1 Ngol tsoꞌo wa leꞌa Jesús nsea be xmen na ukea ndoꞌ dub barco, cha utakea bexa stub toꞌo lagun Galilea, no nsaleaꞌ sa wa Tiberias 2 Leꞌa kwaꞌad be men usankea tsoꞌo Jesús, geal leꞌa bexa uniꞌí be uyon mbin Jesús myunyakna xa be men gizh. 3 Weꞌe leꞌa Jesús cha ukea dub bet, cha usob xa no be xmen xa. 4 Leꞌa zha wa nsayal gax ujest Pascua, dub ujest ten bexa judio. 5 Leꞌa Jesús cha uniꞌí leꞌa be men kwaꞌad no nseabe wats xa. Cha ndab Jesús ndoꞌ Julip:

—¿Pa isiꞌi beuna ta gaw itea be men baꞌ zha?

6 Leꞌa Jesús li ndab ndontsa iniꞌí xa ná xteꞌe gab Julip, leꞌa Jesús uniꞌíla xtaꞌan gun Jesús. 7 Leꞌa Julip cha ndab:

—Top gayoꞌo med denario lá gal isiꞌi beuna dub tuzhga pan gaw bexa kwaꞌad baꞌ.

8 Leꞌa stub xmen Jesús, xa nsaleaꞌ Ndres wit Simón Pedr, cha ndab ndoꞌ Jesús:

9 —Leꞌa sa ndee nsoꞌ dub meꞌed bgiꞌi nsoꞌno gaꞌay pan cebad no top mbeal. Parea ¿xtiꞌin dub litsa taꞌa wa ndoꞌ dub lbaꞌata men kwaꞌad baꞌ zha?

10 Weꞌe leꞌa Jesús cha ndab ndoꞌ be xmen na:

—Gud bego ndoꞌ be men baꞌ isob bexa.

Leꞌa sa wa nchopa gixgi, cha ute be men ndoꞌ‑yá. Leꞌa lat itea bexa wa ncho pa gaꞌay mil xabgiꞌi. 11 Leꞌa Jesús cha usen be pan wa, cha msaꞌa xa xno ndoꞌ Dios. Cha msaꞌa xa‑yá ndoꞌ be xmen xa utseꞌa bexa‑yá ndoꞌ be men ndebe sa wa. No liga mbinno xa be mbeal wa. Leꞌa be men cha udaw‑a gast plo nlad bexa. 12 Leꞌa gor na yá mzhea bexa, cha ndab Jesús ndoꞌ be xmen na:

—Bteleꞌe bega be ná myaꞌan sobr baꞌ, ndontsa naꞌanpa gazhaꞌa‑yá.

13 Leꞌa bexa wa cha mteleꞌe dub tibtop zhum byux be ná myaꞌan sobr ndoꞌ gaꞌay pan cebad wa. 14 Leꞌa gor na uniꞌí be men uyon li mbin Jesús wa, leꞌa bexa cha ndabbe:

—Leꞌa xa ndee ta ugeaka leꞌa nak profet na li ndiꞌizh ga giꞌidka ndoꞌ gizhliyo.

15 Leꞌa Jesús cha mgenna leꞌa be men wa nlad goꞌo Jesús, gunno bexa Jesús dub rey. Ta weꞌe cha mkaꞌan Jesús sa wa, cha nabtsa xa ukeagal bet wa.

16 Leꞌa ngol gor uzhe leꞌa be xmen Jesús cha mlayoꞌo toꞌo nits wa. 17 Cha ukea bexa ndoꞌ barco, cha nchaꞌbe bexa lad gezh Capernaum. Leꞌa ta wa teꞌal‑la, ná leꞌa Jesús bi naꞌan ilaꞌnchaꞌ wats bexa. 18 Leꞌa mbi cha usaxan uzhebpa ulen ndoꞌ nits wa, cha uzhebpa nwiꞌinla nits wa. 19 Leꞌa gor na yá nchabeseala bexa pa dub gaꞌay natal xoꞌop kilómetro ndoꞌ nits wa, weꞌe uniꞌí bexa Jesús nsea gax wats barco, nchaꞌseandats xa ndoꞌ nits. Cha mzheb bexa. 20 Parea leꞌa Jesús cha ndab ndoꞌ bexa:

—¡Lá izheb bego! ¡Leꞌa ta ndee naꞌ!

