5
Libr nyuꞌud nsea Borreg Ben
1 Cha uní naꞌ leꞌa yaꞌa lad gaꞌal xa na nsob ndoꞌ yaxil wa nchoꞌob dub libr nyuꞌud nkea letr ndoꞌ‑yá, leꞌa tsoꞌo‑yá nsénkea dub gaꞌad se. 2 Cha uní naꞌ dub angel juert ten Dios, ugeꞌ unabdiꞌizh xa, ndab xa:
—¿Ton dub xa suꞌu guzhaꞌa be se nsénkea libr baꞌ, cha uxaꞌal xa‑yá?
3 Parea ni dub xa ncho gibeꞌa, no ni dub xa ncho ndoꞌ gizhliyo, no ni dub xa ncho xan gizhliyo lá isuꞌu uxaꞌal‑a ni iwiꞌi xa ndoꞌ‑yá. 4 Cha uzhebpa ndon naꞌ geal lá izheal ni dub xa uxaꞌal libr wa, no goꞌol xa‑yá no ni iwiꞌi xa ndoꞌ‑yá. 5 Parea leꞌa dub xa gox xa nsak wa ndab ndoꞌ naꞌ:
—Yá lá goꞌonta lu. Unaꞌ leꞌa xa nsaleaꞌ Mbiꞌizh ten Judá, xa ulen ras ten David, leꞌa xa wa mbin gan ndoꞌ maxuꞌu. Leꞌa nat leꞌa xa wa sun gan guzhaꞌa isagaꞌad se nsénkea libr baꞌ wa, cha uxaꞌal xa‑yá.
6 Cha weꞌe uní naꞌ leꞌa wats yaxil wa, tlaw be idap ta nban wa no tlaw bexa gox xa nsak wa, nsoꞌ dub Borreg Ben cuent nak dub man mbit be men. Ndap ma dub gaꞌad xkach ma nsea dub gaꞌad ngusndoꞌ ma, leꞌa ta wa isagaꞌad espíritu mtuꞌub Dios ndoꞌ idub gizhliyo. 7 Weꞌe leꞌa Borreg wa cha ulen usen libr nchoꞌob ndoꞌ yaꞌa lad gaꞌal xa nsob ndoꞌ yaxil wa. 8 Leꞌa gor usen Borreg libr wa, leꞌa idap be ta nban wa nsea be isagaꞌal bdap bexa gox xa nsak wa cha usaxib ndoꞌ Borreg wa, gast ndoꞌ yo ngol xtuzh bexa. Leꞌa itea bexa wa ndap be arpa no be vas oro ncho ta uxeꞌe len na, leꞌa ta wa ta ndadiꞌizhno be men Dios, bexa umbiꞌi nak ndoꞌ Dios. 9 Cha mbiltoꞌo bexa dub cant kub, ndab bexa ndoꞌ Borreg:
Leꞌa go nsabndoꞌ isen libr baꞌ, no guzhaꞌa ga be se nsénkea‑yá,
geal leꞌa go ngut, mtsiꞌi ga ten ten ga,
ta weꞌe myak besa xin Dios ndoꞌ itea be ras be men,
no itea be diꞌizh ndadiꞌizh xa, no itea be gezh,
no itea be nacion.
10 No mbinno ga besa bexa nibeꞌe nsea be uleꞌay ndun tiꞌin ndoꞌ Dios, inibeꞌe besa ndoꞌ gizhliyo.
11 Weꞌe cha mwiꞌi naꞌ, cha mbín naꞌ sian ti be angel idub gangeak sa nsoꞌ yaxil wa, nsea ti be ta nban wa, no ti bexa gox xa nsak wa. Leꞌa bexa wa uzhebpa bexa kwaꞌad luzh, gast lá gun naꞌ gan gáp naꞌ plo bexa. 12 Ugeꞌ ndab bexa:
Leꞌa Borreg Ben xa na leꞌa be men mbit wa,
nsabndoꞌ gab beuna leꞌa xa wa xa nibeꞌe,
no uzheꞌeb sian be taꞌa ndap xa,
no uzheꞌeb ndák xa,
no uzheꞌeb xa juert nak xa,
no yankea beuna xa leꞌa xa uzhebpa xa nsak.
13 Cha mbín naꞌ leꞌa itea be taꞌa mbindeꞌe Dios, be ta ncho gibeꞌa no ndoꞌ gizhliyo no xan gizhliyo no len nitsdoꞌo, leꞌa be ta wa ndab:
Leꞌa xa nsob ndoꞌ yaxil baꞌ nsea Borreg Ben baꞌ,
leꞌa beuna idub tiemp nsabndoꞌ yankea bexa baꞌ,
no yankea beuna bexa ta na uzheꞌeb wen nak bexa,
no ta na uzheꞌeb juert nak bexa.
14 Leꞌa idap be ta nban wa cha ndab:
—¡Lika nak‑a!
Leꞌa isagaꞌal bdap bexa gox xa nsak wa cha usaxib gast ndoꞌ yo ngol xtuzh bexa, cha ngwankea bexa wa Dios, xa nban idub tiemp.