1 Jesucriston' gwleje' neda' Pablo cont naca' postlw c̱he', ḻe can' chazlaže' Diosen'. Neda' txen len beṉe' ḻježcho Timoteon' chguapto' le'e tiox. 2 Chzoja' le'e zoale Colosas, le'e chejnilaže'le Criston' na' nacle ḻo na' Diosen'. Chṉaba' gaclenšca X̱acho Diosen' le'e na' gone' cont soa cuezle binḻo.

3 Yogo' ṉi'a cate' choḻ güižto' Dios ben' nac X̱a X̱ancho Jesucriston' choe'to' yeḻa' chox̱clen c̱he' can' chonḻen'. 4 Ḻe ba beneto' diža' can' chejnilaže'le Cristo Jesúsen' na' can' chaquele yogo' beṉe' ca' yezica'chle zjanaque' ḻo na' Diosen'. 5 Na' ṉezeto' chejnilaže'lene' na' chaquele ḻegaque' lagüe da' zoale lez šjayzoale len Diosen'. Caten' gwzolao bzenagle c̱he xtiža' Diosen' da' naquen da' güen na' da' ḻi, gwyejni'ile gac c̱hele ca'. 6 Na' xtiža' Diosen' da' ba bzenagle ba gosḻasen doxen, na' beṉe' zan ba chosozenague' c̱hen. Na' ḻegaque' ḻecze chesone' güen ca gwzolao le'e chonḻe caten' gwyejni'ile diža' ḻi da' chzejni'in nži'ilaže' Diosen' le'e, na' ṉe' chonḻe güen ža ṉa'aža. 7 Chaqueto' Epafras ben' bzejni'ide' le'e xtiža' Criston'. Chone' xšin Diosen' can' chon neto', na' zoateze' chone' can' ža Criston' da' chaclaže' gaclene' le'e. 8 Ḻen' ba gože' neto' ba ben Spiritw c̱he Diosen' cont chaquele Diosen' na' chaquete ḻježle.

9 Da'nan' caten' gwṉezeto' ca güenṉa' chonḻe, gwzolaoto' yogo' ṉi'a cate' choḻ güižto' Diosen' chṉabeto'ne' gaclene' le'e. Chṉabto' goṉ Spiritw c̱hen' le'e yogo' cuen yeḻa' sina' na' yeḻa' chejni'i cont ṉezele nacyaṉen' chaclaže' gonḻe. 10 Chṉabto' soale gonḻe can' cheyaḻa' gon chio' nombia'cho X̱anchon', cont yebede' yogo' dan' chonḻe. Na' chṉabto' gaclene' gonḻe zan cuen da' güen na' gaclene' šejch gombia'lne'. 11 Chṉabto' gaclen Diosen' le'e len yeḻa' guac xen c̱he' cont soatezle šejnilaže'lene' na' gaple yeḻa' chxenḻaže' bite'tezen' chac. 12 Na' chṉabto' soale mbalaz güe'le yeḻa' chox̱clen c̱he X̱acho Diosen', ḻe ḻe'na' ba gwleje' chio' ba naccho ḻo ne'e cont šjayzoacho len ḻe' gan' yo'o be'ni' juisyw. 13 Bebeje' chio' ḻo na' gwxiyen' cate' da' c̱hoḻen' ṉe' chnabian' yic̱hjlažda'ochon', na' gwlo'e chio' ḻo na' Xi'iṉe' Jesucriston' ben' chacde', cont ṉa'a gwzenagcho c̱he ḻe'. 14 Na' Xi'iṉ Diosen' bnežjw cuine' gote' cont beque'e xtoḻa'chon' na' chezi'xen Diosen' c̱hecho.

