Git mtuꞌub Pabl ndoꞌ bexa gezh Colosas
Leꞌa Pabl mkeꞌa git ndee ndoꞌ bexa gezh Colosas zha na nkeanyaw xa nit len gezh Roma. Leꞌa ncho be xmen Cristo gezh Colosas usaxan ndankea be angel, no ncho bexa ndab leꞌa ncho sian be ley nsabndoꞌ yankea be men. Ná leꞌa Pabl nlad yakbeꞌena bexa xteꞌe siꞌil nak Cristo no xteꞌe uzheꞌeb wen nak gealnaban kub nsaꞌa Cristo. Leꞌa be ta ndee pla be ta mas nsak mkeꞌa Pabl: leꞌa Cristo leꞌa nibeꞌe ndoꞌ itea be xmen xa; no ncho Cristo len ladoꞌo iteanak bexa ngeꞌ ladna xa, guniꞌi ton bexa; no leꞌa cuent ten Dios leꞌa iteanak bexa na nak xmen Cristo ni dub ke lá ndap. Leꞌa Pabl mtenxeꞌa bexa wa utsin gak bexa, ta uluu leꞌa bexa dubtsa nak no Cristo.
1
Pabl nidiꞌizh ndoꞌ bexa gezh Colosas
1 Leꞌa naꞌ ndee Pabl, xa mtuꞌub Dios gun naꞌ tiꞌin ten Jesucristo. Leꞌa naꞌ no Timoteo xa no nak xmen Cristo, 2 nkeꞌa besa git ndee ndoꞌ bego nak xmen Dios ndencho gezh Colosas baꞌ, bego na no ndangea ladna Cristo. Nab besa ndoꞌ Tad Dios nsea ndoꞌ Jesucristo Xwan beuna utsin gak bexa ndoꞌ bega no gun bexa wen yoo ladna bega.
Pabl nsaꞌa xno ndoꞌ Dios
3 Leꞌa itea gor nab besa ndoꞌ Dios gakno bega, leꞌa besa no nsaꞌa xno ndoꞌ Dios Xus Jesucristo Xwan beuna, 4 ta na mbiꞌín besa xteꞌe ngeꞌ ladna bega Cristo Jesús nsea xteꞌe nkweaꞌ ladna bega itea bexa nak xmen Dios. 5 Li nak bega geal leꞌa bega ndenkeaꞌ ikaꞌa ta usaꞌa Dios ta ndap xa gibeꞌa, ta na li mbiꞌín bega ndab diꞌizh gealngea ten Cristo. 6 Leꞌa diꞌizh wa ulanseala ndoꞌ bega lak mteꞌachso‑yá idub ndoꞌ gizhliyo. No kwaꞌad bexa nsayungea ladna‑yá no mas ndun bexa ta nsak ladna Dios. No liga bega mas nsayák ndoꞌ lak zha ned mbiꞌín bega ná xteꞌe nkweaꞌ ladna Dios bega, no mgondoꞌ bega leꞌa ta wa gealngea. 7 Leꞌa diꞌizh wa ta mluu Epafras ndoꞌ bega. Leꞌa xa wa dub amig ten besa xa ndunno besa tiꞌin, no wen ndun xa tiꞌin ten Cristo lat bega. 8 No mbidiꞌizh xa ndoꞌ besa xteꞌe nsaꞌa Espíritu ten Dios ta nkweaꞌ ladna bega be ltsaꞌa bega.
Pabl unab ndoꞌ Dios gakno bexa Colosas
9 Ta weꞌe gast wizh mbiꞌín besa ta wa no gast nat, nab tseꞌe besa ndoꞌ Dios gakno bega. No nab besa ndoꞌ Dios leꞌa Espíritu ten Dios uxaꞌal gek bega, ndontsa mas igondoꞌ bega xtaꞌan nlad Dios gun bega no mas yakbeꞌena bega‑yá. 10 Weꞌe gak bega lak nsabndoꞌ gak dub xmen Cristo, gun bega be ta nsak ladna xa, no utsin gak bega ndoꞌ be men, no mas yakbeꞌena bega ná xteꞌe nak Dios. 11 No nab besa ndoꞌ Dios leꞌa juers siꞌil ten Dios gun juert gak ladoꞌo bega, ndontsa uxik bega ndoꞌ itea be taꞌa, ni lá izhanna bega no ni lá gach ladna bega. 12 Ndi iten ladna bega usaꞌa bega xno ndoꞌ Dios Xus beuna, xa na mcheꞌa ladoꞌo beuna ndontsa syoꞌo gan ikaꞌa beuna ta wen usaꞌa xa ndoꞌ be xmen xa, bexa nde ndoꞌ xeꞌa ten xa. 13 Leꞌa Dios uloꞌo beuna ndoꞌ sa ukaw, cha mbiꞌi xa beuna sa nibeꞌe Xin xa, xa ndon leꞌa nkweaꞌ ladna xa. 14 Leꞌa xa wa utix be ke ten beuna no ten ten xa, cha mtsuꞌu xa be ke ten beuna.
