8
Saulo mzak wen mbit xaa Steb.
Saulo mrenal re xaa Jesús
Leeka mbizh zee mzelo re xaa mrenal re xaa Jesús, xaa yezh Jerusalén, zee rese xaa Jesús mxonn nya naz re yezh cheen Judea nu zrol xaa nya naz yizhyo Samaria, nebse re xaa mkayaa yalnabeyy lo Jesús mlake. Lak xaa ngwii lo Dios, ngwa sebyo Steb nu mbinn doo xaa lo xaa. Nu lee Saulo mrenal re xaa Jesús, nu axta nya xaa garli re xaa, nu nzhe xaa xaabyi nu ngwnaa nu nchep xaa xaa lozhyib.
Lip mzaa kwent xtizh Dios naz yezh Samaria
Nu lee rese xaa Jesús, xaa mroo Jerusalén, nzaa xaa kwent xtizh Dios kwaan nyaadno yalnaban, rese pa nzha xaa. Lip le tub xaa nzho lo re xaa ba, nu ngwa xaa yezh kwaan le Samaria. Naz baa mzaa xaa kwent cheen Jesús. Nu rese xaa yezh nkenzha re kwaan nzhé Lip, nu ngwii xaa lo re kwaan gro kwaan nle xaa. Kwaane nak kwaan mle xaa: msekwen xaa zyen doo xaa kwaan nzho mbi mal lextoo, nu gorna lee mbi mal nroo lextoo re xaa mbazhe xaa, nu noka msekwen xaa zyen xaa nyent mod gun nu xaa mdeen, kwaanzee nyakdoola re xaa yezh.
Per zee nzho tub xaabyi, xaa le Simón, xaa ngok wezh yilo nu mkade xaa re xaa yezh Samaria, nu mle xaa mod tub xaa non doo. 10 Nu rese myet, xaawin nu xaa gox, ngwii lo xaa nu nzhon xaa xtizh xaa, nu mbezh re xaa:
—Xaa ne nkano yalnabeyy mod cheen Dios.
11 Nu nzhon re xaa kwaan mbezh xaa, nel xche doo mkade xaa re xaa yezh lo re kwaan gro kwaan mle xaa. 12 Per gorna lee Lip nzaa kwent cheen wdizh chul cheen Jesucrist lo xaa, nu cheen pa nabeyy Dios rop Jesucrist, xaabyi nu ngwnaa mzelo ngwii lo Dios nu mrubnis xaa. 13 Nu axta noka Simón, xaa ngok wezh mzelo ngwii lo Jesús nu mrubnis xaa, nu snee mreke xaa tich Lip, nu ndedyall xaa ngwii xaa lo re yalgro kwaan nlu lo xaa.
14 Leezha mzhin diizh lo re xaa mkayaa yalnabeyy lo Jesús lee re xaa Samaria mkayaa wdizh chul cheen Dios, zee mxaal re xaa Pér rop Juan ngwa yezh Samaria. 15 Gorna mzhin rop xaa ne yezh Samaria, ngunaab xaa lo Dios zee kayaa re xaa Jesús, xaa Samaria, Mbi Naban cheen Dios. 16 Sbaa mle rop xaa ne nel zer kayaa re xaa Samaria Mbi Naban; nebse mrubnis xaa kwaan yalnabeyy cheen Jesús, Xaa Nabeyy. 17 Zee Pér nu Juan mzhib yaa yek re xaa, nu snee mkayaa re xaa Mbi Naban.
18 Gorna ngune Simón lee rop xaa mkayaa yalnabeyy lo Jesús nzhib xaa yaa yek re myet, zee lee re myet mkayaa Mbi Naban, zee nzhekla Simón ngzaa demi lo rop xaa ne, 19 kwaanzee nzhé xaa lo xaa:
—Zaa gu lo na yalnabeyy kwaan nkano gu ka na, zee noka na gorna zhib na yaa na yek re myet, noka kayaa xaa Mbi Naban cheen Dios.
20 Zee mkeb Pér lo xaa nzhé:
—¡Lu, nu xdemi lu lux, nel mle lu xgab zii lu yalnabeyy kwaan nzelazh Dios kwaan demi! 21 Nyent mod kee lu xchiin Dios, nel lee lextoo lu nanakt nali lo Dios. 22 Blaa xgab nawent kwaan nkano lu, nu bnaab lo Dios zee chelee nzho moda, chee xaa kwaan nawent kwaan nzho leen lextoo lu, 23 nel nzeen na nzho yalnayii lextoo lu nu nkadoo lu lo re kwaan nawent kwaan nabeyy lextoo lu.