21 Cha mten ladna bexa ukea Jesús ndoꞌ barco. Zha leꞌa barco wa cha ulayaꞌ ndoꞌ yo toꞌo nits, sa na ndiꞌizh nchaꞌbeka bexa.

22 Leꞌa ngol stubtsa wizh leꞌa be men ndebe toꞌo nits sa utoꞌo be xmen Jesús wa mtseꞌa ladna leꞌa be xmen Jesús ukea ndoꞌ stubkama barco nde sa wa, ná leꞌa Jesús naꞌanpa no nchaꞌano bexa. 23 Weꞌe leꞌa stapla barco utoꞌo gezh Tiberias cha mlanseaꞌ sa ndebe be men wa. Leꞌa sa wa gax sa na msaꞌa Jesús xno ndoꞌ Dios cuent ten pan na li udaw bexa wa. 24 Leꞌa gor na uniꞌí be men leꞌa Jesús no be xmen xa naꞌanpa nde sa wa, weꞌe cha ukea bexa ndoꞌ be barco wa, nchaꞌkwaꞌan bexa Jesús gezh Capernaum.

25 Leꞌa gor na mzheal bexa Jesús sa wa cha ndab bexa ndoꞌ Jesús:

—Mech, ¿xá gor ulansea ga sa ndee zha?

26 Leꞌa Jesús cha ndab ndoꞌ bexa:

—Leꞌa naꞌ gáp leꞌa bego nseabekwaꞌan naꞌ ta na mzheatsa bega udaw bega pan wa, naꞌanpa ta na nyakbeꞌena bega be uyon ndun naꞌ wa. 27 Lá ukwaꞌan bega ta gaw bega be ta nitndoꞌ. Ndi bkwaꞌan bega ta naꞌanpa initndoꞌ, ta usaꞌa gealnaban nunk lá idub. Leꞌa naꞌ, Xa Myak Men Ndoꞌ Gizhliyo, usa ta wa ndoꞌ bega, lak msaꞌa Tad Dios gun naꞌ.

28 Weꞌe leꞌa bexa cha unabdiꞌizh ndoꞌ Jesús, ndab bexa:

—¿Xtaꞌan ta nlad Dios gun besa zha?

29 Leꞌa Jesús cha ukaꞌab ndab:

—Leꞌa ta ndee ta nlad Dios: gungea ladna bega naꞌ, xa mtuꞌub Dios.

30 Weꞌe cha ndabgal bexa ndoꞌ Jesús:

—Tal leꞌa go nlad gungea ladna besa ga, ¿xtaꞌan dub ta gun ga nat ndontsa gungea ladna besa ga? 31 Leꞌa be usan gox polta ten beuna udaw maná utoꞌo gibeꞌa geꞌe sa bid wa, lak nkeaniꞌi diꞌizh ten Dios, ndab‑a: “Leꞌa Moisés msaꞌa pan utoꞌo gibeꞌa udaw bexa.”

32 Leꞌa Jesús cha ndab:

—Leꞌa naꞌ gáp ndoꞌ bego leꞌa Moisés naꞌanpa leꞌa usaꞌa pan utoꞌo gibeꞌa wa. Leꞌa Xus naꞌ leꞌa nsaꞌa ta na ta ugeaka leꞌa nak pan ntoꞌo gibeꞌa. 33 Leꞌa pan na nsaꞌa Dios wa, leꞌa ta wa ta utoꞌo gibeꞌa, ta nsaꞌa gealnaban ndoꞌ be men nde ndoꞌ gizhliyo.

34 Leꞌa bexa cha ndab:

—Señor, sbeꞌen pan weꞌe bsaꞌa go gaw besa.

