23
Weꞌe leꞌa Pabl ndon gaꞌal nwiꞌi ndoꞌ bexa wa, ndab Pabl:
—Bego nak beuna xa Israel, leꞌa naꞌ gast len ladoꞌo naꞌ uní naꞌ leꞌa naꞌ leꞌaka nsoꞌ ndoꞌ Dios gast wizh nat.
Leꞌa Ananías xa nak uleꞌay ndon leꞌa nsak cha unibeꞌe ndoꞌ bexa nde gax wats Pabl kichyaꞌa toꞌo Pabl. Weꞌe leꞌa Pabl cha ndab ndoꞌ Ananías:
—¡Dios utsaksi ga, leꞌa ga cuenttsa dub xa wen nluu! Nsob ga sa baꞌ gab ga naga leꞌa nak ta mbin naꞌ lak nibeꞌe ley, ná unibeꞌe ga ndi utichyaꞌa bexa toꞌo naꞌ, dub ta naꞌanpa nibeꞌe ley wa.
Leꞌa bexa nde wats Pabl cha ndab ndoꞌ Pabl:
—¿Ndoꞌ uleꞌay ndon leꞌa nsak ten Dios lbaꞌa kweaꞌ níꞌi lu zha?
Leꞌa Pabl cha ukaꞌab ndab:
—Bego nak beuna xa Israel, leꞌa naꞌ lá iní ti uleꞌay ndon leꞌa nsak xa baꞌ. Leꞌa diꞌizh ten Dios nkeaniꞌi ndab‑a naꞌanpa kweaꞌ iníꞌi beuna ndoꞌ dub xa naktiꞌin.
Weꞌe leꞌa Pabl cha mnaꞌ leꞌa pla bexa wa bexa partid saduceo, ná leꞌa stapla bexa wa bexa partid fariseo. Weꞌe cha ugeꞌ ndab Pabl:
—Bego nak beuna xa Israel, leꞌa naꞌ xa fariseo xin bexa fariseo. Nsoꞌ naꞌ ndoꞌ bega nat geal ta na ndangea lad naꞌ leꞌa Dios ixiste bexa ngutla.
Leꞌa gor na li ndab Pabl, leꞌa bexa fariseo wa no bexa saduceo usaxan nyotoꞌobe. Cha myak top partid bexa wa, geal leꞌa bexa saduceo ndangea ladna leꞌa bexa ngutla yá naꞌantapa ibanbe. No ndangea ladna bexa naꞌanpa ncho angel ni xbi men. Parea leꞌa bexa fariseo ndangea ladna leꞌa bexa ngutla wa ibanka, no ncho angel no ncho xbi men. Weꞌe leꞌa itea bexa wa nbezhat níꞌibe. Leꞌa pla be mech ten ley bexa fariseo ngwasoꞌ ndab:
—Leꞌa xabgiꞌi ndee naꞌan xtaꞌan dub ta ugap ngun. Tal dub xbi men natal dub angel uníꞌi ndoꞌ xa, leꞌa beuna lá nsabndoꞌ uka ta ndun Dios.
10 Ná leꞌa ta na tant dub uteyotoꞌo bexa wa, leꞌa soldad nibeꞌe wa nzheb nchaꞌa bexa usu Pabl. Ta weꞌe unibeꞌe xa yate be soldad sa wa koꞌo bexa Pabl, cha goꞌo bexa xa leꞌaka len niꞌi ten be soldad wa.
11 Ngol teꞌal wa leꞌa Jesús mlundoꞌ ndoꞌ Pabl, ndab xa:
—Pabl, lá yuꞌta ladna lu. Lak mbidiꞌizh lu diꞌizh ten naꞌ Jerusalén ndee, li nsabndoꞌ gudiꞌizh lu‑yá gezh Roma.
Bexa judio mbidiꞌizh xteꞌe gut bexa Pabl
12 Leꞌa ngot xeꞌa wa leꞌa ncho bexa judio dubtsa mbidiꞌizh, ndab bexa ndoꞌ be ltsaꞌa xa:
—Nsobwiꞌi Dios leꞌa beuna ni lá gaw, no ni nits lá goo beuna, gastka gor gut beuna Pabl.
13 Leꞌa bexa na li mbidiꞌizh gut Pabl wa masla dub top gaꞌal. 14 Cha ngwaꞌbe bexa ndoꞌ be uleꞌay nibeꞌe no ndoꞌ bexa gox nsak, ndab bexa:
—Leꞌa besa mbidiꞌizh ndoꞌ Dios lá gaw besa gastka gor gut besa Pabl. 15 Nat leꞌa bego no iteata bexa judio nsak, gud bego ndoꞌ xa nibeꞌe ten soldad wa leꞌa bega mas koxnes cuent ten Pabl. Unab bega ndoꞌ xa wa ilenno Pabl sa nzhealbe bega wa geꞌa. Leꞌa besa cha gut Pabl nes nchaꞌa xa sa wa.
16 Ná leꞌa dub xmeꞌed bsan Pabl mbiꞌín xteꞌe mbidiꞌizh bexa wa. Cha ngwaꞌ meꞌed sa ndebe be soldad wa, ngwaꞌyab meꞌed ta wa ndoꞌ Pabl. 17 Leꞌa Pabl cha utezh dub soldad nibeꞌe dub gayoꞌo soldad, cha ndab xa ndoꞌ xa wa:
—Biꞌi ga meꞌed ndee ndoꞌ xa nibeꞌe ga wa, leꞌa meꞌed ndee ndap dub taꞌa gab meꞌed ndoꞌ xa wa.
