1 Leꞌa gor ulayaꞌ Jesús gezh Jericó, leꞌa xa nseatid len gezh wa. 2 Leꞌa sa wa ncho dub xa rik nsaleaꞌ Zaqueo. Leꞌa xa wa xa nibeꞌe ten bexa nsen med, ta nkix be men ndoꞌ gobier Roma. 3 Leꞌa xa nlad iniꞌí Jesús, parea leꞌa xa lá naꞌ Jesús tant kwaꞌad men nde sa wa, leꞌa xa wa dub xa uxuꞌubma. 4 Cha uxax mned xa ndoꞌ be men wa, cha ukea xa ndoꞌ dub ya sicómoro sa itid Jesús ndontsa iniꞌí xa Jesús. 5 Leꞌa gor ulayaꞌ Jesús sa wa, cha mwiꞌi xa gaꞌap ndoꞌ ya wa, cha ndab xa ndoꞌ xa wa:

—Zaqueo, uxax ulaꞌ sa baꞌ, leꞌa teꞌal ndee leꞌa naꞌ nsabndoꞌ yoꞌo ta lid lu.

6 Leꞌa Zaqueo cha uxax ulaꞌ, nten ladna xa mbiꞌi xa Jesús ta lid xa. 7 Leꞌa gor uniꞌí be men ta wa, itea bexa ndenisi Jesús, ndab bexa leꞌa Jesús uyote len lid dub xa ugap. 8 Ngol gor leꞌa Zaqueo cha usoꞌ ndab ndoꞌ Jesús:

—Bwiꞌi go Señor, leꞌa naꞌ usa itol be taꞌa ndap naꞌ ndoꞌ bexa uban nak. No tal ncho xa mbin waꞌan naꞌ med ten na, leꞌa naꞌ yun cuent med wa gast dap biaj.

9 Leꞌa Jesús cha ndab ndoꞌ Zaqueo:

—Nat leꞌa Dios mtsuꞌu ke ten lu no ke ten bexa ltsaꞌa lu, geal leꞌa lu ngeꞌ ladna Dios lak mgeꞌ ladna Abraham Dios. 10 Leꞌa naꞌ, Xa Myak Men Ndoꞌ Gizhliyo, ndalkwan bexa sit nak wats Dios, ndontsa ko naꞌ bexa ndoꞌ be ke ten bexa.

11 Leꞌa bexa na ndeyoꞌón ta ndadiꞌizh Jesús wa ndanbeꞌe leꞌa tiemp inibeꞌe Dios ndoꞌ gizhliyo yamer ilen. Ta weꞌe leꞌa Jesús cha msaktabeꞌe stub taꞌa, geal leꞌa xa nsoꞌla gax sa nde Jerusalén. 12 Ndab Jesús:

—Uyoꞌo dub xabgiꞌi nsak. Leꞌa xa wa list nsoꞌ yaꞌ stubga nacion sit. Leꞌa sa wa leꞌa dub xa mas nibeꞌe usaꞌa permis gak xa rey leꞌaka lazh xa, leꞌa tsoꞌo wa cha yach xa. 13 Leꞌa gor na biseata itoꞌo xa nsak wa, cha utezh xa dub tiꞌi xmos xa, cha msaꞌa xa dub gaꞌga med nsakpa gunno bexa tiꞌin ndalen li naꞌan xa. 14 Parea leꞌa be men lazh xa wa nxee ladna ndoꞌ xa, cha mtuꞌub bexa dub men gab ndoꞌ xa mas nibeꞌe wa leꞌa bexa lazh xa nsak wa lá nlad leꞌa xa wa gak rey.