35 Leꞌa Jesús cha ndab:

—Leꞌa naꞌ nak pan nsaꞌa gealnaban. Leꞌa tal ton giꞌid wats naꞌ leꞌa xa wa naꞌantapa ganna. No tal ton gungea ladna naꞌ, leꞌa xa wa naꞌantapa gak ladna. 36 Parea lak ndápka naꞌ ndoꞌ bega, leꞌa bega uniꞌíka be ta ndun naꞌ, ná lá ndangea ladna bega naꞌ. 37 Leꞌa itea bexa na nsaꞌa Xus naꞌ ndoꞌ naꞌ, bexa weꞌe ndiꞌid wats naꞌ no nunk naꞌ lá uxelad bexa. 38 Leꞌa naꞌ ndee utoꞌo gibeꞌa, naꞌanpa ndal naꞌ gun naꞌ be ta nladtsa naꞌ. Leꞌa naꞌ ndi ndal ndontsa gun naꞌ be ta nlad Dios xa mtuꞌub naꞌ. 39 Leꞌa Xus naꞌ xa mtuꞌub naꞌ wa lá nlad gak perdid ni dub bexa nsaꞌa xa ndoꞌ naꞌ. Leꞌa xa ndi nlad ixiste naꞌ itea bexa wa ndoꞌ gealgut gal wizh lult. 40 Leꞌa Dios nlad leꞌa itea bexa na ngondoꞌ leꞌa naꞌ nak Xin Dios no ndangea ladna bexa naꞌ, leꞌa bexa wa cha gap gealnaban nunk lá idub. No ixiste naꞌ bexa wa ndoꞌ gealgut gal wizh lult.

41 Weꞌe leꞌa ncho bexa judio cha usaxan nisi Jesús geal ndab Jesús leꞌa Jesús leꞌa nak pan utoꞌo gibeꞌa. 42 Ndab bexa ndoꞌ ltsaꞌa bexa:

—¿Naꞌanpa xa baꞌ Jesús xin Kosé wa zha? Leꞌa beuna nchandoꞌ xus xa no xnaꞌa xa. ¿Ná xteꞌema gab xa zha leꞌa xa xa ulen gibeꞌa?

43 Leꞌa Jesús cha ndab ndoꞌ bexa:

—Blaꞌa bega ta lbaꞌa nisi bega naꞌ. 44 Naꞌan ton yoo gan giꞌid wats naꞌ, tal leꞌa Xus naꞌ xa mtuꞌub naꞌ lid leꞌa goꞌo xa wats naꞌ. Leꞌa naꞌ ixiste bexa wa ndoꞌ gealgut gal wizh lult. 45 Lak mkeꞌa bexa mbidiꞌizh sakndoꞌ Dios: “Leꞌa Dios uluu itea be men.” Ta weꞌe leꞌa tal ton goꞌón ta ndab Xus naꞌ, cha gun xa ta wa, leꞌa xa wa giꞌid wats naꞌ.

46 ’Parea naꞌan ton gol niꞌí Dios Xus naꞌ. Leꞌa dubtsa xa uniꞌíla xa, leꞌa ta wa naꞌ xa utoꞌoka wats Dios. 47 Leꞌa naꞌ gáp ndoꞌ bego leꞌa tal ton gungea ladna naꞌ, leꞌa xa wa gap gealnaban ta nunk lá idub. 48 Leꞌa naꞌ leꞌa nak pan nsaꞌa gealnaban. 49 Leꞌa zha uyoꞌo be usan gox polta ten bega geꞌe sa bid, leꞌa bexa udaw maná, parea tsoꞌo wa leꞌa bexa wa ngutkabe. 50 Ná leꞌa pan nlenka gibeꞌa, leꞌa tal ton gaw pan wa leꞌa xa wa lá gat. 51 Leꞌa naꞌ ndee leꞌa nak pan nban ulen gibeꞌa. Leꞌa tal ton gaw pan ndee, leꞌa xa wa gap gealnaban nunk lá idub. Leꞌa pan usa naꞌ wa beꞌal las naꞌ, ta usa naꞌ ndontsa gap be men gealnaban ndoꞌ Dios.

52 Leꞌa bexa judio wa cha ndakloo, ndab bexa ndoꞌ be ltsaꞌa xa:

—¿Xteꞌe ndab xa usaꞌa xa beꞌal las xa gaw beuna zhaga?