18 Leꞌa soldad wa cha mbiꞌi meꞌed ndoꞌ xa nibeꞌe wa, ndab xa:
—Leꞌa Pabl xa nkea litgiꞌib utezh naꞌ, unab xa goo naꞌ meꞌed ndee ndoꞌ go. Leꞌa meꞌed ndap dub taꞌa gab meꞌed ndoꞌ ga.
19 Leꞌa xa nibeꞌe wa cha usen yaꞌa meꞌed wa, cha mbiꞌi xa meꞌed dub lad, cha ndab xa:
—¿Xtaꞌan gab lu ndoꞌ naꞌ zha?
20 Leꞌa meꞌed cha ndab:
—Leꞌa bexa judio mbidiꞌizhbe inab ndoꞌ go goꞌo ga Pabl geꞌa sa nzhealbe bexa. Gab bexa ndoꞌ go leꞌa bexa mas nlad koxnes cuent ten Pabl. 21 Parea lá gungea ladna go ta wa, leꞌa masla top gaꞌal bexa wa xgaꞌach nde nes. Leꞌa bexa wa ndab Dios nsobwiꞌi leꞌa bexa lá gaw, no lá goo nits gastka gor gut bexa Pabl. Nat leꞌa bexa list ndebe ná xteꞌetsa gab go.
22 Weꞌe leꞌa xa nibeꞌe wa ndab ndoꞌ meꞌed:
—Nat byaꞌ. Naꞌan ton ndoꞌ ná gudiꞌizh lu ti ndab lu ta wa ndoꞌ naꞌ.
Xa nibeꞌe be soldad mtuꞌub Pabl ndoꞌ Félix
23 Leꞌa xa nibeꞌe be soldad cha utezh top soldad nibeꞌe dub gayoꞌoga be soldad. Cha unibeꞌe xa ndoꞌ itop bexa wa:
—Bin list bega top gayoꞌo soldad xa isea ndats na, no chon gaꞌal ncho tiꞌi bexa isob tsoꞌo way, no top gayoꞌo xa goꞌo be lanza. Leꞌa gal gor nkea ugeꞌa gor teꞌal, cha yaꞌbe bego gezh Cesarea. 24 No bsaxkwaꞌa bega dub way isob Pabl tsoꞌo na. No blaꞌach bega Pabl, biꞌi bega xa gast Cesarea ndoꞌ Félix xa nibeꞌe, ndontsa naꞌan xtaꞌan yasea xa.
25 Cha no dub git msaꞌa xa ndoꞌ itop be soldad wa. Leꞌa ta wa lndeꞌe ndab:
 
26 “Naꞌ Claudio Lisias nidiꞌizh naꞌ ndoꞌ go, Félix, xa nibeꞌe idub sa ndee. 27 Leꞌa bexa judio usen Pabl ndiꞌizh gut bexa xa. Ná leꞌa gor na mbín naꞌ leꞌa xa xa Roma, cha ngwaa ulat naꞌ xa no be soldad. 28 Leꞌa naꞌ nlad iní naꞌ xá ke na nsake bexa wa xa, ta weꞌe mbí naꞌ xa ndoꞌ bexa nibeꞌe ten bexa wa. 29 Cha uní naꞌ leꞌa‑yá ke tentsa ta nibeꞌe ley ten bexa judio wa. Leꞌa Pabl ni dub ke ta nibeꞌe gat xa ni ta nibeꞌe ikea xa litgiꞌib lá ndap xa. 30 Ná leꞌa naꞌ mbín leꞌa bexa judio mbidiꞌizhlabe xteꞌe gut bexa xa, ta weꞌe mtuꞌub naꞌ xa ndoꞌ go. No ndáp naꞌ ndoꞌ bexa nsake xa, yaꞌyab bexa ndoꞌ go ná xtaꞌan mbin xa.”
 
31 Leꞌa be soldad wa cha mbin lak ndab xa nibeꞌe wa, ngol gor teꞌal wa mbiꞌi bexa Pabl gast gezh Antípatris. 32 Leꞌa gor ngot xeꞌa wa, leꞌa be soldad nchaꞌbe ndats na wa myachbe leꞌaka Jerusalén sa ndebe bexa wa. Leꞌa bexa ndiꞌib tsoꞌo way wa nchaꞌano Pabl gezh Cesarea. 33 Leꞌa gor na ulayaꞌ bexa Cesarea, cha msaꞌa bexa git wa ndoꞌ Félix, no myun bexa cuent Pabl. 34 Weꞌe cha mbiꞌil Félix git wa, cha unabdiꞌizh xa ndoꞌ Pabl ná pa nak lazh Pabl. Ndab Pabl leꞌa xa xa Cilicia. Leꞌa gor na mbiꞌín Félix ta wa, 35 cha ndab xa ndoꞌ Pabl:
—Leꞌa naꞌ sonka ta gab lu gor ilen bexa nsake lu wa.
Cha ndab xa ndoꞌ be soldad ukeꞌa bexa Pabl len litgiꞌib, sa ngok lid Herodes xa unibeꞌe mas polta wa.