1 Leꞌa zha li ncho Apolos Corinto wa, leꞌa Pabl utid sa ndiꞌib be geꞌe ubiꞌi, cha ulayaꞌ xa gezh Éfeso. Leꞌa sa wa cha mzheꞌal xa pla be xmen Jesús. 2 Cha unabdiꞌizh xa ndoꞌ bexa ndab xa:

—¿Uyoꞌo Espíritu ten Dios len ladoꞌo bega, gor na mbingea ladna bega Jesús zha?

Leꞌa bexa wa ukaꞌab ndab:

—Ni lá ndoꞌón besa ti ncho Espíritu ten Dios.

3 Leꞌa Pabl cha ndab:

—¿Xteꞌe utaleaꞌ bega zhaga?

Leꞌa bexa ukaꞌab ndab:

—Utaleaꞌ besa lak ulaleaꞌ Juan be men wa.

4 Leꞌa Pabl cha ndab:

—Leꞌa Juan ulaleaꞌ bexa na mlaꞌa be ta ugap nak bexa, no ndab Juan gungea ladna bexa xa na nsea tsoꞌo Juan wa. Leꞌa ta wa Jesús xa nak Cristo.

5 Leꞌa gor na mbiꞌín bexa ta wa, cha stub biaj utaleaꞌ bexa len nits, ta nluu leꞌa bexa xmenka Jesucristo. 6 Cha mxoꞌob Pabl yaꞌa na gek bexa, cha no bexa uyoꞌo Espíritu ten Dios len ladoꞌo na. Cha usaxan bexa ndadiꞌizh bexa stubga diꞌizh, no ndadiꞌizh bexa sakndoꞌ Dios. 7 Leꞌa bexa wa pa dub tibtop xabgiꞌi.

8 Leꞌa pa chon mbeꞌe be wizh sabd leꞌa Pabl ndaꞌuluu be men len niꞌi sa nzhealbe bexa judio. Ni lá nzheb Pabl ndadiꞌizhno bexa wa ná xteꞌe nibeꞌe Dios be men, ndontsa no bexa gungea ladna ta wa. 9 Ná leꞌa ncho bexa wa myak ngud ladoꞌo na, ni lá kaꞌab bexa gungea ladna bexa ta ndadiꞌizh Pabl. Ndi kweaꞌ uníꞌi bexa ndoꞌ gaꞌal be men cuent ten Nes ten Cristo. Ta weꞌe leꞌa Pabl cha mteltsaꞌa bexa wa, mbiꞌi xa bexa tiꞌi mbingea ladna Jesús dub niꞌi scuel ten dub mech nsaleaꞌ Tirano. Cha itea wizh mluu Pabl bexa sa wa. 10 Pa stop liꞌin li mbin Pabl gast itea bexa Asia wa mbiꞌín diꞌizh ten Jesús, bexa judio no bexa naꞌanpa xa judio.

11 Leꞌa Dios leꞌa msaꞌa juers mbin Pabl be uyon uzheꞌeb ndanseana be men, 12 gast ncho bexa mbiꞌi bay ten Pabl no dub xab Pabl ndoꞌ bexa gizh no ndoꞌ bexa ncho mbi bxin len ladoꞌo na. Cha myakna bexa gizh wa no utoꞌo mbi bxin len ladoꞌo bexa.

13 Ná leꞌa ncho bexa judio ndesea gezh Éfeso no nlad kontuꞌub be mbi bxin ncho len ladoꞌo be men. Leꞌa bexa wa no mbintiꞌin leaꞌ Jesús, ndab bexa ndoꞌ be mbi bxin wa:

—Leꞌa juers ten leaꞌ Jesús na ndadiꞌizh Pabl wa, nibeꞌe naꞌ utoꞌo len ladoꞌo xa baꞌ.

14 Leꞌa ta wa ta ndun dub gaꞌad xin dub xa judio nsaleaꞌ Esceva, dub uleꞌay nibeꞌe. 15 Ná ngol gor leꞌa dub mbi bxin wa ukaꞌab ndab ndoꞌ bexa wa:

—Naꞌ nchandoꞌ Jesús wa, no uní naꞌ ton nak Pabl. ¿Ná leꞌa bego zha, ton nak bego?

16 Leꞌa xabgiꞌi na ncho mbi bxin len ladoꞌo na cha usaxan udin bexa wa. Leꞌa xabgiꞌi wa ndi mbin gan ndoꞌ bexa, no mtsawiꞌi xa bexa. Leꞌa bexa naꞌantapa nak be xab na mxoꞌon bexa ta lid xabgiꞌi wa. 17 Leꞌa itea bexa Éfeso wa, bexa judio no bexa naꞌanpa xa judio, leꞌa gor na mbiꞌín bexa ta wa, cha mzheb bexa, ndab bexa leꞌa leaꞌ Jesús uzhebpa ta juert nak.

18 No kwaꞌad bexa na tiꞌi mbingea ladna Jesús cha mbidiꞌizh ndoꞌ be xmen Jesús be ta ugap ngok bexa. 19 Leꞌa kwaꞌad bexa wa bexa mbin ta bruj. Leꞌa bexa wa mbiꞌi be libr ten na, cha mtsoꞌol bexa‑yá ndoꞌ gaꞌal itea be men. Leꞌa be libr wa nsak pa dub tol gayoꞌo mil med plata. 20 Li mluu Dios juers ten na, cha mas mteꞌachso diꞌizh ten Jesús, no mas kwaꞌad be men mbingea ladna ton nak Jesús.

