5
Jesús ulantuꞌub mbi bxin ncho len ladoꞌo dub xa Gadara
(Mt. 8:28-34; Lc. 8:26-39)
Cha ulayaꞌ bexa stub toꞌo lagun wa ndoꞌ yo sa nibeꞌe gezh Gadara. Leꞌa gor ulaꞌ Jesús ndoꞌ barco wa, leꞌa dub xabgiꞌi ncho mbi bxin len ladoꞌo xa utoꞌo lat be geꞌloꞌo sa ngaꞌach be men ngut. Leꞌa xabgiꞌi wa len geꞌloꞌo ten kampeon wa nak lid na. Ni caden lá ndun bexa gan uxi bexa xa wa. Sianla biaj mxi bexa yaꞌa xa nsea caden, no giꞌib nkeꞌanchii bexa xoꞌo xa. Ná xa nkixka caden wa nsea nsuka xa giꞌib wa. Ta weꞌe naꞌan ton ndun gan uxi xa. Teꞌal tezhea nkeseabezhat xa be geꞌe no sa ngaꞌach be men wa. No geꞌ nkeꞌa xa leꞌaka las xa. Gor na bi sitta uniꞌí xa Jesús leꞌa xa wa utoꞌola karrel gast ndoꞌ Jesús msaxib xa. Cha ugeꞌ ndab mbi bxin wa ndoꞌ Jesús:
—¿Xtaꞌan ngi naꞌ nsea ugal lu zha Jesús, Xin Dios siꞌil? ¡Leꞌa Dios nsobwiꞌi leꞌa naꞌ naꞌab naꞌanpa utsaksi lu naꞌ!
Leꞌa mbi bxin wa leꞌa li ndab, geal leꞌa Jesús unibeꞌela ndoꞌ mbi bxin itoꞌo len ladoꞌo xa wa.
Leꞌa Jesús cha unabdiꞌizh ndab:
—¿Xteꞌe nsaleaꞌ lu zha?
Leꞌa mbi bxin wa cha ndab:
—Naꞌ nsaleaꞌ Uzheꞌeb Kwaꞌad Xa, geal leꞌa besa kwaꞌadpa.
10 Weꞌe cha uzhebpa unab mbi bxin wa ndoꞌ Jesús ndab ta wa:
—Lá kontuꞌub lu besa sa ndencho besa ndee.
11 Leꞌa gax geꞌe wa kwaꞌad kuch ndeseayawbe. 12 Leꞌa be mbi bxin wa cha ndab ndoꞌ Jesús:
—Btuꞌub besa yate besa len be kuch baꞌ.
13 Weꞌe leꞌa Jesús cha msaꞌa diꞌizh li gun be mbi bxin. Leꞌa be ta wa cha utoꞌo len ladoꞌo xabgiꞌi wa, cha uyoꞌo be ta wa len be kuch wa. Cha ubix bema gek dub weꞌa gast len nits ulaꞌyoꞌo ma, cha ngut bema. Leꞌa ndoꞌ itea be kuch wa pa top mil ma.
14 Weꞌe leꞌa be men nkeno be kuch wa cha utoꞌo karrel nchaꞌyab‑a ndoꞌ be men ndesea geꞌe nsea be men gezh. Leꞌa kwaꞌad be men cha utoꞌo nchaꞌbewiꞌi ná xtaꞌan uyoꞌo. 15 Leꞌa gor ulayaꞌ bexa wats Jesús, leꞌa bexa cha uniꞌí xa na li utoꞌo mbi bxin len ladoꞌo na wa myaklana nsob wats Jesús, nakla xa xab xa. Cha mzheb bexa. 16 Leꞌa bexa na uniꞌí ta uyoꞌo wa cha mbidiꞌizh ndoꞌ be men wa xteꞌe myakna xa wa, nsea xteꞌe ngut be kuch wa. 17 Leꞌa bexa wa cha unab ndoꞌ Jesús ikaꞌan Jesús ndoꞌ yo ten bexa wa.
18 Leꞌa gor na ukeagal Jesús ndoꞌ barco, leꞌa xa li myakna wa cha unab ndoꞌ Jesús no yaꞌno Jesús. 19 Ná leꞌa Jesús lá kaꞌab goꞌo xa, ndi ndab Jesús ndoꞌ xa:
—Byaꞌ ndoꞌ bexa ta lid lu. Cha bidiꞌizh ná xteꞌe myunyakna Dios lu, no xteꞌe mlats ladna Dios lu.
20 Leꞌa xa wa cha nseaꞌ, cha usaxan ndadiꞌizh xa ndoꞌ bexa idub distrit Decápolis xteꞌe myunyakna Jesús xa. Weꞌe leꞌa itea be men wa ngwanseanabe.
