BIOṈ GUITS NE PQUIAA
JUAN
1
¡Diuzh bets!
Laa zha gol rii, pquiaa tib guits rii ziaad lo luu i goṉ Gay, ne nac luu tib zha ne nziuu lo naa.
Bets, rnab naa lo Dios zigne squi wen mban luu nëz lo me, scaque zaacse grieequia grëtaa ncuaaṉe guṉ luu, ni gneedz me guieḻndaan lo luu. Ne nlipaa bley naa, zeeṉe biaad bla zha bets ne nu, bzodiidz zho lo naa squitaa ndzinli mban luu, tibaque noxco luu zienaḻ luu miṉe nac diidzli. Ne nligaa, nodraa pe stib conley zdoo naa zigne rleytaa naa zeeṉe ron naa iṉe niowse mban grë zha ne biane naa xtiidz Dios lo, zienaḻ zho miṉe nac diidzli.
Bets, ziyon naa squitaa tibaque noxco luu ruṉ luu xyudar grë zha ne nacgrë ne, ni mazdraa zeeṉe nac zho zha ne ziaad stib guiedz. ¡Wen ga! Squi ndxie grëraa zha ne rliladz Jesús, rzodiidz zho squitaa nquialadz luu zho. Bzhiguieḻ sca, bioxco tibaque squi beeṉ xyudar zho zeeṉa grieelo gdziṉ zho zaatne no tsie zho. Sca rdziladz Dios. Sac goṉ, niapse porne rleynie zho Dios, laa zho briee zieguṉ zho xtsiiṉ Jesús, ni ib rziguieḻd zho ycaania zho ncuaaṉe rdeed grë miech ne rliladzd Xtiidz Dios. Miṉ co nagoṉ, ib none ne yquiambiaazlo zho, ne none gdeed ncuaaṉe yquiin zho, zeeṉa dziuuṉ ne xyudar zho ygaaz Xtiidz Dios.
Pxeḻle naa tib guits lo grëse zha ne no xnëz Dios i, per zig nac Diótrefes goṉ, meṉ ne racladz so gnabey lo to i, rond me miṉe rnee no. 10 Gacxe na, teḻne laa naa guiaḻ i, dzigo laa naa glisqui lo me dieṉ pe nacne quianeenë me no.
Ni tebaa miṉcose, na haxta ruṉ me ib rbëzlod me grë zha bets, zha bzian ne rlanso i; niicle rdeetegaa me diidz cho gdeed zaatne cuëz zho. Zha ne ruṉd miṉe racladz me, rbee me zho lad grë zha ne nacgrë zho.
11 Bets, saṉgue luu goṉ ib tsienaḻd luu miṉe ruṉ grë zha ne sca ruṉ guieḻntseeb, sinque bioxco güeynaḻ ncuaaṉe ndzinli. Sac goṉ, zha ne ruṉ niapse ncuaaṉe ndzinli, xnëz Dios no zho; laa grë zha ne ruṉ ncuaaṉe ntseeb, gard sëëb zho xnëz Dios.
12 Zig nac Demetr, grëse miech rnee gaṉle zaacse mban Demetr. Ni rlugaa nliw, sac goṉ tibaque zienaḻ me miṉe nac diidzli. Niicle nogaaw, miṉcoque rnee no, ni naṉ luu gaṉle led yed no rquidie.
13 Ndalraa ncuaaṉe no gne naa lo luu, per racladzd naa gzodiidz naaw lo luu lo guits rii; 14 sac laa guic naa no guiaḻgaṉ niob naa luu i, dzigo hor co ziodiidz ne grop ne.
15 Guiaaṉnie Dios luu sca; peet tsienied guic luu. Grëse xamigw luu zha ne ruṉbey luu nu, laa zho rxeeḻ bdiuzh lo luu. Scagaa bzhiguieḻ bdeed tib zhibdiuzh naa lo tib tib zha ne nac xamigw ne nëz qui.
Juan