15 Criston' naque' cayaṉen' nac X̱e' Dios ben' nono chle'e. Ba zoacze Criston' cate' biṉa' x̱e yežlion' na' cate' biṉa' gata' yogo'ḻoḻ da' de ḻe'e yaban' na' ḻo yežlion'. 16 Criston' bene' yaban' na' yežlion', bene' beṉe' že' yaba na' yežlio, len bica'chle da' zjade yaban' na' yežlio nga. Bene' da' ca' chle'echo na' da' ca' bi chle'echo. Bene' cont nita' angl gwnabia' ca' na' da' ca' besyeyac da' x̱igüe' ca' na' bichle da' ca' chesenabia' yic̱hjlaždao' beṉe' ca' bi chosozenag c̱he Diosen'. Na' Criston' bene' cont nita' beṉe' ca' na' yogo' da' ca' cont gacxene'. 17 Criston' ba zoacze' cate' biṉa' ṉita' yogo'ḻoḻ da' de ḻe'e yaban' na' ḻo yežlion'. Na' yogo' bite'teze da' zjade zjanaquen con can' zjanaquen, ḻe Criston' zoacze' chone' cont zjanaquen ca'. 18 Na' Criston' chnabi'e chio' chdop chžagcho chonxenchone'. Ḻen' bx̱ie' yeḻa' mban toḻi tocaṉe c̱he beṉe' chesejnilaže'ne', na' naque' beṉe' nechw bebane' ladjo beṉe' guaten' ben' bich ṉabia' yeḻa' goten' ḻe'. Da'nan' naque' ḻa'zelaogüe beṉe' blao na' chnabi'e yogo'ḻoḻ beṉe' na' bica'chle da' zjade. 19 Na' Diosen' chazlaže' dan' nac yic̱hjlaždao' Criston' cayaṉen' nac yic̱hjlaždao' ḻe' na' dan' nac yeḻa' guac c̱he Xi'iṉe' Criston' doxen can' nac yeḻa' guac c̱he ḻe'. 20 Na' ḻecze chazlaže' yozoe' binḻo len ḻe' yogo' beṉe' že' yaban' na' yežlion', ḻe Xi'iṉe' Criston' bnežjw cuine' blalj xc̱hene' ḻe'e yag cruzen' cont gac yesenite' binḻo len ḻe'.

21 Cana' bi nombia'le Diosen'. Bgue'elne' na' gwzoale benḻe da' malen'. Perw ṉa'a ba bozoa Criston' le'e binḻo len Diosen', 22 ḻe bnežjw cuine' ṉec̱he chio' caten' gosote'ne'. Na' beyone' lažda'ochon' xilaže' cont bibi doḻa' gapcho cate' yežincho lao Diosen', na' bibi de da' zaca' yosocuiše' chio' lagüen'. 23 Na' še soacho šejnilaže'cho Criston' na' soac̱hac̱hcho len toze xbab, na' soateze soacho lez šjayzoacho len Diosen' can' gwzelaže'cho gac c̱hecho cate' bzenagcho xtižen' da' nechw, nachen' bibi doḻa' gapcho cate' yežincho lao Diosen'. Na' diža' güen c̱hen' ba bžinen doxen yežlion' cont beṉac̱hen' chesenden', na' Diosen' gwleje' neda' Pablo chyix̱jue'edan'.

24 Da' zan da' chyi chzaca' lagüe da' chyix̱jue'eda' xtiža' Diosen' len le'e bi nacle beṉe' Israel. Na' le'e chdop chžagle chonxenḻe Criston' nacle ca cuerp c̱he'. Na' chbeda' chžaglagua' yogo' da' chaclaže' Criston' žaglagua' da' gaclenen le'e. Na' cate' chžaglagua' neda', guac ṉacho cuin Criston' chžaglagüe'. 25 Diosen' gwleje' neda' chyix̱jue'eda' xtižen' len le'e chdop chžagle chonxenḻe Criston', cont gwzejni'ida' le'e doxen can' zeje xtižen'. 26 Cani' nono ṉa' ṉeze da' güen da' chon Diosen' len beṉe' chesejnilaže'ne', perw ṉa'a Diosen' ba bzejni'iden' chio', chion' naccho ḻo ne'e. 27 Diosen' chaclaže' ṉezecho ḻeca güen juisyw chone' len note'tezcho chejnilaže'chone', ḻa'czḻa' bi naccho beṉe' Israel. Cana' nono gwṉeze gone' da' güen juisyw len note'tezcho, perw ṉa'a Diosen' ba bzejni'ide' chio' zoacze Criston' len chio' chejnilaže'chone' na' da'nan' zoacho lez šjayzoacho len Diosen' gan' yo'ochgua be'ni'. 28 Choe'lena' yogo' beṉe' diža' c̱he Criston', chata'yoeda' yogüe' yosozenague' c̱he', na' chzejni'ida' yogüe' xtižen' cont yesejni'iden' binḻo, ḻe chaclaža' yogo' beṉe' chesejnilaže' Criston' yesaque' cayaṉen' chaclaže' Diosen'. 29 Da'nan' chona' con ga zelao chzoeda' chyix̱jue'eda' beṉe' xtižen', na' chaclenchgüe' neda' len yeḻa' guac xen c̱hen'.