24 Nu Simón mkeb nzhé:
—Naab gu lo Xaa Nabeyy, zee nyent cho kwaan gak na lo re kwaan né gu.
25 Gwluzh ngulo mzaa xaa kwent cheen xtizh Xaa Nabeyy, lee rop xaa mkayaa yalnabeyy lo Jesús, nya naz Jerusalén nu mzaa xaa kwent cheen wdizh chul leen re yezh win cheen Samaria dubse naz.
Lip nu xaa yizhyo Etiopía
26 Gwluzh ngulo mded kwaane tub mandad cheen Xaa Nabeyy nzhé lo Lip:
—Gwa nu bzen naz kwaan nkato naz Jerusalén kwaan nzha naz yezh le Gaza —naz ne nded naz wen.
27 Kwaanzee naz zee nzha Lip. Nu baa mzhaal xaa tub xaa non yizhyo Etiopía, xaa nankat ngwnaa. Lee xaa ne nkanap rese xdemi Candace, me nabeyy rese xaa Etiopía. Xaa ne mroo Jerusalén pa nguyoll xaa lo Dios. 28 Nya xaa lazh xaa nu nzob xaa leen tub karret, nu nya xaa nyilab xaa yech kwaan mkee Chay, xaa mzaa kwent kwaan nzhé Dios lo lee xaa yilo.
29 Zee lee Mbi Naban nzhé lo Lip:
—Brexonn zee yiga karret ba lo lu.
30 Gorna mbii Lip lo karret, mbin xaa lee xaa Etiopía kalab yech kwaan mkee Chay, zee mnabdizh xaa lo xaa:
—¿Che nla kwaan kalab lu yek lu?
31 Lee xaa Etiopía mkeb nzhé:
—¿Xomod laya yek na, kwaan nyent cho xaa zaa kwenta lo na xomod naka? —Nu zee nzhé xaa lo Lip— Guxoob nu zob xkwes na nee.
32 Lee kwaan kalab xaa nak kwaane:
Wee xaa xaa kwenta tub mbakxiil lo yalgut,
nu kwenta tub mbakxiil leezha nchub xaa yich led ma nambazhet ma,
nixa lee xaa naniit nik tub wdizh.
33 Leeka lee xaa le xaa mod tub xaa nanont,
kwaanzee nanalit ngunaab xaa kwent lo xaa.
Nanzaat xaa kwent cheen re xinn xaa, nel gut xaa xaa. [Is. 53:7-8]
34 Nu lee xaa Etiopía mnabdizh lo Lip, nu nzhé xaa:
—¿Chu zné lu lo na? ¿Cho xaa nzaa xaa ne kwent, che leeka lee xaaya o stub xaa kazet xaa?
35 Zee lee Lip mkeb nzhé lo xaa:
—Chay mzaa kwent cheen Jesús.
Nu snee mzelo xaa mzaa xaa Kwent Chul cheen Jesús lo xaa Etiopía. 36 Mas gwluzh mzhin xaa tub pa nzho nis nu lee xaa Etiopía nzhé lo xaa:
—¡Wii, baa nzho nis! ¿Che nyent mod rubnis na nal?
37 Lee Lip mkeb lo xaa nzhé:
—Chelee lu wii lu lo Jesús kwaan dub lextoo lu, nzho mod rubnis lu nal.
Nu lee xaa mkeb nzhé:
—Ngwii na lo xaa, nu ne na lee Jesucrist nak Xgann Dios.
38 Nu mnabeyy xaa xaa nzeno karret zee sekwaz xaa karret, zee lee Lip nu xaa Etiopía mla lo karret zee nzha xaa paro myun nis lo xaa, nu gorna mzhin xaa mzeeb xaa leen nis, zee mchubnis Lip xaa. 39 Gorna mroo xaa leen nis, lee Mbi Naban cheen Xaa Nabeyy mbe Lip. Nu lee xaa Etiopía nambaretra ngune lo Lip. Nu nyaka xaa xnaz xaa nu nyakdoola xaa. 40 Nu lee Mbi Naban mbe Lip axta yezh le Azoto. Zee mded xaa rese yezh naz baa, nu mzaa xaa kwent cheen wdizh chul, zee mzhin xaa yezh Cesarea.