1 Leꞌa ngol wizh ned ten sman, uzhebpa tempran ndon bi ukaw naꞌ, leꞌa Marí xa Magdala nchaꞌa sa nsob baꞌa mgaꞌach Jesús. Leꞌa gor ulayaꞌ xa uniꞌíla xa leꞌa geꞌ nsoꞌntsaw toꞌo baꞌa wa myoꞌobla. 2 Weꞌe cha utoꞌo xa karrel, ngwaꞌyab xa‑yá ndoꞌ Simón Pedr no ndoꞌ stub xmen Jesús, xa na leꞌa Jesús uzheꞌeb nkweaꞌ ladna. Ndab Marí ndoꞌ bexa wa:

—Leꞌa men mbiwaꞌan Jesús len baꞌa wa. Leꞌa besa lá iniꞌí pa ngwaꞌulaꞌa bexa xa.

3 Leꞌa Pedr no stub xmen Jesús wa cha utoꞌo nchaꞌbe sa nsob baꞌa wa. 4 Leꞌa bexa wa karrel nchaꞌbe, parea leꞌa stub xa wa mas karrel nchaꞌa ndoꞌ Pedr, cha ned xa ulayaꞌ toꞌo baꞌa. 5 Cha mwiꞌiko xa len baꞌa, uniꞌí xa be lad lino myuꞌudyoꞌo Jesús, parea lá yoꞌo xa len wa. 6 Weꞌe cha ulen Simón Pedr, cha uyoꞌo xa len baꞌa wa, cha uniꞌí xa be lad wa. 7 No uniꞌí xa leꞌa lad ubixyoꞌo gek Jesús myuꞌudla, naꞌanpa junt nde‑yá no be lad ubixyoꞌo idub Jesús wa. 8 Weꞌe leꞌa stub xmen Jesús, xa na li ned ulayaꞌ wa, cha no uyoꞌo. Uniꞌí xa be taꞌa wa, cha mbingea ladna xa leꞌa Jesús mbanka. 9 Leꞌa gor weꞌe leꞌa bexa bi lá nyakbeꞌena lak nkeaniꞌi diꞌizh ten Dios, leꞌa Cristo nsabndoꞌka iban ndoꞌ gealgut. 10 Leꞌa itop bexa wa cha nseaꞌbe ta niꞌi ndencho bexa.

11 Leꞌa Marí xa Magdala cha myansoꞌ wats baꞌa wa ndoꞌon xa, cha mwiꞌiko xa len baꞌa wa. 12 Cha uniꞌí xa top angel ten Dios nak be lad nagud. Dub xa nsob sa ngot gek Jesús, leꞌa stub xa nsob sa ute yaꞌaxoꞌo Jesús. 13 Leꞌa be angel wa cha unabdiꞌizh ndoꞌ Marí ndab bexa:

—Xagots, ¿xtaꞌan ndoꞌon lu zha?

Leꞌa Marí cha ndab:

—Leꞌa be men mbiwaꞌan Señor Jesús. Leꞌa naꞌ lá iní pa ngwaꞌulaꞌa bexa xa.

14 Tsoꞌo na li ndab Marí, cha mgeaksoꞌ xa mwiꞌi xa stub lad. Cha uniꞌí xa Jesús nsoꞌ sa wa, ná leꞌa xa lá igondoꞌ ti leꞌa Jesús ta wa. 15 Leꞌa Jesús cha ndab:

—Xagots, ¿xtaꞌan ndoꞌon lu zha? ¿Ton nkwaꞌan lu zha?

Leꞌa Marí mbinbeꞌe leꞌa ta wa xa nlaꞌach lenya wa, cha ndab Marí:

—Señor, tal ga leꞌa mbiꞌi xa, gud go ná pa ngwaꞌulaꞌa ga xa, ndontsa gayoo naꞌ xa.

16 Leꞌa Jesús cha ndab:

—¡Marí!

Leꞌa xa cha mgeaksoꞌ mwiꞌi ndoꞌ Jesús, cha ndab xa:

—¡Raboni! —leꞌa ta wa dub diꞌizh hebreo gab‑a Mech.

