1 Bitw gwsanḻe gaque ḻježle, ḻe yogo'cho chejnilaže'cho Jesucriston' naccho ca biše' ḻježcho. 2 Na' bi ganḻaže'le cheyaḻa' gwleble beṉe' za'ac zito' ližlen' beṉe' chesejnilaže' Jesucriston'. Baḻ x̱ozxta'ocho ca' cate' bosolebe' beṉe' zito' ližgaquen' bosolebe' angl beṉe' gwseḻa' Diosen' ṉeca gosacbe'ede'.

3 Cheyaḻa' gonḻe xbab c̱he beṉe' ḻježcho ca' chesata' ḻižya cont gaclenḻe ḻegaque'. Na' cheyaḻa' gonḻe xbab can' gaḻe'le šaca' chac c̱hele can' chac c̱he beṉe' ca'. Na' bi ganḻaže'le beṉe' ḻježcho bi da' chosoc̱hi chososaca' beṉe' ḻegaque', ḻe šlac ṉe' mbancho, cuerp c̱hechon' guac saca'zin' da' quinga. Na' cheyaḻa' gonḻe xbab can' gaḻe'le šaca' chac c̱hele can' chac c̱he beṉe' ca'.

4 Na' le'e nšagna'le, yogo'le ḻe soa do laže'le len no'ol c̱hele o beṉe' c̱hele na' bi talenḻe beṉe' yoble, ḻe Diosen' gone' saca'zi' beṉe' chesata'lene' no'ole bi zjanac no'ol c̱hegaque' o beṉe' byo bi zjanac beṉe' c̱hegaque'.

5 Bi cheyaḻa' selaže'cho mechon', san cheyaḻa' soacho becho bi da' dao' da' de c̱hecho, ḻe Diosen' ba gwne' c̱he to tocho: “Bi ganḻaža' le' na' bi cuejyic̱hja' le'.” 6 Da'nan' bibi de da' žebcho, na' to tocho guac ṉacho:

7 Ḻe šjayze'e beṉe' gwnita' bosozejni'ide' le'e xtiža' Diosen'. Ḻe gon xbab can' gosone' cont yogo'ze beṉe' gosacbe'ede' gosenite' gosejnilaže' Diosen', na' ḻe ṉita' ḻe šejnilaže' Diosen' can' gosonen'.

8 Na' can' nac yic̱hjlaždao' Jesucriston' ṉej ṉase, ca'czen' naque' ža ṉa'aža, na' ca'czen' gaque' toḻi tocaṉe. 9 Bi güe'le latje yeseziye' beṉe' le'e len bi diža' yoble da' chosozejni'ide', ḻe nža' xen can' chososed chosolo'e baḻe'. Da' chon Diosen' ḻo' lažda'ochon' ṉec̱he da' nži'ilaže'chgüede' chio', ḻenṉa' chaclenen chio', gague da' ca' chesena beṉe' cheyaḻa' ye'ej gagwcho. Na' ca nac da' ca' chesene' cheyaḻa' ye'ej gagwcho cont yebe Diosen' chio', biṉa' yesaclenen beṉe' ca' chesene' cheyaḻa' gagwchon, na' ṉeca gaclenen chio'.