Cristo ndon ned ncho ndoꞌ iteanak be taꞌa
15 Leꞌa Cristo dubtsa nak no Dios,
xa na lá yoo gan iniꞌí beuna.
Leꞌa zha na mtexan Dios iteanak be taꞌa,
leꞌa Xin Dios yá nchoka, no leꞌa xa nibeꞌe itea be taꞌa.
16 Leꞌa xa wa leꞌa mtexan iteanak be taꞌa,
be ta ncho gibeꞌa no be ta ncho ndoꞌ gizhliyo,
be ta naꞌ beuna no be ta lá yoo gan inaꞌ beuna,
be angel no iteata be espíritu nibeꞌe.
Leꞌa itea be ta ncho wa leꞌa Xin Dios leꞌa mtexan‑a,
cha leꞌa xa nibeꞌe ta wa.
17 Leꞌa xa wa ndon ned ncho ndoꞌ iteanak be taꞌa,
no juers ten xa itea be taꞌa ndaktiꞌin.
18 No nibeꞌe xa ndoꞌ iteanak beuna nak xmen xa,
lak nibeꞌe gek dub men idub las xa.
Leꞌa xa ndon leꞌa ned ncho ndoꞌ itea be taꞌa,
no ndon ned xa mban ndoꞌ gealgut.
Ta weꞌe leꞌa xa leꞌa nak xa nibeꞌe itea be taꞌa.
19 Ta weꞌe leꞌa Dios msak ladna
leꞌa Xin Dios nak idub lak nak Dios.
20 No mbinbeꞌe Dios leꞌa juers ten Xin xa leꞌa itea be taꞌa yakchaꞌaw,
be ta ncho ndoꞌ gizhliyo no be ta ncho gibeꞌa.
Leꞌa Xin Dios wa ngut ndoꞌ cruz mtsiꞌi xa ten ten xa,
ndontsa wen yaꞌan be men ndoꞌ Dios.
21 Leꞌa polta leꞌa bega lá nchandoꞌ Dios, no lá ndun bega ta nsak ladna Dios, leꞌa ta ndanbeꞌe bega no ta ndun bega ta ugap nak. Parea nat leꞌa Dios mbin wen myaꞌan bega ndoꞌ xa, 22 juers ten ta mbin Cristo. Leꞌa xa wa myak men no ngut xa, ndontsa gal zha usoꞌ xa bega ndoꞌ Dios leꞌa bega umbiꞌi gak, no ni dub ke lá gap bega. 23 Li gunno xa bega tal leꞌa bega ta ugeaka ngeꞌ ladna Cristo, no ndenkeaꞌ bega ikaꞌa bega ta usaꞌa Dios lak ndab diꞌizh wen ten Dios ta mbiꞌín bega wa. Leꞌa diꞌizh wa ngenka idub ndoꞌ gizhliyo, ta na li no naꞌ ndadiꞌizh wa.
Tiꞌin mbin Pabl lat bexa naꞌanpa xa judio
24 Nat leꞌa naꞌ nten ladna ntiꞌid naꞌ be gealkweaꞌ ndee ndontsa gakno naꞌ bega. Leꞌa be gealkweaꞌ wa ta nsabndoꞌka itiꞌid naꞌ lak utid Cristo gealkweaꞌ ndontsa ngokno xa be xmen xa. 25 Leꞌa Dios msoꞌ naꞌ gun naꞌ tiꞌin ten xa lat be xmen xa wa, mtuꞌub xa naꞌ gudiꞌizh naꞌ idub diꞌizh ten xa ndoꞌ bega. 26 Leꞌa ta ndadiꞌizh naꞌ wa leꞌa polta leꞌa‑yá ugaꞌach nak, parea leꞌa nat leꞌa Dios mluu‑yá ndoꞌ bexa nak xmen xa, 27 ndontsa leꞌa bexa naꞌanpa xa judio iniꞌí xteꞌe siꞌil no wen nak ta ugaꞌach wa. Leꞌa ta wa Cristo xa ncho len ladoꞌo bega nat, ta weꞌe ngeꞌ ladna bega yaꞌ bega wats Dios gibeꞌa.
28 Leꞌa besa ndadiꞌizh diꞌizh ten Cristo ndoꞌ be men, ntenxeꞌa besa bexa, no nluu besa bexa iteanak be ta ndák besa, ndontsa gak bexa idub lakka nlad Cristo Jesús. 29 Ta weꞌe uzhebpa ngoꞌo naꞌ gan ndun naꞌ tiꞌin ten Cristo, lak nsaꞌa xa juers ndoꞌ naꞌ.