15 ’Ná leꞌa xa mas nibeꞌe wa ulaxoꞌobka xa wa gak xa wa rey. Leꞌa gor na mlanseaꞌ xa lazh xa, cha utezh xa be xmos xa, bexa na li msaꞌa xa dub tiꞌi med nsak ndoꞌ na wa, ndontsa iniꞌí xa na xtiꞌin mbinno bexa ta wa. 16 Leꞌa mos ned wa ulen cha ndab: “Señor, leꞌa med li msaꞌa go wa myak dub tiꞌi‑yá.” 17 Leꞌa rey wa cha ndab: “Uzhebpa wen lu mos. Leꞌa ta na li wen mbin lu tiꞌin nsea dub tuzh med ndee wa, ta weꞌe leꞌa nat leꞌa lu inibeꞌe dub tiꞌi gezh.” 18 No liga ulen xa itop wa, cha ndab xa: “Señor, leꞌa dub med li msaꞌa ga wa myak dub gaꞌay‑a.” 19 Leꞌa rey wa cha ndab: “Leꞌa lu no inibeꞌe dub gaꞌay gezh.”

20 ’Cha ulenga xa yon wa ndab: “Señor, ndee med ten go. Leꞌa naꞌ ndee ulochaꞌaw med ndee ndoꞌ dub bleꞌa lad. 21 Leꞌa naꞌ nzheb ndoꞌ go, geal leꞌa naꞌ uní leꞌa go uzhebpa dub xa nibeꞌe. Nsen ga be taꞌa ni lid ta ten ga, no nteleꞌe ga be taꞌa ni lid go ngas.” 22 Leꞌa rey wa cha ndab: “Leꞌa lu dub mos uzheꞌeb ugap. Leꞌa be diꞌizh ndab lu wa nluu leꞌa lu ugap ndun. Tal leꞌa lu uniꞌí leꞌa naꞌ ndee dub xa uzhebpa nibeꞌe, no nsen naꞌ be taꞌa ni lid ta ten naꞌ, no nteleꞌe naꞌ be taꞌa ni lid naꞌ ngas, 23 ¿xtaꞌan lá ngaꞌulaꞌa lu med baꞌ banco, ndontsa nat nseal naꞌ isen naꞌ be xin med wa?” 24 Cha ndab xa ndoꞌ bexa nde sa wa: “Blat bega med nsén xa baꞌ, cha bsaꞌa bega‑yá ndoꞌ xa nsén dub tiꞌi med baꞌ.” 25 Ná leꞌa bexa cha ndab: “Señor, leꞌa xa baꞌ yá ndapla dub tiꞌi‑yá.” 26 Leꞌa rey cha ndab: “Leꞌa naꞌ gáp leꞌa tal ton utsin gun, leꞌa bexa mas sian taꞌa ikaꞌa. Ná leꞌa tal ton naꞌanpa utsin gun, leꞌa bexa slat be ta ndido ndap xa wa. 27 Ná leꞌa bexa na li ndakloo ndoꞌ naꞌ wa, bexa na lá nlad gak naꞌ rey ten bexa, utseano bega bexa sa ndee. Cha ulobtoꞌog bega gen bexa.”

28 Leꞌa gor na mtayadiꞌizh Jesús ta wa, cha nchaꞌata xa Jerusalén. 29 Leꞌa gor na yá nsalayaꞌ gax bexa gezh Betfagé no gezh Betania, no gax Bet Olivo, cha mtuꞌub Jesús top be xmen na, 30 ndab xa ndoꞌ bexa wa:

—Waꞌ bega len gezh nde mas ndoꞌ ndee. Leꞌa gor na yate bega toꞌo gezh baꞌ, leꞌa sa baꞌ iniꞌí bega nsoꞌ nchii dub burr tuzh, dub ma ni dub men gol sob tsoꞌo ma. Cha uxaꞌak bega ma, goꞌo bega ma sa ndee. 31 Leꞌa tal ton gab ndoꞌ bega ná xtaꞌan ngi burr baꞌ nxaꞌak bega, cha gud bega leꞌa Xa Nibeꞌe wa guntiꞌin ma.

