15
Lu achi bee ángele nu lu achi nú nehuana enta zeca bee bene
1 Luzeꞌelá ulañia stucu seña nú llene liñibe, tucu seña nú chiquiꞌ uyanu arquia: Ulañia achi bee ángele cuna achi bee castiya nú chiquiꞌ nehuana zeca bee bene, scua neca bee último castiya nú zeca bee bene xne cuna bee nucuaꞌ utsaꞌalu Diose castiya nú zeca bee bene.
2 Leꞌca ulañia tucu inzatuꞌ nú rna xi rna huana, nú nucha quii. Nu equie zeꞌe nucuaꞌa bee bene enu la luꞌcu ulaꞌna lu monstruo, cuna lu imagenꞌí nu cuna numero nú neca nombreꞌí. Nu nzene beella arpa nú udeteꞌ Diose lubeella nucuaꞌa beella zeꞌe. 3 Nu ungula beella canto nú ungula Moisés enu neca beneꞌ Diose nu cuna nú neca cantoꞌ Corderoꞌ Diose, canto zeꞌe rni:
Chiquiꞌ llene nu ñia neca luye nú uriꞌilu,
Liꞌilu necalu Dioseꞌru enu rluꞌcu ye poder.
Ye nú rriꞌilu neca nzeꞌcae, nu neli neca inziuꞌlu,
nu liꞌilu rnibiyaꞌlu luye bee bene iliulabe.
4 ¿Ta bee bene enu la lliqui liꞌilu?
¿Nu ta bee bene enu la nii bedichiaꞌ nzeꞌca lucuendaꞌlu,
liꞌilu enu neca Dioseꞌru?
Tucutsia liꞌilu necalu enu la luꞌcu dula,
nu ye bee bene iliulabe enta luꞌcu ulaꞌna lulu,
xne ulañilaꞌ bee bene nú neli neca nú rriꞌilu.
Uni canto nú ungula beella lu Diose.
5 Chenu ulaxu nú ulañia bee nucuaꞌ, che ulañia nú uyaꞌla liñi induꞌ Diose liñibe elu nzucu santuario. 6 Nu liñi indu zeꞌe uchiuꞌu achi bee ángele bee enu nuyaꞌ achi bee castiya nú nehuana zeca bee bene. Nu nutu beella laquie niquichi nú rulusiquiꞌ, nu nuꞌ sinchiu nú necacheꞌ oro latsa bee ángele zeꞌe. 7 Chequie tucu lu tacu bee enu nehuañi nucuaꞌa elu nzucu Diose, udeteꞌ bee nucuaꞌ lu cada tucu bee ángele tucu copa de oro nú achechicu nuꞌcheꞌ castiya nú deteꞌ Diose lubee bene. Nu liꞌinu necanu enu nehuañi diqui tiembu. 8 Nu ache liñi indu zeꞌe uyuꞌu llene lunú reca poderꞌ Diose rriꞌi, nu rulusiquiꞌ lunú neca poderꞌnu. Nu lecati uyuꞌu liñi indu zeꞌe hasta nú laxu zaꞌ achi castiya nú deteꞌ Diose lubee bene, castiya nú nuyaꞌ achi bee ángele zeꞌe liñi bee copa.