2
Bet Espiriit Yon ni Ñgyoozh
1 Ornu pshuub dzi ni saꞌ nu la Pentecostés, dela de mbecy ni Crisht yuꞌ dey tublaazh la tub seꞌ ziꞌl. 2 Orzeꞌ derepent la brugyiꞌ rzigy baa. Gal rac nu yad tub bi ily ni rac. Nunu dutuub la nañ yuꞌ zeꞌ nu nguaa dey bzigy. 3 Orzeꞌ bruu zac gal nu na lyush gyi na bruu zac. Gul ñii tub ga la dey. 4 Orzeꞌ dela dey gutib ic zaꞌ la Espiriit Yon ni Ñgyoozh dey, nunu brugyiꞌ rnii dey riidz reñaꞌ mbecy. Dub gal lac na riidz nu briic Espiriit Yon ni Ñgyoozh nu nii dey dub ni mod mniiy.
5 Tiem zeꞌ zañ mbecy Israeel nu zu shcab nu nac de coz ni Ñgyoozh yuꞌy Jerusaleeng. Zañ lugaar ni gyishlombecy bruu dey. 6 Ornu bzigy zeꞌ, orzeꞌ tonaꞌ la mbecy zigy byatublaazh yu. Nunu guton la dey yuꞌy, gun tub ga la de mbecy ni Crisht zeꞌ brugyiꞌ rniiy riidz de mbecy nu bdeꞌ zeꞌ. 7 Dela mbecy bdzoꞌw laa dey, nunu za nu la ic dey. Orzeꞌ nay:
―¡Güii ñuu! Zeꞌ ¿a walab mbecy Galilea nac dela mbecy nu rnii ii? 8 Zeꞌ ¿lac guc nu rac rnii dey de riidz guledz tub ga la den? 9 Gun ii yuꞌ mbecy nu bruu zañ lugaar. Yuꞌ mbecy nu bruu Partia, yu nu bruu Media, yu nu bruu Elam, yu nu bruu Mesopotamia, yu nu bruu Judea, yu nu bruu Capadocia, yu nu bruu Ponto, yu nu bruu Asia, 10 yu nu bruu Frigia, yu nu bruu Panfilia, yu nu bruu Egipto, yu nu bruu de lugaar ni Libia nu yuꞌ par lo Cirene. Dela zeꞌ bruu de mbecy nu yuꞌ ii. Nunu gazaꞌ de mbecy nu bruu Rom nu rcyiiñ laab ii. Yuꞌ de yu nu nac mbecy Israeel nese nu gul laa dey, nunu yuꞌ gaꞌ de yu nu byac mbecy Israeel. 11 Nunu gazaꞌ mbecy nu bruu Creta, mbecy nu bruu Arabia. ¡Dela zeꞌ bruu tub nac ga den, tees dela den reñ na coz ily ni Ñgyoozh nu riidz na! ―na dey.
12 Dela mbecy bdzoꞌw laa dey, nunu guton la dey yuꞌy. Se nu rgugyiꞌ ziꞌl dey lo losaꞌy yuꞌy:
―Zeꞌ ¿lac yaruu de nu nii? ―rnii dey.
13 Tees yuꞌ gaꞌ mbecy canu rgubdzaa dey. Orzeꞌ nay:
―¡Ni ricy dey gun rzugy yu! ―na dey.
Bed mniiy lo de mbecy zigy
14 Orzeꞌ wes su Bed nu deꞌ zir de trotub aposht gazeꞌ nu brugyiꞌ ye la rniiy. Orzeꞌ nay:
―De ru mbecy Israeel, gal nu dela de ru mbecy nu yuꞌ gyedz Jerusaleeng, rlagy ñi gad lagy der de coz nu rac ii, nunu nap bzuub gyidag der de coz nu ne̱e̱. 15 De mbecy ii walab nu rzugy dey gal nu rnii too de ru. Gyiib gaa zi or napor yuꞌn na. Walab i or gzugy mbecy. 16 Sinu na ricy yac ñi coz nu pcaa Joeel, yu nu mnii por cuen ni Ñgyoozh. Ñgyoozh nam:
17 Ornu bi yad lazh tiem,
ya̱ rica̱ Espiriit ne̱ ni de lo la mbecy.
Orzeꞌ dela de yu nguzh ni dey,
gal nu dela de fiñ nguzh ni dey,
gnii dey por cuen ne̱.
De yu feñ gyicya̱ nu deꞌ lo dey de coz nu gac.