21 Tsoꞌo wa leꞌa Pabl ulo ladna itid be gezh nde Macedonia no Acaya, cha ilayaꞌ xa gast Jerusalén. No mbinbeꞌe xa gor na itoꞌo xa Jerusalén wa, leꞌa xa nsabndoꞌ yaꞌ Roma. 22 Cha mtuꞌub Pabl Timoteo no Erast, top bexa na ndakno xa, yaꞌ bexa Macedonia. Leꞌa Pabl cha myaꞌan steꞌep Asia wa.

23 Leꞌa zha weꞌe uzheꞌeb ngokloo be men Éfeso wa ke ten Nes ten Cristo. 24 Uyoꞌo dub xabgiꞌi nsaleaꞌ Demetrio, xa ndandeꞌe be ta plata, be ta byux cuent latbadoꞌo ten Diana dios ten bexa. Leꞌa Demetrio wa sian med ndun gan no bexa ndunno xa tiꞌin. 25 Leꞌa xa wa mchealte bexa, cha ndab xa:

—Leꞌa bego uniꞌíka leꞌa beuna tiꞌin ndeema sian med nzheal beuna. 26 Ná leꞌa bega naꞌka no ndoꞌónka bega, leꞌa xa nsaleaꞌ Pabl ndadiꞌizh leꞌa be dios ndandeꞌe men, leꞌa ta wa naꞌanpa nak dios. Leꞌa kwaꞌad men ndangea ladna ta li ndab Pabl, bexa gezh Éfeso ndee no gast idub región Asia ndee. 27 Leꞌa be men rages lá isiꞌita ta ndandeꞌe beuna ndee, no rages lá yankeata bexa latbadoꞌo ten dios siꞌil Diana. No gab bexa yá lá nsakta dios Diana, xa ndankea itea bexa Asia no idub ndoꞌ gizhliyo.

28 Leꞌa gor na mbiꞌín bexa ta wa, uzheꞌeb ngokloo bexa, cha usaxan ugeꞌ ndab bexa:

—¡Siꞌil nak dios Diana ten beuna xa Éfeso!

29 Weꞌe uzhebpa mxaꞌach be men idub len gezh wa. Cha usen bexa top xabgiꞌi Macedonia, bexa ndeseano Pabl. Leꞌa dub xa wa nsaleaꞌ Gayo, leꞌa stub xa wa nsaleaꞌ Aristarco. Cha mbiꞌi be men wa itop bexa gast sa nzhealbe be men gezh wa. 30 Leꞌa Pabl cha nlad itoꞌo yaꞌyadiꞌizh ndoꞌ be men, ná leꞌa be xmen Jesús lá ulaꞌa. 31 No ncho bexa naktiꞌin Asia wa nakga amig ten Pabl. Leꞌa bexa wa mtuꞌub dub men ngwaꞌyab ndoꞌ Pabl lá yaꞌ Pabl lat be men wa. 32 Leꞌa be men wa uzhebpa níꞌibe ndoꞌ junt wa, ná leꞌa kwaꞌad bexa ni lá iniꞌí xtaꞌan li mzhealbe bexa sa wa. Ncho men ndab dub taꞌa, no ncho xa ndi stubga taꞌa xaꞌaga ndab. 33 Leꞌa lat bexa wa nsoꞌ dub xa nsaleaꞌ Alejandro. Leꞌa bexa judio cha msiꞌi xa ndoꞌ be men, ndontsa gab xa leꞌa bexa judio naꞌanpa no ndap ke. Leꞌa xa wa cha uxits yaꞌa na ndontsa xe kwe be men wa. 34 Ná leꞌa gor na uniꞌí be men leꞌa Alejandro xa judio, weꞌe pa dub top gor ugeꞌ ndab bexa:

—¡Siꞌil nak dios Diana ten beuna xa Éfeso!

35 Weꞌe leꞌa secretar ten gezh wa leꞌa mbin xe ute be men, cha ndab xa:

—Bego bexa Éfeso, itea be men ncho ndoꞌ gizhliyo uniꞌí leꞌa beuna gezh ndee nsabndoꞌka nlaꞌach latbadoꞌo ten dios siꞌil Diana, no uniꞌí bexa leꞌa geꞌ ten Diana ta ndankea beuna wa ulen gibeꞌa utoꞌo‑yá wats dios Júpiter. 36 Leꞌa ta ndee iteaka men uniꞌí leꞌa‑yá ta ugeaka. Ta weꞌe xe ute bega no binbeꞌe bega xtaꞌan ndun bega. 37 Leꞌa be xabgiꞌi na mbiꞌi bega ndee naꞌan xtaꞌan ndab ndoꞌ latbadoꞌo ten Diana ni lid nisi bexa dios ten beuna wa. 38 Leꞌa tal Demetrio no bexa ltsaꞌa xa ndi nlad usake dub men, ndoꞌ be juez no ndoꞌ bexa naktiꞌin nsabndoꞌ usake bexa xa, leꞌa bexa wa tiꞌin weꞌe ncho. 39 Ná tal leꞌa bega nlad inab stub taꞌa, sak gudiꞌizh bega‑yá ndoꞌ dub junt ko bexa naktiꞌin wa. 40 Rages usake bexa beuna ke ten ta uyoꞌo nat ndee, gab bexa leꞌa beuna ndi ndakloo ndoꞌ bexa naktiꞌin. Ná leꞌa beuna lá yoo gan gab xtaꞌan ndun lndeꞌeta mxaꞌach be men ndee.

41 Tsoꞌo na li ndab xa ta wa, cha ndab xa yaꞌbe be men wa.