17 Leꞌa Jesús cha ndab:

—Lá ugal lu naꞌ, leꞌa naꞌ biseata ikea wats Xus naꞌ. Ndi byaꞌyab ndoꞌ be xmen naꞌ leꞌa naꞌ yaa wats Xus naꞌ xa nak Dios ten naꞌ. Leꞌa ta wa leꞌakaga Xus bega no Dios ten bega.

18 Leꞌa Marí cha nseaꞌyab ndoꞌ be xmen Jesús leꞌa xa uniꞌí Jesús, no mbidiꞌizh xa ta ndab Jesús ndoꞌ xa.

19 Leꞌa ngol gor na ulaꞌ teꞌal bi leꞌa wizh ned ten sman wa, leꞌa be xmen Jesús mzhealbe len dub niꞌi. Leꞌa toꞌo niꞌi wa nsoꞌnyaw, geal leꞌa bexa nzheb ndoꞌ bexa judio nibeꞌe. Weꞌe leꞌa Jesús cha mlundoꞌ nsoꞌ tlaw bexa, cha ndab xa:

—¡Dios gun wen yoo ladna bega!

20 Tsoꞌo na li ndab Jesús, cha mluu xa be yaꞌa xa no wats len xa. Cha uzhebpa mten ladna bexa gor uniꞌí bexa leꞌa ta wa Jesús. 21 Leꞌa Jesús cha ndabgal:

—Dios gun wen yoo ladna bega. Leꞌa lak mtuꞌub Xus naꞌ naꞌ, no liga utuꞌub naꞌ bega gun bega tiꞌin ten naꞌ.

22 Cha mlabi xa sa nde bexa, cha ndab xa:

—Ulaꞌa bega yoo Espíritu ten Dios len ladoꞌo bega. 23 Tal leꞌa bega gungeꞌ ladna ke ten dub men, leꞌa Dios noga sungeꞌ ladna ta wa. No liga tal leꞌa bega lá gungeꞌ ladna ke ten dub men, leꞌa Dios noga naꞌanpa gungeꞌ ladna ta wa.

24 Leꞌa Tomás xa no nsaleaꞌ Dídimo nak dub tibtop xmen Jesús, parea leꞌa xa naꞌanpa no nsoꞌno bexa wa gor na mlundoꞌ Jesús. 25 Leꞌa gor na ulen Tomás leꞌa be xmen Jesús cha ndab ndoꞌ Tomás:

—Leꞌa besa uniꞌí Jesús.

Leꞌa Tomás cha ndab:

—Gast ned iní naꞌ be sa ngwaꞌas clav yaꞌa xa no ukikoꞌo naꞌ ngutsyaꞌa naꞌ sa wa, no ukikoꞌo naꞌ yaꞌa naꞌ wats len xa, lá ndangea lad naꞌ leꞌa xa mban.

26 Ngol sxoꞌon wizh leꞌa bexa ndebegal len niꞌi wa no Tomás. Leꞌa toꞌo niꞌi wa nsoꞌnyaw, parea leꞌa Jesús cha uyatsoꞌ tlaw bexa, cha ndab xa:

—Dios gun wen yoo ladna bega.

27 Cha ndab Jesús ndoꞌ Tomás:

—Bwiꞌi ndoꞌ yaꞌa naꞌ, no ulo ngutsyaꞌa lu sa ndee. No ulo yaꞌa la wats len naꞌ ndee. Yá naꞌantapa gunbeꞌe lu leꞌa naꞌ ngut, ndi bingea ladna leꞌa naꞌ mbangal.

28 Weꞌe leꞌa Tomás cha ukaꞌab ndab:

—¡Go nak xa nibeꞌe naꞌ, no Dios ten naꞌ!

29 Cha ndab Jesús:

—Tomás, geal uniꞌí lu naꞌ, ta weꞌe mbingea ladna lu leꞌa naꞌ mbankagal. Uzhebpa wen yoo ladna bexa gungea ladna naꞌ, maska lá iniꞌí bexa naꞌ.

30 No sianta be uyon mbin Jesús ndoꞌ gaꞌal be xmen xa, ta na naꞌanpa ikea ndoꞌ libr ndee. 31 Parea leꞌa be taꞌa nkea sa ndee, nkea‑yá ndontsa gungea ladna bega leꞌa Jesús leꞌa nak Cristo, Xin Dios. Tal leꞌa bega li gungea ladna ta wa, leꞌa bega gap gealnaban ndoꞌ Dios.