1 Ngulo mded re kwaane, myun stub mandad lo na, xaa nzela naz yiba, xaa nkano gro doo yalnabeyy, nu mla xni cho xaa. 2 Nu dublegan nii xaa, mbezh xaa nu nzhé xaa:

—¡Mlux Babilonia, yezh ndok! ¡Ngoka tub pa nzho re mbi mal, nu ngoka tub pa nkaxlaan re mbi mal, nu ngoka xlaaz rese mbyin, ma nyent mod gaw xaa nu re mbyin naxinn! 3 Nel rese yezh yizhyo mzuzh kwaan re kwaan nawent kwaan mle me nu rese rey yizhyo mchaal me, nu lee re xaa nto dubse yizhyo nzheyak rik lo re kwaan mzoblazh me mzi me.

4 Zeera mbin na stub bos kwaan nze axta naz yiba, kwaan nii:

—Broo gu yezh ba, re xaa nak xaa na, zee nalet gu re kwaan nawent kwaan nle me, nu nayizot gu re yalzi kwaan zhin lo me, 5 nel lee re jwalt cheen me mri monton nu mzhinla axta yiba, zee lee Dios mselazh re kwaan nawent kwaan kale me. 6 Bare gu kix gu lo me, leeka kwaan mle me lo stub naz re xaa; bdix guya chop welt lo me, lo re kwaan mle me; bted gu me masra bid ke mted meya stub naz xaa, kwaan gak kwenta nzoo chop welt nakap. 7 Nu leeka mod mle non me leeka lee me, nu ngu chul me, leeka mod ba bted gu me bid, bsegonn gu me, nel leen lextoo me nzhé me: “Lee na nak me nabeyy, nu nalaket techo na nixa nagonnt na”. 8 Kwaanzee tubka mbizh zhin rese yalzi lo me: ded me bid lo yalyizh, goon me, nu ded me yalnlaan, nu yek me lo bal, nel lee Dios naab kwent lo me, xaa nak xaa ngezh doo.

9 Nu lee re rey yizhyo, xaa kwaan mchaal me nu ngu chul kwaan lee me, goon nu yo bel gorna ne xaa lo zhen kwaan karoo kayek me. 10 Nu zit zo re xaa wii, nel nzheb xaa ne xaa bid kwaan kaded me nu yé xaa:

—¡Nales doo nzhak lu Babilonia, yezh kwaan ngezh doo! Nel naltaka mzhin bid cheen lu.

11 Nu noka lee re xaa nto gonn nu yo bel ne yezh ne, nel nyentra cho xaa zii re xcheen xaa; 12 kwaan nak:

—¡Nankanotra lu re xle kwaan tant nyula lu; nu tira nakanotra lu re kwaan chul nzhak nu kwaan non!

15 Nu lee re xaa kwaan ngok rik nto re kwaane lo yezh Babilonia, nya zo zit nel nzheb xaa ded xaa bid nu gonn xaa, nu yé xaa:

16 —¡Ay, ay nales doo nzhak yezh ndok doo! Kwenta tub ngwnaa nzhak me, me nak ler chul, me nak ler morad nu naxne, nu nzho or nu nguzbga kwaan ke le perla yenn me. 17 ¡Nu tub goraka mlux rese kwaan non cheen me!

Nu rese xaa nabeyy leen re bark, nu re xaa nkee zhiin leen bark, nu xaa nzha leen bark, nu rese xaa nle gan demi nkee zhiin lo bark, mzo zit; 18 nu gorna myun zhen kwaan kayek me lo xaa, nzhé re xaa dublegan:

—¡Nyentra stub yezh lal kwaan yezh ndok ne!

19 Nu mchuun re xaa yide yek xaa, nu nzhonn xaa nu mrezh re xaa nzho bel, nu nzhé xaa:

—¡Ay, ay nales doo nzhak Babilonia yezh ndok! Kwaan re demi cheen me, ngok rik rese be, xaa kwaan nkano bark leen nistoo. ¡Nu tub goraka mlux Babilonia!

20 Rese gu xaa nzho yiba, ble chul gu lextoo gu kwent cheen yezh ne; ble chul gu lextoo gu, re gu xaa nambey nak, nu re gu xaa mkayaa yalnabeyy lo Jesucrist, nu re gu ngunii Dios lo; nel lee Dios ngunaab kwent lo me, zee mdix me re bid kwaan mded gu.

21 Zee lee tub mandad xaa ngezh doo, mzen tub ke ndok, kwaan nzhak kwenta tub ke molin nu mlebi xaaya leen nistoo nu nzhé xaa:

—Sbaa la Babilonia, yezh ndok naz xan, nu nik stub xaa nanetra loya. 22 Nu lee bi cheen bagwel, cheen bzhik nu cheen trompet nakeetra rezh leen yezh ne stuba, nu nixa nakeetra re xaa ba zhiin, nu nixa nayotra rezh cheen ke molin stuba. 23 Nu nalutra xni leen yezh ne, nu nixa nik stub welt nachelyatra re xaa yezh ne; sbaa ded yezh ne nixa non doo ngok re xaa nu nto xaa xcheen xaa dubse yizhyo, nel mkade re xaa rese yezh kwaan yalwezh cheen xaa.

24 Nu nel lo yezh ba mxo xren re xaa mzaa kwent kwaan nzhé Dios lo lee xaa yilo, nu xren re xaa mle nambey Jesús, nu xren rese xaa kwaan nzheyet lo yizhyo.