21
Ulubeꞌlu Jesuse lu achi bee beneꞌnu
Lu zeꞌe lá, ulubeꞌlu zecaꞌla Jesuse lubee beneꞌnu ruꞌu inzatuꞌ Tiberias, nu singuie ulubeꞌlunu lubeella: Chenu neyeteꞌsaꞌ beella, nzu Simón Pedro, cuna Tomás enu rriꞌchia bee bene cuachi, nu Natanael enu neca bene Caná tucu eyeche lu iliu Galilea cuna bee llianaꞌ Zebedeo nu cuna xiucu bee beneꞌnu. Che uni Simón Pedro lubeella:
―Nzaꞌa nze ucuaꞌa bee bela.
Che unibeella:
―Leꞌca nuuru tseru cuna liꞌilu.
Che nzuebeella nu uquie beella equie tucu barco, pero rulaꞌ zeꞌe né uculí beella bee bela. Chenu enta yeꞌela lu yuu, uriña Jesuse ruꞌu inzatuꞌ zeꞌe, pero né chulu bee beneꞌnu liꞌinu. Nu uni Jesuse lubeella:
―Bee enduꞌ, ¿lá ucuhua niꞌ tucu bela la?
Nu ucuaqui beella nú uni beella:
―Niꞌ tucuí.
Che uninu lubeella:
―Utsiꞌquihua ixiu nú rucuhua bee bela enza cueꞌtse barco chubee para nú ucuhua bee bela.
Nu scua uriꞌi beella, nu la riquiꞌa beella lua beella ixiu lu inza, xne huaxi bela nuꞌ liñii. Chequie beneꞌnu enu chiquiꞌ secanu uni lu Pedro:
―¡Detá Jesusenu!
Chenu ubeneꞌ Simón Pedro nú necanu Detá Jesuse che chu ungutulla xuculla nú ulualla, nu chu utetsalla lu inza. Che beelá bee beneꞌnu uriñayuu beella barco zeꞌe nú nzexaꞌ ixiu nú achee nú bela hasta ruꞌu inzatuꞌ, xne rriꞌi casi tucu ayuꞌu metro para nú riña beella ruꞌu inzatuꞌ. Chenu ulaca beella equie barco zeꞌe ulañiꞌ beella nú nucuaꞌa quii nu nchiucuꞌ tucu bela lue, nu cuna pá. 10 Che uni Jesuse lubeella:
―Uteyuhua chiucu chuna bee bela enu ulaxu inza uducuhua.
11 Che uquie zeca Simón Pedro equie barco zeꞌe nu uxaꞌlla ixiu nú achee nuꞌ bee bela llene hasta ruꞌu inzatuꞌ, nu neca tucu ayuꞌu arulaꞌ nuꞌ chuna beeí, añinzuca nú huaxi beeí né tsa ixiu zeꞌe. 12 Che uni Jesuse lubeella:
―Utehua ne acusilaꞌhua.
Nu niꞌtucu bee beneꞌnu lá laca arquiꞌ beella anedichiaꞌ beella nú tinu, xne nediyaꞌlaꞌ beella nú Jesusenu. 13 Che chu uyabica Jesuse, nu unaꞌtsenu pá nu udeteꞌnue udacu beellae, nu leꞌca scua uriꞌinu cuna bela.
14 Ninguieꞌ neca bese rriuna nú ulubeꞌlu Jesuse lubee beneꞌnu chenu uhuañi zecanu lu eluti.
Lunú uni Jesuse lu Simón Pedro
15 Chenu ulaxu nú udacusilaꞌ beella, uni Jesuse lu Simón Pedro:
―Simón, llianaꞌ Jonás, ¿másela secalu liꞌá luquela beelá beella la?
Nu ucuaqui Pedro lunu:
―Ahuaꞌ, Detá, liꞌilu nediyaꞌlu nú seꞌcalu.
Che uni Jesuse lulla:
―Ubiꞌya bee benea che.
16 Che unedichiaꞌlanu bese rrucu lulla:
―Simón, llianaꞌ Jonás, ¿secacálu liꞌá la?
Nu ucuaqui Pedro lunu:
―Ahua, Detá, liꞌilu nediyaꞌlu nú seꞌcalu.
Che uni Jesuse lulla:
―Ubiꞌya bee benea che.
17 Nu bese rriuna unedichiaꞌlanu lulla:
―Simón llianaꞌ Jonás, ¿secalu liꞌá la?
Che nehuana utsu arquiꞌ Pedro xne unedichiaꞌnu chuna bese lulla tunu secacalla liꞌinu, nu ucuaquilla nú unilla:
―Detá, liꞌilu nediyaꞌlu yeene. Liꞌilu nediyaꞌlu nú seꞌcalu.
Che uni Jesuse lulla:
―Ubiꞌya bee benea che. 18 Liꞌá rnia lulu nú chenu nereꞌneꞌlálu, rutulu xuculu nu nzalu elu niarquiꞌlu, pero chenu uxulu lílu yalu nu stucu bene utu xuculu liꞌilu nu uyaꞌ nzeꞌe liꞌilu elu la niarquiꞌlu chálu.
19 Chenu uni Jesuse scua, rixiuleꞌenu equie cuendaꞌ nú xa ati Pedro, nu equie nú atilla zucuꞌ ayalla Diose. Chequie uninu lulla:
―Utenala liꞌá.
Beneꞌ Jesuse enu chiquiꞌ secanu
20 Chenu ubelleta Pedro ulañiꞌlla nú nzeꞌtanala beneꞌ Jesuse enu chiquiꞌ secanu liꞌibeella, enu uzucu cueꞌtsenu chenu udacuxee beella enu unedichiaꞌ lunu: “Nu ti deteꞌ cuenda liꞌinu.” 21 Chenu ulañiꞌ Pedro liꞌilla unedichiaꞌlla lu Jesuse nú unilla:
―Detá, liꞌiquiella ¿xa zecalla?
22 Ucuaqui Jesuse lulla nú uninu:
―Tunu niarquia nú nehuañilla hasta chenu riña zecaa lu iliulabe, cuenda nucuaꞌ. Liꞌilu utenalatsia liꞌá.
23 Che urichialetse bee bedichiaꞌ cuaꞌ leta beelá bee beneꞌnu, nú beneꞌnu nucuaꞌ la atilla. Pero lá ni Jesuse nú la atilla. Lunú uninu neca: “Tunu niarquia nú nehuañilla hasta chenu riña zecaa lu iliulabe, cuenda nucuaꞌ.”
24 Nu leꞌca beneꞌnu ninguieꞌ rni bee nucuaꞌ nu uquieꞌellae. Nu nediyaꞌahua nú neli rnilla.
25 Nu huaxilá beenú uriꞌi Jesuse nu tunu quiee tucua tucua bee seꞌca nú la yala lu iliulabe chuꞌu bee libro quieꞌ.
Amén.