22
1 Leꞌca ulubeꞌ ángele zeꞌe lua tucu reꞌcu nú rliquiꞌ inza nú nehuañi bee bene nú rulu siquiꞌ xi rulu tucu huana. Inza zeꞌe xiuꞌu elu nzucu Diose lu xletaꞌnu nu Corderoꞌnu. 2 Nu rdete reꞌcucua labe calle nú rdete labe eyeche zeꞌe. Nu rucuchu reꞌcu zeꞌe nzucu aca nú rliquiꞌ elu nehuañiꞌ bee bene, nú rliquiꞌ chiꞌchiucu clasiaꞌ ndixi, nu cada guu rliquiꞌi yelu clasiaꞌ dixi. Nu lecaꞌ aca cuaꞌ sibiꞌ para nú rriꞌi yeca bee bene iliulabe. 3 Zeꞌe lecaꞌ beenú necha neca, Diose nu Corderoꞌnu cuaꞌa beella lu xletaꞌ beella eyeche zeꞌe, nu bee beneꞌnu luꞌcu ulaꞌna lunu. 4 Nu zeꞌe lañiꞌ beella Diose, nu nequie nombreꞌnu tequiee beella. 5 Zeꞌe la chuaꞌ rulaꞌ nu la quiꞌñiaꞌ bee bene quii nu niꞌ ellieꞌ bichia xne Paꞌahua Diose duꞌllieꞌe zeꞌe, nu zeꞌe nibiyaꞌ beella cuna liꞌinu diqui tiembu.
La leaꞌ nzeꞌta zeca Jesucristo stucu bese
6 Che uni ángele zeꞌe lua:
―Bee bedichiaꞌ quieꞌ neca bee bedichiaꞌ nú neli neca nu riala nú chili arquiꞌ bee benene. Nu Diose Paꞌahua enu rdeteꞌ bedichiaꞌ lubee profeta para nú nibeella lubee bene, Liꞌinu uxeꞌlanu ángeleꞌnu para nú lubeꞌ ángele cuaꞌ lubee beneꞌnu lunú yamero nzeꞌta nú aca.
7 Nu Jesucristo uni:
―Yamero nzela ¡Ñia neca lu cuendaꞌ bee bene enu rriꞌi caso Stichiaꞌ Diose nú nequie lu libro quieꞌ nu rixiuleꞌe nú xi nzu aca!
8 Liꞌá Juan, ulañia nu ubenea bee nucuaꞌ, nu chenu ulaxu nú ubenea nu ulañia bee nucuaꞌ, che utsulliquia para nú luꞌcua ulaꞌna lu ángele enu ulubeꞌ bee nucuaꞌ lua. 9 Pero uni ángele cuaꞌ lua:
―La riꞌilu scua. Xne liꞌá cuna liꞌilu iguale sibiꞌa lu Diose, cuna bee profeta nu cuna bee bene enu rriꞌi caso nú nequie lu libro quieꞌ. Enzeꞌe uluꞌcu ulaꞌna lu Diose.
10 Leꞌca uni ángele zeꞌe lua.
―La tsacuꞌ arquiꞌhua bee bedichiaꞌ nú nzeꞌta lu libro quieꞌ, bee bedichiaꞌ nú rixiuleꞌe nú xi enta aca, xne yamerotsia nzeꞌta beenú aca. 11 Uzela nú riꞌila bee bene enu necha rriꞌi lunú necha rriꞌi beei, nu bee bene enu necha nehuañi huañilaꞌbeei lunú necha nehuañibeei lunú la zibiꞌ rriꞌi beei. Pero bee bene enu rriꞌi tucu nú rialane rquiꞌña nú cheriꞌilálla tucu nú riala riꞌilla, nu bee bene enu nehuañi tucu nú niarquiꞌ Diose rquiꞌña nú chenalalálla nú huañilla tucu nú niarquiꞌnu.
12 Jesucristo uni:
―La leaꞌ nú nzela zecaa nu nzelayua nú liquia lu cada tucuhua lunú uriꞌi cada tucuhua. 13 Liꞌá neca xi neca letra A nu letra Z. Letra nú rquixie alfabeto, nu rlaxue, xne tucutsia liꞌá rnibiyaꞌa desde chenu uquixie iliulabe nu ye tiembu.
14 Ñia neca lu cuendaꞌ bee bene enu neca xi neca nú uquieela xucu equie nú rriꞌi caso beella Stichiaꞌ Diose, para nú nuꞌ modo chuꞌu beella enza ruꞌu puerta eyeche zeꞌe nu para nú nuꞌ modo nú acu beella indixi nú rayu lu aca nú rliquiꞌ elunehuañiꞌ bee bene. 15 Nu eleꞌyaꞌ eyeche zeꞌe riaꞌna bee bene enu riuꞌ arquiꞌ riꞌi puro beenú necha neca, bee uliñi, bee bene enu rriꞌi eluhuexe, bee bene enu ruutisaꞌ, bee bene enu rluꞌcu ulaꞌna lubeenú seca bee bene nú neca diose, nu ye bee bene enu riuꞌ arquiꞌ nii eluquichiaꞌ nu sequienu arquiꞌ bee bene.
16 ―Liꞌá, Jesuse, uxeꞌla ángelea luhua para nú ixiuleꞌenu ye bee nucuaꞌ luhua para nú leꞌca ixiuleꞌehuane lu ye bee bene enu nzeli arquiꞌ liꞌá. Liꞌá neca mero lliꞌñi aca tuxie David, leta bee familiaꞌlla nzela. Nu liꞌá neca xi neca lucero enu rliñi silaꞌ
17 Espíritu Santo cuna enu neca noviaꞌ Corderoꞌ Diose rni:
―Utee.
Nu bene enu rieneꞌ nú rni bee nucuaꞌ scua rnilla:
―Utee.
Titse bee enu rrebichiꞌ, yeꞌta nzeꞌe, nu enu niarquiꞌ nuꞌ modo nú hueꞌ nzeꞌe inza nú rliquiꞌ elunehuañi sin nu ixiu nzeꞌe.
18 Ye bee bene enu rieneꞌ bedichiaꞌ nú nequie lu libro quieꞌ lunú nzeꞌta aca, liꞌá nia luhua nú tunu nuꞌ tucu bene enu sucuꞌ equie saꞌla bedichiaꞌ lunú nequie lu ichiꞌ quieꞌ, leꞌca scua zucuꞌ equie saꞌla Diose castiya nú zeca bene zeꞌe lunú nequie lu libro quieꞌ. 19 Leꞌca esquie tunu nuꞌ bene enu axi bee bedichiaꞌ nú nequie lu libro quieꞌ lunú nzeꞌta aca, leꞌca axi Diose nú rialalla lu aca nú rliquiꞌ elu nehuañi nú rni lu libro quieꞌ, nu leꞌca la chuꞌu bene zeꞌe eyecheꞌ Diose elu rni lu libro quieꞌ.
20 Enu nediyaꞌ nú neli ye bee nucuaꞌ, rni:
―Neli nú la leaꞌ nzela. Scua acane niarquia.
¡Detá Jesucristo, utee!
21 Jesucristo riꞌi nú cha nzeꞌcae lu cuendaꞌ yehua.
Amén.