7
Re xaa Israel, xaa mleey Dios
1 Gwluzh ngulo mded re kwaane, myun tap mandad cheen Dios lo na, xaa nzoli lo dap skin yizhyo, nu nsaaw xaa dap mbi cheen yizhyo, zee nanroot mbi lo yizhyo nixa leen nistoo nixa leen yag. 2 Noka myun stub mandad lo na, xaa nze lo mbizh, pa nlen mbizh; nu nkano xaa sey cheen Dios, xaa tira mban. Mandad ne ngunii dublegan lo dap mandad xaa mkayaa yalnabeyy lux re kwaan lo yizhyo nu leen nistoo:
3 —¡Naluxt gu kwaan nzho lo yizhyo nixa leen nistoo nixa naluxt gu re yag, axta gorna yilo kee nu sey cheen Dios lechuzh re xmos Xdios be!
4 Nu mbin na lak xaa mkee sey cheen Dios lechuzh, tub gayoo choobtap mil xaa lo re sawlazh na, xaa nak dii cheen Israel, mkee sey lechuzh. 5 Mkee re xaa ne sey:
xaa dii cheen Judá, chiibchop mil xaa,
xaa dii cheen Rubén, chiibchop mil xaa,
xaa dii cheen Gad, chiibchop mil xaa,
6 xaa dii cheen Aser, chiibchop mil xaa,
xaa dii cheen Neftalí, chiibchop mil xaa,
xaa dii cheen Manasés, chiibchop mil xaa,
7 xaa dii cheen Simeón, chiibchop mil xaa,
xaa dii cheen Leví, chiibchop mil xaa,
xaa dii cheen Isacar, chiibchop mil xaa,
8 xaa dii cheen Zabulón, chiibchop mil xaa,
xaa dii cheen Che, chiibchop mil xaa,
xaa dii cheen Benjamín, chiibchop mil xaa,
Zyen doo xaa nak ler rus
9 Gorna ngulo myun re kwaane lo na, myun lo na zyen doo xaa, nu nik tub xaa nalet gan lab re xaa. Baa ngu xaa reta yezh, xaa reta ben, xaa reta dii, nu xaa nzhedizh reta klas dizhze. Nzo re xaa delant lo Dios, xaa nzob xaa naz pa nabeyy xaa, nu lo Mbakxiil. Rese xaa ne nak ler rus nu nzho lag cheen yag yin yaa re xaa ne. 10 Nu rese xaa nii dublegan:
¡Lee Xdios be, xaa nzob naz pa nabeyy xaa, nu lee Mbakxiil
nzaa yalnaban kwaan tira!
11 Nu lee rese mandad cheen Dios nzo dub welt pa nzob Xaa Nabeyy nu lo re xaa gol nu lo dap xaa mban. Nu axta lo yo mkichyek re xaa lo Dios, xaa nzob naz pa nabeyy xaa nu mbill re xaa lo Dios. 12 Nu nzhé re xaa:
¡Sbaa gaka!
Lee lo Xdios be nzhaal gool rese myet lo,
nel re xni nu yalnzhak nak cheen xaa,
nu lo lee xaa nzhaal zaa rese myet dixkix nu wii rese myet lo xaa,
nel lee xaa nkano rese yalnabeyy nu dubse yalngezh.
¡Sbaa gaka!
13 Zee lee tub xaa gol ngunabdizh lo na:
—¿Cho nak re xaa nak ler rus ne?, nu ¿pa mroo re xaa ne?
14 Zee mkeb na lo xaa nzhé na:
—Lu ne.
Nu lee xaa mkeb lo na nu né xaa:
—Re xaa ne nak xaa mroo lo re bid kwaan gro, nu mzet xaa xab xaa nu mle rus xaaya kwaan xren Mbakxiil. 15 Kwaanzee nzo re xaa delant lo pa nabeyy Xaa Nabeyy, zhe nu yaal nkee xaa zhiin lo Dios leen Xkyidoo Dios, nu Dios kanap re xaa leen li xaa. 16 Nadedtra xaa bid lo yalnlaan nixa lo yizhnzhek, nixa nazeyytra mbizh re xaa, nu nixa nazeentra re xaa neey; 17 nel lee Mbakxiil, ma nzo xsaww pa nzob Xaa Nabeyy, nkanap re xaa mod mbakxiil nu nyano xaa re xaa roo xlen cheen yalnaban, nu Dios chee re nis garlo xaa, xaa mbinn.