1 Ngol schon wizh leꞌa gezh Caná ten distrit Galilea uchilyaꞌa dub men. Leꞌa Marí xnaꞌa Jesús no nsoꞌ sa wa. 2 No uyoꞌo kombid ndoꞌ Jesús nsea be xmen xa. 3 Ngol gor leꞌa vin ubid, leꞌa xnaꞌa Jesús cha ndab ndoꞌ Jesús:

—Leꞌa bexa yá lá ndapta vin.

4 Leꞌa Jesús cha ukaꞌab ndab:

—Naa, ¿xtaꞌan ngi li ndab go zha? Leꞌa naꞌ biseata gal wizh ulu naꞌ ton nak naꞌ.

5 Parea leꞌa xnaꞌa Jesús cha ndab ndoꞌ bexa ndun tiꞌin sa wa:

—Bin bega lak gab xa ndee.

6 Leꞌa sa wa ndebe dub xoꞌop gets ubiꞌi nakchaꞌaw sbeꞌen geꞌ ta nyoꞌo nits len na. Leꞌa nits nyoꞌo len ta wa ta naꞌa bexa, ndontsa umbiꞌi gak bexa ndoꞌ Dios lak nibeꞌe costumbr ten bexa judio. Leꞌa len kadga dub gets wa nyoꞌo pa dub gayoꞌo litr nits. 7 Leꞌa Jesús cha ndab ndoꞌ bexa ndun tiꞌin wa:

—Bchea bega be gets ndee yoo nits‑a.

Leꞌa bexa cha mchea be ta wa. 8 Weꞌe leꞌa Jesús cha ndabgal ndoꞌ bexa:

—Nat uloꞌo bega dub tuzh‑a, cha biꞌi bega‑yá ndoꞌ xa nchansu gast baꞌ.

Cha mbiꞌi bexa‑yá. 9 Leꞌa bexa wa uniꞌí pa utoꞌo‑yá, parea leꞌa xa nchansu gast wa gor na mbin xa preb nits myak vin wa, leꞌa xa lá iniꞌí pa utoꞌo‑yá. Cha utezh xa xabgiꞌi mchilyaꞌa wa, 10 cha ndab xa:

—Leꞌa itea ndoꞌ be gast leꞌa be men ned vin wen nsaꞌa. Weꞌe leꞌa gor na yá ngula be men kwaꞌal‑a, weꞌe cha nsaꞌa xa vin mas ndidotsa wen. Parea leꞌa go gast gor nat nsaꞌa vin ndon leꞌa wen.

11 Leꞌa ta na li mbin Jesús gezh Caná ten Galilea wa, leꞌa ta wa uyon ned mbin Jesús. Leꞌa ta wa mluu ta juert nak Jesús, ta weꞌe leꞌa be xmen xa mgeꞌ ladna xa.

12 Tsoꞌo wa cha mlayoꞌo Jesús gezh Capernaum, no xnaꞌa Jesús no be wit xa no be xmen xa. Cha uyoꞌo bexa gezh wa pla wizh.

13 Leꞌa ngol zha yá nsayal gax ujest Pascua, ta ndun bexa judio, leꞌa Jesús no utoꞌo nchaꞌa gezh Jerusalén. 14 Leꞌa ngol sa wa cha uniꞌí Jesús leꞌa tale ten niꞌi ten Dios ndeudoꞌo bexa ngon, no borreg, no palom. No ndebe be men ntil med. 15 Cha usen Jesús dub doꞌo, mbintiꞌin xa‑yá ulantuꞌub xa be borreg no be ngon no bexa na li ndiꞌibudoꞌo bema wats niꞌi ten Dios wa. Cha mtixte xa be mes ten bexa ntil med, mteꞌachso xa be med ten bexa wa. 16 Cha ndab xa ndoꞌ bexa ndiꞌibudoꞌo palom wa:

—¡Ulate bega be ta baꞌ sa ndee! ¡Lá gunno bega lid Xus naꞌ cuent dub ndoꞌ xgeꞌe!

17 Leꞌa gor weꞌe leꞌa be xmen Jesús cha mtseꞌa ladna lak nkeaniꞌi diꞌizh ten Dios, ndab‑a: “Uzhebpa ulach naꞌ lid go Dios.”

18 Leꞌa bexa nibeꞌe ten bexa judio cha ndabbe ndoꞌ Jesús:

—¿Xtaꞌan ngi lbaꞌa ndun lu? ¿Xtaꞌan dub taꞌa gun lu uluu leꞌa Dios nlad mbin lu ta baꞌ?

19 Leꞌa Jesús cha ukaꞌab ndab:

—Blate bega niꞌi ten Dios ndee, leꞌa naꞌ wizh yontsa ixiste‑yá stub biaj.

20 Leꞌa bexa cha ndabbe:

—Leꞌa niꞌi ten Dios ndee ngokndeꞌe dub top gaꞌal ncho xoꞌop liꞌin. ¿Ná ndab lu zha chontsa wizh ixistegal lu‑yá?

21 Ná leꞌa Jesús ndab ta wa cuent ten leꞌaka xa. 22 Ta weꞌe leꞌa zha na mas tsoꞌo wa mban Jesús ndoꞌ gealgut, leꞌa be xmen xa cha mtseꞌa ladna ta li ndab xa wa. Cha mas mbingea ladna bexa lak nkeaniꞌi diꞌizh ten Dios cuent ten Jesús, no ta li ndab Jesús cuent ten leꞌaka xa.

23 Leꞌa zha li ncho Jesús Jerusalén ujest Pascua wa, leꞌa kwaꞌad men mbingea ladna Jesús ta na uniꞌí bexa be uyon mbin Jesús. 24 Ná leꞌa Jesús lá ngungea ladna ta wa, leꞌa Jesús nchandoꞌ xteꞌe ndanbeꞌe bexa. 25 No lá nkiꞌin ton gab ndoꞌ Jesús xteꞌe nak be men, leꞌa Jesús nchandoꞌla ladoꞌo be men.