Nunu de yu bel lat pcaal dey rica̱ nu gad lagy yu de coz nu gac.
18 Laab tiem zeꞌ rica̱ Espiriit Yon ne̱ ni yu nu ricy coz nu rne̱e̱,
nunu rica̱ꞌm ni de biñ mñaa nu ricy de coz nu rne̱e̱.
Orzeꞌ gnii dey por cuen ne̱.
19 Ya̱ gyicya̱ zañ coz ily baa.
Zeꞌ lo yu gyicya̱ coz par nu gad lagy mbecy la tiem.
Shu reñ; grib gyi; nunu grib dzeeñ nan.
20 Gyet cow lo doo.
Zeꞌ lo beey gyet ña gal na reñ.
Dela ndeꞌ gac ñii anzir nu shuub dzi nu bi pcui̱
par nu gyicy ya̱ gyel fushtiz ne̱.
Dzi zeꞌ tonaꞌ la dzi ily.
Nunu dzi zeꞌ tonaꞌ la cyit gac.
21 Nunu dela mbecy nu nish baa lo̱ nu gloo mbaña̱ dey,
de yu zeꞌ gruu mbañ yu,
nam. Ni pcaa Joeel gulas.
22 ’De ru mbecy Israeel, bzuub gyidag der de coz nu ne̱e̱ na. Ñgyoozh naal la briic mi nu gad lagy der nu Jesuuz, biñ nu pcyiiñ Nazaret, bduꞌ gyim riiñ ni Ñgyoozh nu nac de coz ily nu bicy mi lat de ru. Ñgyoozh bicy mi nu bicy Jesuuz zañ coz ily. Bicy mi nusuriidz. Bicy mi zañ coz par nu gad lagy der cyu nac mi. 23 Tees Ñgyoozh nil nese gulas bi mne̱ꞌ ic mi, coz nu gyicy mi. Nunu bi gud lagy mi nu gyet lag mi yaa der. Orzeꞌ de ru gua nu der mi pres. Gazeꞌ nu bicy der nu de mbecy nu wagyicy yac de leey ni Ñgyoozh biit dey mi lo cruuz. 24 Tees Ñgyoozh bicy mi nu byabañ mi. Bloom mi lat de mbecy gut, gun zeꞌ nu yuꞌ mbecy gut wac soow ñi lom. 25 Gun Dabi laab mi bzat yu ornu pcaay:
Ya̱ rad lagya̱ nu zaab zu gala Ñgyoozh lo̱.
Zub mi par yaa be̱e̱,
gun orzeꞌ mas lac ruꞌ wagyicy deet mbecy nuy ya̱.
26 Ndeꞌ nu tonaꞌ la gusu cyit lagya̱,
nunu mne̱e̱ riidz nu rnii mbecy nu zu cyit lagy.
Nunu drish lo̱ lo Ñgyoozh nu nac cuerp ne̱.
27 Gun ru wazaan ru nu gyiyeeñ lardo̱o̱ lat de mbecy gut.
Ni wazaan ru nu gadz cuerp ni mbecy yon nir.
28 Ru mniir lo̱ mod nu gyicya̱ par nu cui mbaña̱.
Ya̱ tonaꞌ la chesu cyit lagya̱, gun nac nur ya̱,
pcaa Dabi.
29 ’Der bicy na, naal la za de riidz ii. Gyitoo bel ni den Dabi gut yu. Orzeꞌ pcach dey yu. Nunu baa niy rzac den ñi mas gal dzi na. 30 Tees Dabi guc yu tub mbecy nu mnii por cuen ni Ñgyoozh. Gud lagy yu nu Ñgyoozh mniim nu waded la nu lat ca na tub nez yu, ruu biñ nu pcuim nu gac Shuaan den gal nu ub yu guc yu rey nu byub ic den. 31 Ndeꞌ nu Dabi gud lagy yu coz nu gyicy Ñgyoozh. Mniiy nu biñ nu pcuim nu co mbañ de mbecy nim gat mi. Orzeꞌ gyabañ mi. Mniiy nu lardoom wayiyeeñ ñi lugaar zeꞌ nu ryeeñ de mbecy gut, nunu mniiy nu cuerp nim wadz ñi. 32 Mi zeꞌ laab Jesuuz. Bicy Ñgyoozh nu byabañ mi, nunu de̱ ya̱ bzaac urlo̱ la̱ de ndeꞌ. 33 Na Ñgyoozh bicy mi nu zub mi zeꞌ nu zub biñ zub lo zir par dela. Zub mi par yaa beem. Orzeꞌ Ñgyoozh Uz mi briic mi Espiriit Yon nim ni mi zeꞌ. Gal nu mniim, ni bicy mi. Na dela coz nu rzac der ii, nunu dela coz nu reñ der ii, dela nii bruuñ gal lom. 34 Gun Dabi walab ub yu gup yu gyibaa gal nu gup Jesuuz. Sinu ub lay mniiy ornu nay:
Ñgyoozh nam rab mi Shuaan na:
Bzub par yaa be̱e̱, seꞌ mbecy zub lo zir,
35 Lat nu gyicya̱ nu gyicy ru gan de losaꞌ yuur,
nam, na Dabi.