53 Leꞌa Jesús cha ndab:

—Leꞌa naꞌ gáp ndoꞌ bega leꞌa tal leꞌa bega lá gaw beꞌal las naꞌ, Xa Myak Men Ndoꞌ Gizhliyo, no lá goo bega ten ten naꞌ, leꞌa bega lá gap gealnaban ndoꞌ Dios. 54 Leꞌa tal ton gaw beꞌal las naꞌ no goo xa ten ten naꞌ, leꞌa xa wa ndapla gealnaban ta nunk lá idub. No ixiste naꞌ xa wa ndoꞌ gealgut gal wizh lult. 55 Leꞌa beꞌal las naꞌ nak ta nsabndoꞌ gaw men, no ten ten naꞌ nak ta nsabndoꞌ goo men. 56 Leꞌa tal ton gaw beꞌal las naꞌ no goo xa ten ten naꞌ, leꞌa xa wa dubtsa nak no naꞌ idub tiemp. 57 Leꞌa Xus naꞌ xa nban leꞌa mtuꞌub naꞌ, no nban naꞌ juers ten xa. No liga leꞌa tal ton gaw beꞌal las naꞌ, leꞌa xa wa ibanga juers ten naꞌ. 58 Leꞌa pan utoꞌoka gibeꞌa naꞌanpa ltsaꞌa maná udaw be usan gox polta ten bega, leꞌa bexa ngutkabe. Parea leꞌa tal ton gaw pan ndee nban idub tiemp.

59 Leꞌa be ta ndee mbidiꞌizh Jesús len niꞌi sa nzhealbe bexa judio gezh Capernaum.

60 Leꞌa bexa na ndangea ladna Jesús wa gor na mbiꞌín bexa ta li ndab Jesús, leꞌa kwaꞌad bexa cha ndab ndoꞌ be ltsaꞌa na:

—Uzhebpa dub ta ugan ndadiꞌizh xa baꞌ. ¿Tonma gun gan isakyoꞌón‑a?

61 Leꞌa Jesús mgenna leꞌa bexa wa nisi ta ndab xa, cha ndab Jesús ndoꞌ bexa:

—¿Lá nsak ladna bega ta ndáp naꞌ wa zha? 62 ¿Xteꞌema gunbeꞌe bega tal leꞌa bega iniꞌí leꞌa naꞌ, Xa Myak Men Ndoꞌ Gizhliyo, ikea gaꞌap, nsea naꞌ leꞌaka sa utoꞌo naꞌ? 63 Leꞌa Espíritu leꞌa nsaꞌa gealnaban kub, leꞌa leꞌatsa be men lá gun gan gap gealnaban wa. Leꞌa diꞌizh ndáp naꞌ wa diꞌizh ten Espíritu ten Dios xa nsaꞌa gealnaban ndoꞌ be men. 64 Parea leꞌa ncho bego bi lá ndangea ladna ta wa.

Li ndab Jesús geal leꞌa xa zha nedkata uniꞌí ton bexa na naꞌanpa gungea ladna xa, no ton xa na yun cuent xa. 65 Cha no ndab Jesús:

—Ta weꞌe lakka ndáp naꞌ ndoꞌ bego, leꞌa naꞌan ton yoo gan giꞌid wats naꞌ, tal leꞌa Xus naꞌ lid ned usaꞌa gun xa ta wa.

66 Tsoꞌo wa leꞌa kwaꞌad bexa na ndangea ladna Jesús cha mlaꞌa xa, lá ikeseanota bexa xa. 67 Leꞌa Jesús cha unabdiꞌizh ndoꞌ isatibtop be xmen na, ndab xa:

—¿No bego nlad ulaꞌa naꞌ zha?

68 Leꞌa Simón Pedr cha ukaꞌab ndab:

—Señor, ¿tonta ndoꞌ ná yaꞌbe besa zha? Leꞌa go nabtsa ndadiꞌizh diꞌizh nsaꞌa gealnaban nunk lá idub. 69 Leꞌa besa ndangeaka ladna go no uniꞌí besa leꞌa go nak Cristo, Xinka Dios nban.

70 Leꞌa Jesús cha ndab:

—Leꞌa naꞌ leꞌa mti isatibtop bega, parea leꞌa dub bega xmen maxuꞌu.

71 Leꞌa Jesús li ndab cuent ten Judas Iscariot, xin dub xa nsaleaꞌ Simón. Leꞌa Judas no dub isatibtop xmen Jesús, parea tsoꞌo wa leꞌa xa leꞌa yun cuent Jesús.