌa lubee beneꞌnu. Nu liꞌinu uliquiꞌnu riñaꞌ cuaꞌ lua para nú zetea liꞌihua Stichiaꞌ Diose tucu nú necane. 26 Hasta huaꞌtu lá riꞌi bee bene beyaꞌ xa neca Stichiaꞌ Diose. Pero nee ulubeꞌlanu xa neca stichiaꞌnu lubee bene enu neca bee beneꞌnu 27 para nú ixiuleꞌe beella lubee bene enu la neca bee bene Israel xa neca eluxeneꞌnu. Nu lunú né lubeꞌ Diose lubee bene tiembu nú udetela necane nú nzu Jesucristo cuna liꞌihua, nu equie cuendaꞌ liꞌinu nediyaꞌ nzeꞌcaꞌhua nú nzeꞌta bichia nú riñahua liñibe.

28 Nu liꞌiru rixiuleꞌeru stichiaꞌ Jesucristo, nu rniru bezeteꞌ lubee bene, cuna nú seteꞌru liꞌibeella lu ye nú reca elliebacuꞌru para nú equie cuendaꞌ Jesucristo riña beella lu Diose tucu nú riala nú riña beella lunu. 29 Nu chiquiꞌ rtiꞌquia arquia nú riꞌá riñaꞌ quieꞌ cuna poder nú uliquiꞌnu lua.