Jesús myunyakna dub xagots, nsea mxiste xa xingots Jairo
(Mt. 9:18-26; Lc. 8:40-56)
21 Leꞌa gor na myach Jesús len barco wa nseaꞌ xa stub toꞌo lagun wa, leꞌa uzhebpa kwaꞌad men ulen wats Jesús. 22 Cha no ulen dub xabgiꞌi nsaleaꞌ Jairo, xa nchansu niꞌi sa nzhealbe bexa judio gezh wa. Leꞌa gor na uniꞌí xa Jesús, cha msaxib xa ndoꞌ Jesús. 23 Cha unab xa ndoꞌ Jesús, ndab xa:
—Leꞌa meꞌed gots ten naꞌ yamer gat. Waꞌ una uxoꞌob ga yaꞌa ga tsoꞌo meꞌed wa, ndontsa yakna meꞌed, lá gat meꞌed.
24 Leꞌa Jesús cha nchaꞌano xa, nsea kwaꞌad be men usankea tsoꞌo bexa gast ngidko bexa Jesús. 25 Leꞌa lat be men wa nchaꞌa dub xagots nsén gealgizh nleꞌa xa ten idub dub tibtopla liꞌin. 26 Leꞌa xa wa uzheꞌeb ukesea ndoꞌ kwaꞌad be doctor, gast mteꞌa xa iteanak med ndap xa. Ná leꞌa xa ni lá yakna, ndi mas kweaꞌ nsak xa. 27 Leꞌa gor na mbiꞌín xa ndadiꞌizh be men xteꞌe ndun Jesús, weꞌe cha ubii xa ndi tsoꞌo Jesús lat be men wa. Cha mgal xa xab Jesús, 28 geal leꞌa xa mbinbeꞌe tal xa ugal masa xab Jesús, leꞌa xa syakkana. 29 Cha bi leꞌa gor wa uleaslaꞌ ten wa, cha mgenna xa leꞌa xa myaklana ndoꞌ gealgizh wa. 30 Weꞌe leꞌa Jesús mgenna utoꞌo dub tuzh juers ten na, cha mgeak Jesús mwiꞌi ndoꞌ be men, ndab xa:
—¿Ton xa mgal xab naꞌ?
31 Leꞌa be xmen Jesús ndab:
—Unaꞌ go leꞌa be men kwaꞌad baꞌ leꞌa ngidko ga, ¿ná xtaꞌan ndab go ná ton mgal xab ga zha?
32 Ná leꞌa Jesús nwiꞌika gangeak ná ton mgal xab xa. 33 Leꞌa xagots wa nxis tant nzheb xa, geal leꞌa xa uniꞌí xtaꞌan mbin xa. Cha ubii xa msaxib xa ndoꞌ Jesús, cha ndab xa idub gealngea xtaꞌan mbin xa. 34 Leꞌa Jesús cha ndab ndoꞌ xa:
—Xagots, leꞌa ta na mgeꞌ ladna lu naꞌ wa, ta weꞌe myakna lu. Nat byaꞌ cha bten ladna lu, leꞌa lu myaklana ndoꞌ gealgizh wa.
35 Ndalen li nsoꞌyadiꞌizh Jesús, ulen pla bexa utoꞌo ta lid Jairo, ndab dub xa wa ndoꞌ Jairo:
—Leꞌa xingots ga ngutla. Yá naꞌantapa goꞌo ga mech baꞌ.
36 Ná leꞌa gor na mbiꞌín Jesús ta li ndab xa wa, cha ndab Jesús ndoꞌ Jairo:
—Lá izheb lu. Bingeatsa ladna lu naꞌ.
37 Weꞌe leꞌa Jesús lá ngoꞌo itea be men wa. Nabtsa Pedr no Jacob no Juan wit Jacob mbiꞌi Jesús. 38 Gor na ulayaꞌ bexa ta lid Jairo, leꞌa Jesús uniꞌí xteꞌe nbezhat bexa no ndeyoꞌon bexa. 39 Cha uyoꞌo Jesús len niꞌi wa, cha ndab xa:
—¿Xtaꞌan lbaꞌa ndun bega ruid nsea ndeyoꞌon bega zha? Leꞌa meꞌed baꞌ naꞌanpa ngut, leꞌa meꞌed baꞌ ga naxyats‑tsa.
40 Leꞌa be men wa ndi nxiꞌidno Jesús. Leꞌa Jesús cha ndab ndoꞌ bexa:
—¡Utate itea bega sa ndee!
Cha mbiꞌi Jesús xustsa meꞌed no xnaꞌatsa meꞌed nsea yontsa be xmen Jesús wa. Cha uyoꞌo bexa len sa nchoꞌob meꞌed wa. 41 Weꞌe leꞌa Jesús cha usen yaꞌa meꞌed, cha ndab xa:
—Talita kumi —leꞌa ta wa dub diꞌizh gab: Meꞌed gots, naꞌ gáp ndoꞌ lu, goste.
42 Leꞌa meꞌed wa cha mban no usaxan nkesea meꞌed. Leꞌa be men ndebe sa wa ngwanseanabe. Leꞌa meꞌed wa ncho dub tibtop liꞌin. 43 Weꞌe leꞌa Jesús cha ndab ndoꞌ bexa:
—Naꞌanpa gudiꞌizh bega ta ndee. Nat bsaꞌa bega ta gaw meꞌed gots baꞌ.