3
Jesús mas nsak ndoꞌ Moisés
1 Bego nak beuna xmen Dios, bexa mtsambiꞌi Dios ladoꞌo na, leꞌa Dios leꞌa mti bega gak bega xmen xa. Ta weꞌe nat binbeꞌe bega xteꞌe nak Cristo Jesús. Leꞌa xa leꞌaka Dios mtuꞌub, no nak xa uleꞌay ndon leꞌa nsak cuent ten ta nchankea beuna Dios. 2 Leꞌa Dios leꞌa ulaxoꞌob Jesús gak xa ta wa. Leꞌa Jesús cha uzheꞌeb utsin mbin tiꞌin wa, lak utsin mbin Moisés tiꞌin ten Dios lat bexa nak xmen Dios. 3 Ná leꞌa Jesús mas nsak ndoꞌ Moisés, lak dub xa mbindeꞌe dub niꞌi mas nsak ndoꞌ niꞌi wa. 4 Leꞌa itea be niꞌi menka ndandeꞌe, parea leꞌa Dios leꞌa ndandeꞌe iteanak be ta ncho. 5 Leꞌa Moisés ngokno be xmen Dios, utsin mbin xa tiꞌin ten Dios cuent dub mos. Mbidiꞌizh xa be diꞌizh na ndiꞌizh gab Dios ndoꞌ bexa wa. 6 Ná leꞌa Cristo leꞌa nak Xin Dios, utsin ndakno xa be xmen Dios. Leꞌa beuna no nak xmen Dios, tal leꞌa beuna lá ulaꞌa ta ngeꞌ ladna beuna Dios, no ta ndenkeaꞌ beuna ta usaꞌa Dios ndoꞌ beuna.
Sa uneꞌe be xmen Dios wats Dios
7 Lak nkeaniꞌi diꞌizh ten Dios, ndab Espíritu ten Dios ndoꞌ be men:
Tal leꞌa bego goꞌón ta ndab Dios wizh nat,
8 lá gun ngud bega ladoꞌo bega,
lak mbin bexa zha utencho bexa geꞌe sa bid,
mbin bexa preb Dios ná xteꞌe gunno Dios bexa.
9 Ta weꞌe ndab Dios:
“Leꞌa sa wa leꞌa be usan gox ten bega mbin preb naꞌ,
maska dub top gaꞌal liꞌin uniꞌí bexa be ta wen mbinno naꞌ bexa.
10 Ta weꞌe ngokloo naꞌ ndoꞌ bexa ncho zha wa,
ndáp naꞌ uzhebpa ndun bexa ta ugap,
no naꞌanpa nxobgek bexa ndoꞌ naꞌ.
11 Ta weꞌe ngokloo naꞌ ndoꞌ bexa wa,
ndáp naꞌ leꞌa bexa ni dub mod
lá yoo gan yate sa ndiꞌizh uneꞌe bexa wats naꞌ.”
12 Bego nak beuna xmen Cristo, blaꞌach bega naꞌanpa yoo dub ta ugap len ladoꞌo bega, cha ulaꞌa bega ta ndangea ladna bega Dios, no isasit bega wats Dios nban. 13 Ndi btenxeꞌa bega be ltsaꞌa bega itea wizh, nattsa bi nchasea wizh nat. Weꞌe naꞌanpa ukedino maxuꞌu ni dub bega gun bega ta ugap, cha yak ngud ladoꞌo bega. 14 Leꞌa beuna dubtsa nak no Cristo, tal leꞌa beuna idub tiemp igeꞌ ladna xa, lak mgeꞌ ladna beuna xa zha ned wa. 15 Lak nkeaniꞌi diꞌizh ten Dios, ndab‑a:
Tal leꞌa bega goꞌón ta ndab Dios wizh nat,
lá gun ngud bega ladoꞌo bega, lak zha mbin bexa Israel preb Dios.
16 ¿Ton bexa na li mbiꞌín ta ndab Dios wa zha, ná cha mbin bexa preb xa wa? Leꞌa ta wa bexa Israel, bexa uloꞌo Moisés nacion Egipto. 17 ¿No ton ndoꞌ ná ngokloo Dios dub top gaꞌal liꞌin zha? Leꞌa ta wa ndoꞌ bexa na li ugap mbin, cha ngut bexa geꞌe sa bid wa. 18 ¿No ton ndoꞌ ná ndab Dios ni dub mod lá yoo gan yate bexa sa ndiꞌizh uneꞌe bexa wats Dios zha? Leꞌa ta wa ndoꞌ bexa na li lá uxobgek ndoꞌ Dios. 19 Leꞌa beuna uniꞌíka leꞌa bexa wa lá yoo gan yate sa wa, ta na lá ngungea ladna bexa ta ndab Dios wa.