32 Weꞌe leꞌa be xmen Jesús wa cha nchaꞌbe. Cha mzheal bexa burr wa lakka ndab Jesús. 33 Leꞌa gor na ndeuxaꞌak bexa ma, leꞌa be xwan ma cha ndab:

—¿Xtaꞌan nxaꞌak bega burr baꞌ zha?

34 Leꞌa bexa cha ukaꞌab ndab:

—Leꞌa Xa Nibeꞌe wa guntiꞌin ma.

35 Cha mbiꞌi bexa ma wats Jesús. Cha mxoꞌob bexa dubga xab bexa tsoꞌo ma. Cha usob Jesús tsoꞌo ma. 36 Leꞌa be men cha mte be lad nbix bexa ndoꞌ nes sa isea ma wa.

37 Leꞌa gor na nchaꞌbelaꞌyoꞌo bexa Bet Olivo, leꞌa bexa kwaꞌad na nseabenkea tsoꞌo Jesús wa mten ladnabe, ugeꞌ ndab bexa leꞌa Dios uzheꞌeb dub Dios siꞌil, geal leꞌa bexa uniꞌí be uyon mbin Jesús. 38 Ugeꞌ ndab bexa:

—¡Dios uzhebpa nlaꞌach xa nibeꞌe baꞌ, xa na mtuꞌub Dios Xa Nibeꞌe! ¡Uzhebpa wen yoo be men ndoꞌ Dios gibeꞌa! ¡Siꞌil nak Dios nsob gaꞌap!

39 Leꞌa lat be men wa no pla bexa fariseo nseabe, cha ndab bexa ndoꞌ Jesús:

—Mech, uteyo ga be xmen ga baꞌ naꞌantapa li gab bexa.

40 Leꞌa Jesús cha ukaꞌab ndab:

—Leꞌa naꞌ gáp leꞌa tal bexa ndee naꞌanpa iníꞌibe, leꞌa be geꞌ baꞌ leꞌa isaxan iníꞌi.

41 Leꞌa gor na ulayaꞌ bexa sa nluxeꞌa Jerusalén, leꞌa Jesús cha mwiꞌi ndoꞌ gezh wa, cha mbiꞌin xa, 42 ndab xa:

—Gezh Jerusalén, uzhebpa nlad naꞌ yakbeꞌena lu ta ncho wizh nat, leꞌa ta wa leꞌa sun gan wen yoo lu. Parea leꞌa nat leꞌa lu lá yoo gan yakbeꞌena‑yá. 43 Gal dub wizh ilen be men ukendoꞌ lu, gundeꞌe bexa dub muro idub gangeak wats lu, no idub gangeak kwe bexa ukendoꞌ bexa lu. 44 Cha ulate bexa lu Jerusalén, no bexa ncho sa baꞌ gatbe. Ni stub geꞌ ten lu lá kwiꞌibta tsoꞌo ltsaꞌa na, ke na lá igondoꞌ lu leꞌa Dios mbiꞌid ndoꞌ lu.

45 Leꞌa Jesús cha nchaꞌa tale ten niꞌi ten Dios, cha usaxan ngontuꞌub xa bexa na nadoꞌotiꞌix be taꞌa sa wa. 46 Ndab Jesús:

—Leꞌa diꞌizh ten Dios nkeaniꞌi ndab Dios: “Leꞌa lid naꞌ nak dub sa ndadiꞌizhno be men naꞌ.” ¡Ná leꞌa bego ndi ndanno‑yá cuent dub geꞌloꞌo ten waꞌan!

47 Leꞌa Jesús itea wizh nluu be men wats niꞌi ten Dios, parea leꞌa be uleꞌay nibeꞌe, no be mech ten ley, no bexa nsak ten gezh wa nkwaꞌan ná xteꞌe gut bexa Jesús. 48 Parea leꞌa bexa ni lá izheal xteꞌe gut bexa xa, geal leꞌa itea be men uzhebpa nlaꞌach ta nluu Jesús.