36 ’Ndeꞌ nu dela mbecy Israeel rlagy ñi nu gad lagy dey nu Jesuuz, biñ nu biit dey lo cruuz, Ñgyoozh bicy mi nu nac mi Shuaan den, nunu nac mi biñ nu bloo sum nu co mbañ den ―na Bed.
37 Ornu güeñ de mbecy de riidz zeꞌ, orzeꞌ tonaꞌ la bicy dey sentiir nañ lardooy. Gazeꞌ nu na dey rab yu Bed nu deꞌ zir de aposht:
―Der bicy na, ¿la coz rlagy ñi nu gyicy de̱? ―na dey.
38 Orzeꞌ na Bed rab yu dey:
―Mne̱ꞌ der dela de cyi nu ricy ru, nunu dela der bzu nis der par nu gabe nu nac der mbecy ni Jesucrisht, gun orzeꞌ gyicy sulagy Ñgyoozh de cyi der, nunu gazeꞌ nu cuic mi Espiriit Yon nim ni der. 39 Gun Ñgyoozh bi mniim nu segur la cuic mi Espiriit Yon nim ni de ru nu ni de iꞌñ ru nu chuꞌ par lo, nu ni dela de mbecy nu yuꞌ zet, de yu nu bi blosum ―na Bed.
40 Dela ndeꞌ mniiy, nunu zañ zir riidz mniiy lo dey. Briic yu consef ni dey. Nunu mniiy lac gyicy dey. Orzeꞌ i mod mniiy:
―Bicy der nu glar ni cashtig nu cuic Ñgyoozh ni de mbecy a̱ꞌ nap nu yuꞌ na ―nay.
41 Orzeꞌ de yu nu “O” mnii ni de riidz nu mnii Bed, dela dey bzu nis yu. Dzi zeꞌ chon miily mbecy brugyiꞌ ricy cup yu consuel lo Jesuuz, reñ de yu nu nil bi ricy cup consuel lom. 42 Orzeꞌ dela dey fert la zu dey shcab nu nac de coz nu rlyuu de aposht. Nunu yatublaazh dela dey nu ro nuy losaꞌy riidz. Nunu yatublaazh dela dey ricy yu che nu losaꞌy gal mod nu bzeeñ Crisht. Nunu yatublaazh dey nii nuy Ñgyoozh. De ndeꞌ coz nu zaab bicy la dey.
Mod nu guꞌ de mbecy loga la ni Crisht
43 Dela de mbecy za nu ic dey nu nac de coz nu bicy de aposht, gun de aposht bicy dey zañ coz ily. Nunu zañ nusuriidz bicy dey. 44 Dela de yu nu ricy cup consuel lo Crisht zeꞌ tonaꞌ la nap byap riidz ni dey nu losaꞌy. Nunu dela dey rlew yu de coz nu cyiiñ lat de losaꞌy. 45 Rut dey de coz nu yuꞌ niy. Orzeꞌ rlew dey ñuu ga tiñ nu losaꞌy dub gal lac tant nu cyiiñ ni tub ga dey. 46 Orzeꞌ de dzi la yatublaazh dey nañ yuꞌ nu driib zily mbecy Ñgyoozh, nunu yatublaazhaꞌ dey yuꞌ losaꞌy nu ricy dey che tublaazh gal mod nu bzeeñ Crisht. Nap zu lagy dey. Nunu dub gal ri lagy dey bicy yu de ndeꞌ. 47 Ryabic dey gyel mbecy ni Ñgyoozh. Nunu dela reñaꞌ mbecy, nap yuꞌ nuy dey. Nunu Ñgyoozh tub dzi ga rcyaañ zir mi mbecy nu ricy cup consuel lo Crisht.