10 X̱ancho Jesucriston' bnežjw cuine' gosote'ne' ṉec̱he chio', na' da' chejnilaže'chone' ba gwnitlao xtoḻa'chon'; perw beṉe' ca' ṉe' chosolalje' xc̱hen beyix̱e' na' chosozeye'ba' cate' cheseṉabe' yezi'xen Diosen' c̱hegaque', da' got Jesucriston' bi chaclenen ḻegaque'. 11 Ṉezecho tṉi'a tgüiz beṉe' nac bx̱oz blao c̱he beṉe' Israel gualaž c̱hecho ca' chesote' beyix̱e' na' chjasesane' xc̱hemba' ḻo' yodao' gana' nzi' Latje ga Zoa Dios cont chṉabde'ne' yezi'xene' xtoḻa' yogo'ḻoḻ gaque'. Nach yezica'chle bx̱oz ca' chosozeye' cuerp c̱he beyix̱e' ca' cho'a yežen'. 12 Na' ca ca'le goc c̱he Jesúsen' dan' gosote'ne' cho'a ciuda Jerusalénṉa' cate' bnezjw cuine' cont beque'e xtoḻa'chon' len xc̱hene' dan' blaljen'. 13 Da'nan' cheyaḻa' šejnilaže'cho Jesúsen' na' cuejyic̱hjcho costumbr gol ca', ḻa'czḻa' yesegue'e beṉe' chio' da' choncho ca'. 14 Gate'tez zoacho ḻo yežlio nga da' te c̱hen, perw chbezcho šjayzoalencho Diosen' ḻo ciuda da' bi te c̱hen. 15 Da' ba beca'a Jesucriston' xtoḻa'chon' cheyaḻa' güe'cho yeḻa' chox̱clen c̱he Diosen' yešlale mbancho, gonxenchone' len xtiža'chon'. Ḻenṉa' da' chaclaže' Diosen' güe'chone'. 16 Na' cheyaḻa' soacho goncho da' güen na' cheyaḻa' gwnežjwcho con gaca'te da' saque' gwnežjwcho gaclencho beṉe' bi de c̱hegaque', ḻe chazlaže' Diosen' cate' chonxenchone' choncho ca'.

17 Ḻe gwzenag c̱he beṉe' chososed cheselo'ede' le'e xtiža' Diosen' na' ḻe güe' latje yesene' naquen' gonḻe, ḻe chosogüia cheseṉe'e le'e cont chesaclene' le'e len yic̱hjlažda'olen', na' ḻegaque' cheyaḻa' yosyodie' cuent lao Diosen' še naquen' ba gosone'. Ḻe gwzenag c̱hegaque' cont yesyebede' na' cont da' chesone' bi gaquen to da' zdebe, ḻe še gonḻe güedenag len ḻegaque', bibi da' güen chga'aṉ c̱hele še ca'.

18 Ḻe ṉab cont gaclen Diosen' neto'. Ṉezeto' chonto' can' chazlaže' Diosen' na' chaclaže'to' gonto' con da' naquen güen. 19 Na' ḻeca chata'yoeda' le'e yoḻ güižle Diosen' ṉable yob gac yidcha' gan' zoalen'.

20 Na' ṉa'a zoa Diosen' chone' cont zoa chbezcho binḻo len xbab da' yo'o ḻo' yic̱hjlažda'ochon'. Ḻen' bec̱his bosbane' X̱ancho Jesucriston' ladjo beṉe' guat, ḻe da' blalj xc̱henen' ḻe'e yag cruzen' gwzolao chac da' cobe da' gwna Diosen' gone' gaclene' beṉe' yesejnilaže'ne'; na' gague da' te c̱he dan' gwne' gonen'. Na' da' nži'ilaže' X̱ancho Jesucriston' chio', zaca'lebde' ca to beṉe' güeye' xila' beṉe' chon da' güen juisyw len be c̱he' ca'. 21 Na' chṉabda' Diosen' gaclene' le'e bite'tez da' chyažjele cont soale gonḻe yogo'te da' güen can' chazlažen', na' gone' cont gac yic̱hjlažda'ochon' cayaṉen' chaclaže' lagüe da' nombia'cho Jesucriston'. Ḻe gonxen Jesucriston' toḻi tocaṉe. Na' ca' gonšcaczcho.

22 Beṉe' migw, chṉabšca' bi gaquele zed da' ba bzoja' le'e chṉeyoeda' le'e nga, ḻe bitec naquen da' toṉe. 23 Na' chzenda' le'e beṉe' migw c̱hecho Timoteon' ba bechoje' ḻižyan' na' chbeza'ne' nga. Na' še yob yele'e nach c̱hi'ane' cate' yedeṉa'a le'e.

24 Ca nac neda', chguapa' tiox beṉe' blao ca' chosozejni'ide' le'e na' chosogüia cheseṉe'e le'e, na' ḻecze chguapa' tiox yogo' nochle beṉe' chesejnilaže' Diosen'. Beṉe' ḻježcho ca' za'ac Italia ḻecze chosoguape' le'e tiox.

25 Diosen' gaclenšque' le'e. Da' na'zen' chzoja'.