5
Mod nu gyicy mbecy ni Crisht benu shiñ ricy tub yu
Ya̱ güeña̱ nu lat de ru, zu tub mbecy nu gush yu ñaa naan yu. Yu zeꞌ tonaꞌ la cyi ily bicy yu. Mas de mbecy nu a̱ꞌ yuꞌ lo Ñgyoozh wagyicy yu cyi zeꞌ. Orzeꞌ ¿lagu gaal nu dzi ricy der gyel leꞌ nir? Lugaar nu gyicy leꞌ der, nap zir nu gyicy shni der, nunu rlagy ñi co der mbecy nu bicy cyi zeꞌ lat der. Mas ya̱ saca̱ lat der tees ya̱ ca ica̱ der. Nunu nu nac rishbeey nu briic Shuaan den Jesuuz ne̱, ndeꞌ nu ya̱ mnii to̱o̱ nu lac mod rlagy ñi gyicy nu der mbecy nu bicy cyi zeꞌ. Mas ya̱ saca̱ lat der tees ya̱ ne̱e̱ lo der. Orzeꞌ ndeꞌ nañ gal na nu zu̱ lat der. Lat nu yuꞌ tublaazh der, ya̱ ca ica̱ der, nunu Shuaan den Jesucrisht locyuub mi der. Orzeꞌ mbecy nu bicy cyi zeꞌ, bguꞌ der yu yaa nuras, gun orzeꞌ chay lo cashtig, tees gruu mbañ yu ornu cyid Shuaan den Jesuuz tuubaꞌ tir.
Walagy ñi nu gyicy leꞌ der. Mbish tub riidz nu rnii mbecy: coz cyi nañ gal nu na lebadur. Orzeꞌ nu nac ñuu miiñ lebadur gyicy ñi nu gyafert dela cub gyishtily. Rlagy ñi nu co der lebadur zeꞌ lat ru. Gun orzeꞌ sac la coz cyi lat der. Gun orzeꞌ na der gal nu na cub gyishtily nu du ub la nu sac la lebadur zeꞌ lat der. Nunu rad lagya̱ nu caacy der, gun Jesucrisht bi gut mi par nu nac de ub na. Par de ub na, mi zeꞌ nam gal nu na shily nu rshu reñ lat saꞌ ni Pas. Nunu de ub na nan gal na mbecy nu yuꞌ saꞌ zeꞌ. Ndeꞌ nu rlagy ñi chuꞌ den nu gyel cacy, nunu gyicy den coz nu seꞌñ. Gun ndeꞌ nañ gal nu na gyishtily nu sac lebadur zeꞌ. Walagy ñi nu shiñ gyicy den nunu walagy ñi nu gyicy den coz cyi gal nu bicy den gulas. Gun ndeꞌ nañ gal nu na gyishtily nu yuꞌ lebadur. Nunu wac gow mbecy gyishtily nu yuꞌ lebadur zeꞌ lat nu yuꞌ dey saꞌ ni Pas.
Lo tuubaꞌ gyicy nu bzeeda̱ lo der zeꞌ, pca̱a̱ nu cueꞌ gac nu der de mbecy nu ral losaꞌ nu wanchelaa. 10 De mbecy nu walab mbecy ni Ñgyoozh, mas ral dey losaꞌy nu wanchelaay, mas nac dey mbecy saap lagy, nunu mas nac dey gubaan, mas nac dey mbecy nu driib zily nab, tees wane̱e̱ nu rlagy ñi nu gruu der lat dey, gun benu ni gyicy der, orzeꞌ rlagy ñi nu ruu der gyishlombecy ii. 11 Tees coz nu rlagya̱ ne̱e̱ lo der, ndeꞌ nu cueꞌ gac nu der ni tub la de mbecy nu rnii nu nac yu bicy der, zeꞌ ii ricy dey de cyi zeꞌ. Ral dey losaꞌy nu wanchelaay. Rasaap lagy dey coz ni losaꞌy. Driib zily dey nab. Rzat zi dey losaꞌy. Nac dey mbecy rzugy. Ricy dey gubaan. Cueꞌ gac nu der ni tub la de mbecy zeꞌ. De mbecy zeꞌ ni cueꞌ gow nu der yu gyit. 12-13 Gun ndeꞌ walab cuen ne̱ ya̱ nu gri be̱e̱ ni de yu nu walab mbecy ni Crisht. Sinu Ñgyoozh gri beem ni de mbecy zeꞌ. Tees de mbecy nu nac ni Crisht, rlagy ñi nu gri bee der ni dey. Orzeꞌ rlagy ñi nu co der mbecy nu bicy cyi zeꞌ lat der.